العائدون من الموت!!!!!!!!

**خالدابوالنجا** · 20-10-2007 07:58 PM

موضوع الحادث الذى تعرض له الاخ خالد سبعاوى ذكرنى بفيلم امريكى عن مجموعه من الشباب كانوا يقومون بايصال احدهم فى كل مره الى مشارف الموت ثم ينقذوه فى اخر لحظه وذلك عن طريق حقنه كما اتذكر وكان من ابطال الفيلم ان لم تخنى الذاكره براد بيت. ثم يقوم من قام بالتجربه بسرد ما حدث له وعن شعوره واحساسه فى هذه اللحظه.
ايضا هناك شىء من ذلك شاع بين الطلاب الامريكان بان يقوم مجموعه منهم بشنق احدهم ثم يتركونه يصارع الموت ثم ينقذوه فى اخر لحظه.
اعتقد ان الكثير منا عاش هذه اللحظات ووقف فى هذه المنطقه التى تفصل بين الحياة والموت خصوصا عاشقى السيارات .
فليقم كل من عاش هذه التجربه بسرد ماحدث له وعن شعوره فى هذه اللحظات الفاصله وعما فكر فيه اذا كان قد استطاع التفكير اصلا.

**مدحت منيب** · 20-10-2007 08:43 PM

اللحظه دى مجرد امتداد لخلفيتك النفسيه و الدينيه و فكرتك المكونه مسبقا عن الحياه و الموت بس بتضخيم شديد , فاذا كنت الان تخاف من الموت حقا , فقد يتوقف قلبك حقيقة و تموت فيما يسمى الصدمه العصبيه , واذا كنت قد قتلت الموت بحثا و امنت بكل وجدانك بما بلغك به ربك سبحانه على السنة رسله فستنزل عليك سكينه مطبقه تكاد لا تسمع معها شىا من خارجك , مصحوبة بهيبة و جلال يكاد يفنيك عن شعورك بنفسكو جسمك هذه اللحظه التى يقطع او يدمر فيها جزا من الانسان ولا يدرى ولا يشعر بشى ,,واذا تاكدت الروح تاكد شبه يقينى من حتمية الموت الان لا محاله فانها تنسحب حاملة معها كل الحواس لاعلى بحوالى 20 -30 متر(مثلا تقفز بالمظله و تفشل كل محاولات فتحها ..تقع من قطار بينما يعبر فوقك الاخر فى اتجاه مضاد بضوضاؤه الهايله ) ..اهم درس التجربه القاسيه دى تستفيد منه ان تعمل بكل جوارحك و طاقتك لاما جنه او نار وتجد فى داخلك قوه تغلب بها العالم كاه انسه و جنه وحدك فى سبيل ما انت لا محالة صاير اليه

**ayman_elkholy** · 20-10-2007 08:43 PM

منذ عام وبضعة اشهر قليله كان معايا الادا وفى حوالى الساعه الثانيه بعد منتصف اليل اتصل بى اخى وقال لى الحقنى الحاجه (والدتى) دخلت فى غيبوبة كبد ومش عارف اتصرف كنت هنا فى القاهره وهما كانو فى المنوفيه فقلت له نصف ساعه واكون عندك ونزلت واخذت طريقى اليهم الطريق بع الساعه 2 كان فاضى تقريبا ومشيت على سرعة 120 وفجأه لمحت ميكروباص راكن يمين كان لسه بعيد جدا عنى خفت اعدى من جنبه بسرعتى يكون حد معدى وكانت الكارسه مش عارف ايه اللى حصل تقريبا بدل ما اهدى تقلت رجلى شويه على الفرامل وفجأه لقيت العربيه بتلف بيه فى الطريق كذا مره لدرجة ان تفكيرى اتشل ومعرفتش اعمل اى حاجه غير انى تركت الدركسيون واغمضت عينى وقلت اشهد ان لا الله الا الله
فى انتظار الموت المحقق . بعدها وجدت اناسا كثيره انزلونى من السياره فى حالة اغماء وبع ان افاقونى وجدت الجنب اليمين للادا فى ظهر الميكروباص فكان كل تفكيرى ان اقوم والحق والدتى راضيت صاحب الميكروباص وعرض عليا بعض الموجودين توصيلى ولكنى رفضت تماما واخذت السياره وذهبت بيها الى والدتى ثم الى المستشفى
وبع ما اطمأننت انها دخلت غرفتها نزلت اشوف العربيه وجدت ان القايم اليمين مكسور والجنب كله راح فى داهيه حمدت الله
ومرت ايام قليله وماتت امى ماتت ماتت .
اكيد انتو حاسين بشعورى الان يا ليتنى ما كتبت فى هذا الموضوع

