المشاركة الأصلية كتبت بواسطة shery103
النهاردة نازلة اركب عربيتى ، بفتح الباب لقيت كارت محطوط عند المساحات
مسكته ، لقيت مكتوب عليه " انا خبطت عربيتك " ، و تحتيها اسم و رقم موبايل
انا قلت ده فيها رفرف ، اكصدام ، يمكن باب و انا مش واخدة بالى اصلا و لما نزلت مبصتش على العربية اساسا ، فضلت الف حوالين العربية الا انى الاقى حاجة ابدا
لحد ما لقيت خربوشة كده صغيرة اوىىىى فى الرفرف الامامى ، حتى مخدشتش الدهان بتاع العربية ، مسحتها بايدى كده و ملقتلهاش اثر اصلا و لا فى الصاج و لا اى حاجة
الفكرة ان كان ممكن الراجل ده ميقولش حاجة ، و انا كان ممكن ماخدش بالى ، بس فعلا كونه انه يعمل الحركة دى ، استجدعته جدا بجد لدرجة انى فكرت ابعتله رسالة شكر على حركة الرجولة دى ، من اول اليوم و انا عمالة بفكر ، هو لسه فى ناس كده ؟