الحقيقه بقى لى فتره بافكر انى اغير العربيه بس مش عارف كل ما انوى ابيع ارجع فى كلامى تانى علشان كده حبيت انكم تشاركونى التفكير فى الموضوع ده
انا هنا طالب راى أى واحد بيمر بنفس الظروف وبيفكر يغير عربيته الى حاجه جديده
اليكم التفاصيل
العربيه الحاليه : نيسان صنى مو 2000 من الزيرو
العداد : 197 الف كم
الصاج : فابريكه بس فيه بعض الخبطات الصغيره والتجاريح اللى مخليانى عايز ارشه نظافه
الموتور: اكثر من رائع ومافيش ميكانيكى جه جنبه للان رغم مرور 8 سنوات وكل هذه المسافه
العفشه : جيده لانى غيرت المساعدين من شهر واحد فقط
الفرامل : اكثر من رائعه لانى باقوم بصيانه كامله وتيل اصلى باستمرار واخر صيانه كانت من اسبوعين فقط
الحاله من الداخل : ممتازه ونظيفه جدا لانه استخدام شخصى بدون بهدله
بصراحه العربيه دى صعبانه عليا ابيعها بس حاسس انها قدمت فى الموديل وشكلها بقى قديم امام النااس فى الشغل وبين الاصدقاء ( مديرى اوبل فيكترا 2007 - مدير الشركه بى ام 2007 - من هم فى نفس درجتى الوظيفيه ميجان 2004 الخ ) طبعا حاجه مش لطيفه !
الموضوع مش انها بقت وحشه او ادائها بقى مش كويس
بس شكلها بقى غير مناسب
النصيحه المطلوبه لو انت مكانى حتعمل ايه ؟
تبيعها رغم انها جيده جدا وغير مكلفه فى صيانتها لمجرد ان شكلها قدم فى الموديل ؟
ولا تسيبها وتسد ودانك من القيل والقال ؟