**hatem_badawe** · 20-10-2007 09:02 PM

ربنا يرحمها ويدخلها جناتة

انا برضة مش قادر انسي موت جدتي ابدا كانت معايا قبل ما تموت بيوم وكويسة
ربنا يرحمهم جميعا

**sab3aawy** · 20-10-2007 09:19 PM

تجربة الدنو من الموت Near death experience ,تعرف اختصارا NDE هى التجربة التى مر بها كل من توقف قلبهم للحظات او حدث قصور فى تغذية الدم للمخ للحظات معينة ومن ثم عاد مرة اخرى ليتم تغذيتهم

وقد كانت هذة التجربة محل دراسة الكثير من العلماء وتوجد عنها بعض الابحاث الموثقة،

وانقل لكم هنا مختصر مما كتبه الدكتور احمد خالد توفيق فى كتابه "هادم الأساطير" الذى تناول فيه العديد من الاساطير المتداولة بين البشر واسابها الحقيقية

يرى الكاتب ان هذة التجارب تكون مرتبطة فى الاساس بالمعتقدات الشخصية لكل أنسان، فكل انسان فى لحظة احتضاره يرى ما يتناسب مع معتقداته
وفى حوالى 12% من الحالات تكون هناك تلك الذكرى المبهمة عن شعور بالخروج من الجسد، ونفق راسى يقع الضوء فى نهايته وشعور عام بالسكينة والسلام ، ثم العودة الى العالم الواقعى

وفى حالات اخرى يحكى العائدون عن تجربة التحليق خارج الجسد ومتابعة الجسد من اعلى وقد التف حوله الأطباء وربما الباكون

غير ان التجربة ليست دائما بهيجة فقد حكى البعض عن عمليات تعذيب قام بها شياطين واقزام

تكونت مؤسسة اسمها "اياندس " هذة الظاهرة وقد وصل الباحثون فى هذة المؤسسة الى النتائج الآتيةلدى العائدون من الموت:

58% يشعرون بالسلام والهدوء النفسى

37% يعيشون تجربة متابعة الجسد من اعلى

23% يدخلون النفق المظلم الذى يضئ فى آخره

17%يرون الوضء الباهر

10% يذوبون فى هذا الضوء

(واضح ان المجموع اكثر من 100% مما يدل على ان البعض يعيشون اكثر من تجربة متداخلة)

المعارضين لهذة الظاهرة يقولون انها ظاهرة كيميائية صرفة حيث ان كل من تم تخديرهم لجاراحات المخ والاعصاب مروا بتجارب مشابهة، ويتعللون بان مادة الكيتامين المخدرة التى استخدمت فى التخدير للجراحات تحدث تأثيرات مماثلة، ودليلهم على ذلك ان كل جندى امريكى تم تخديره بهذه المادة فى فيتنام مر بتجارب مماثلة، وعلى ذلك فهم يرون ان المخ فى لحظات النهاية يفرز هذة المادة لجعل لحظات النهاية غير مؤلمة وسعيدة بالنسبة للمحتضر

كذلك فإن احد الأطباء واسمه مايكل برزنجر ويعيش فى اونتاريو بكندا، استطاع احداث نفس الرؤى لدى متطوعين عن طريق تنبيه الفص الصدغى بالمخ

يبقى ان نضيف ان مما يدعم عدم علاقة هذة الرؤى بالعالم الآخر ان كل محتضر يرى رؤى تتعلق بمعتقداته الدينة، فبينما يرى المسلم رؤى لتصور الجنة والنار فى الدين الإسلامى، يرى المسيحى رؤى تتناسب مع تخيله للأبدية، كما يرى الهندوسى رؤى تتناسب مع معتقداته وهكذا

**معاذ الشرباصى** · 20-10-2007 10:25 PM

انا حصلت لى بس بعيدا عن عالم السيارات

يعنى كنت فى يوم جمعة تعبان جدا, و قررت انى هنزل الصلاة فى جميع الاحوال

فضلت طول الخطبة تعبان جدا, و الخطيب كالعادة طول جدا

وقت الاقامة, مكنتش قادر اقوم, لكن اتحاملت على نفسى, و فى الركعة الاولى بدأت افقد الوعى تدريجيا و بدأ الصوت من حولى يختفى تدريجيا و الضوء شيئا فشيئا, ساعتها نطقت بالشهادتين فى سرى اعتقادا منى انها لحظة الموت

اختفى الصوت و الضوء لحظات و بدأ يعود تدريجيا مرة اخرى, و اتضح فى الاخر ان ضغطى كان منخفض لأقل درجاته, و كان عندى هبوط فى الدورة الدموية

بس تجربة كانت مش سهلة و بفتكرها كتير

**modux** · 20-10-2007 11:20 PM

انا مرة حصلتلي من حوالي 3 سنين
كنت في الصيف و مع 2 صحابي في راس البر

الساعة 3 بليل قررنا نروح

اخدنا طريق دمياط المنصورة - و هما ناموا اول الطريق
المهم انا حافظ الطريق ده الحمد لله

عديت كمين المنصورة و عارف انو بعدها بحوالي 3 كيلو مفيش مطبات ( بيحوطوا 3 مطبات ورا بعد الفرق بين كل واحد و التاني حوالي 5 متر

المهم كنتمشغل الساوند سيستم عالي اوي
و سرحت مع اغنية و ماشي 140
فجاة لقيت مطب قدامي !!!!!!!!!!!!!!!!!!!!

