الموضوع: المدن الجديدة

المشاركة الأصلية كتبت بواسطة motorizer

بصراحة فكر سليم 100% .. و طبعاَ العربية في الطرق السريعة بتفتح الموتور إنما في الإشارات و الزحمة بيتكتم .

لو حسبتها إنت و إنت ساكن في وسط البلد في الزحمة .. و إنت ساكن براها في الزحمة برضه لأن هتخش البلد عشان شغلك و خلافه .. بس في الأخر .. هتروح تبقي محتار تركن فين ولا فين .. مش هتخاف علي عربيتك واحد يدمرها و هو بيحاول يركن في خرم الإبرة بينها و بين العربية اللي وراها .. هدوء و مش سامع الكلاكسات و الشتايم 24 ساعة .. بتشم هوا حلو ..

الموضوع يستاهل الكيلوات الأكتر اللي هتقطعها بالعربية و المشوار للشغل .. مع ملاحظة إنك مش هتتخلص من الزحمة برضه بس هتتخلص من بعض أثارها .. و واحدة واحدة المدن الجديدة بتقوم .. و تجربتنا هنا في القاهرة في مدينتي 6 أكتوبر و الشيخ زايد ممتازة .. في خلال 10 سنين مدارس و جامعات و مولات و هايبر ماركتس كتيييير جداَ في مربع سكنك .. ناس كتير لا تضطر للخروج خارج أكتوبر مطلقاَ إذا كان شغلها فيها .

الأثار الجانبية إن هتبقي في مشكلة لو العربية لا قدر الله عطلت حالك هيقف تماماَ .
و الأمان بيبقي أقل شوية عن وسط البلد بس لو جوة كومباوند بيبقي طبعاَ أحسن .

بس بجد .. الحل هو الخروووووج من هذا الزحام .

انا متفق معاك 100 100 ، بس هنا فى اسكندرية مش شايفينها كده

و علشان العربية انا معايا واحدة و المدام معاها واحدة
الامان هو فعلا المشكلة الحقيقة و اللى مقلقنى ، و بدور على كومباوند و ربنا يسهل

المشاركة الأصلية كتبت بواسطة abzoabzo

انت بتشترى اعصابك فى المدن الجديدة وراحة بالك كمان

+11111111111111

المشاركة الأصلية كتبت بواسطة salah_sr

شوف أنا جربت هذه التجربة أنا كنت ساكن في رابعة العدوية مدينة نصر و زهقت من الزحمة الشديدة وكنت بعض الأحيان أقف عند ميان رابعة ولف أرجع البيت من الزحمة و كل يوم (لو عرفت أركن عند البيت ؟؟؟؟ ) الاقي العربية مخبوطة و هي وقفة و لذلك أستخرت ربنا و أخذت شقة في مدينة الشروق 30 كيلو تقريبا و أنا ساكن هناك منذ عام 2004 و لم أندم لحظة و احدة بل كان قرار صائب 100% جو نقي _درجة حرارة أقل من القاهرة _ ركنة للعربية في أي وقت _ الطريق مريح للسواقة _ و التوتر العصبي قل كثيرا . فالقرار صائب و ربنا يوفقك

نفسى الناس يصدقوا كلامى لما بقول زيك

ربنا يسهل انا بسمع من كل الاخوة هنا الاراء

و ربنا يوفقنى للاختيار الاصح

طبعا المدن الجديدة أفضل مليون مرة
شوف دلوقتي أسعار مدينة زي السادس من أكتوبر و الشيخ زايد في الجيزة أصبحوا بكام و كانوا بكام
الناس برضه كانت بتقول ... دي بعيدة و مش أمان و مش عارف أيه .......
تعالى دلوقتي شوف .................... الأسعار أصبحت ولعة و أغلى من مناطق قديمة زي الهرم و فيصل الأقرب إليها .
و طبعا النظافة متوفرة ........ الأمان إلى حدا ما معقول جدا في أغلب الأحياء ..... و خصوصا الأماكن المغلقة أو التجمعات السكنية اللي بيسموها كومبوند .

أنت عارف أنا أحيانا ممكن و أنا رايح مشوار بعيد أعمل 100 كم زيادة علشان العربية متقفش في وسط الزحمة و أتخنق من البشر لأن الناس هنا في مصر مش بتعرف تنظم نفسها خالص و مش عايزين ينظموا نفسهم .

المهم المدن الجديدة خطوة رائعة ........... أتكل على الله ...... و هاتعرف معنى الكلام ده بعد 5 سنين أو 10 سنين لما المدينة اللي حضرتك بتتكلم عليها تتغير ملامحها و أسعارها تغلى و ساعتها هاتتمنى أنك كنت تشتري بدل الرجوع في كلامك دلوقتي .

و يا سلام لو تعرف تلاقي شغل قريب من سكنك .......هاتلاقي نفسك بقيت مرتاح آخر راحة ....

ربنا يوفقك يا أستاذ مينا و تلاقي سكن مناسب و أمان و بسعر معقول .