فرملت سنة صغيرة صحابي اتخضوا و صحوا
المهم اخدت اول مطب و طرت في السمااااااا و نزلت علي الارض مش اقل من 100
لعربية عرضت و خلاص قلت هتقلب هتقلب
العربية اخدت المطب بجبنها و فضلت ماشيه خمسات في خمسات و انا قاعد اتفرج علي الطريق
صحابي صوتوا

أشهد ان لا اله الا الله و اشهد ان محمد رسول الله

يا نازل في الترعة
يا هتقلب
يا هشيل الفواصل الاسمنتية
يا هشيل عمود
يا هيجي حد بسرعة من ورا يطرني

فضلت حوالي 20 ثانية في الحال ده
لف لف لف
و فجأة وقفت !!!!

نزلت اول ما فتحت الباب و قعت علي الارض
مش قادر اشيل نفسي
لفيت حوالين العربية لقيت مفيهاش خدشة !!!!
بس بطلت دورتها لقتها بتمشي عادي ركنت علي جنب و جبت ميه من العربية صبتها علي دماغي عشان افوق
و واحد صاحبي كمل بقية الطريق

عمرررررررري ما هنسي اللحظه دي !!!!!

**مدحت منيب** · 21-10-2007 01:16 AM

يا منجى من المهالك يارب , الحمد لله ان ماحدش مات , او كمل حياته مشلول .. هل بعد الانذار الصارخ دا بتعدى ال100 ؟

**modux** · 21-10-2007 01:28 AM

المشاركة الأصلية كتبت بواسطة pics

يا منجى من المهالك يارب , الحمد لله ان ماحدش مات , او كمل حياته مشلول .. هل بعد الانذار الصارخ دا بتعدى ال100 ؟

بصراحة اه

**Karim_Monir** · 21-10-2007 01:51 AM

المشاركة الأصلية كتبت بواسطة ayman_elkholy

منذ عام وبضعة اشهر قليله كان معايا الادا وفى حوالى الساعه الثانيه بعد منتصف اليل اتصل بى اخى وقال لى الحقنى الحاجه (والدتى) دخلت فى غيبوبة كبد ومش عارف اتصرف كنت هنا فى القاهره وهما كانو فى المنوفيه فقلت له نصف ساعه واكون عندك ونزلت واخذت طريقى اليهم الطريق بع الساعه 2 كان فاضى تقريبا ومشيت على سرعة 120 وفجأه لمحت ميكروباص راكن يمين كان لسه بعيد جدا عنى خفت اعدى من جنبه بسرعتى يكون حد معدى وكانت الكارسه مش عارف ايه اللى حصل تقريبا بدل ما اهدى تقلت رجلى شويه على الفرامل وفجأه لقيت العربيه بتلف بيه فى الطريق كذا مره لدرجة ان تفكيرى اتشل ومعرفتش اعمل اى حاجه غير انى تركت الدركسيون واغمضت عينى وقلت اشهد ان لا الله الا الله
فى انتظار الموت المحقق . بعدها وجدت اناسا كثيره انزلونى من السياره فى حالة اغماء وبع ان افاقونى وجدت الجنب اليمين للادا فى ظهر الميكروباص فكان كل تفكيرى ان اقوم والحق والدتى راضيت صاحب الميكروباص وعرض عليا بعض الموجودين توصيلى ولكنى رفضت تماما واخذت السياره وذهبت بيها الى والدتى ثم الى المستشفى
وبع ما اطمأننت انها دخلت غرفتها نزلت اشوف العربيه وجدت ان القايم اليمين مكسور والجنب كله راح فى داهيه حمدت الله
ومرت ايام قليله وماتت امى ماتت ماتت .
اكيد انتو حاسين بشعورى الان يا ليتنى ما كتبت فى هذا الموضوع

اللهم ارحمها وادخلها فسيح جناتك
انا فاكر اليوم ده كويس يا ايمن
ربنا ما يوري حد عشان كدة من اخطر ما يكون انك تبلغ حد هايجي سايق بخبر سيء زي ده
الحمد لله على نجاتك ويكفي والدتك فخرا انها انجبت مثلك
ولا تنسى انها لا ينقطع عملها ما دام دعائك لها قائم