شنطة الاسعاف و المثلث بتوع المرور

**M.Mekawy** · 30-07-2009 03:02 PM

لما رخصت العربية فى مرور مدينة نصر من فترة كدة , ادونا الشنطة و المثلث
قلت اصورهم و احطهم هنا عشان الناس تبقى عارفة شكلهم
-- ملحوظة--
المثلث اللى قعدوا يقولوا عليه مقاوم للاعاصير و الزلازل , و يوضع فى درجة حرارة 700 درجة ثم يبرد فى درجة حرارة - 100 و ميحصلوش حاجة, و يتحمل الرياح , و مقاوم للسحر و الشعوذة , طلع حتة بتاعة بلاستيك كدة لو عيل عطس جمبه هيتفك من بعضه , و كان عمال يتمرجح و يقع من اقل نسمة هوا

**A_H_M_A_D** · 30-07-2009 03:06 PM

المثلث بعيد كل البعد هو و الشنطة عن المواصفات الفنية الجهنمية اللي قعدوا يدوشونا بيها شهور

**bmw323** · 30-07-2009 03:07 PM

دا المثلث بتاع ألى بيتباع فى الأشارات برقبتة ههههههههههههههههههههههه
شكراا على الموضوع ياباشا

**M.Mekawy** · 30-07-2009 07:15 PM

اه و الشنطة اللى قالوا من الصلب المقاوم للاحماض و الصدمات و بتاع , طلعت برضه بتاعة كدة اى مقلمة عيل فى 5 ابتدائى انضف منها

**as01241** · 30-07-2009 07:24 PM

أنا كنت في مرور مدينة نصر برخص عربيتي من حوالي أسبوعين ولما روحت أسأل عن المثلث وشنطة الإسعافات إني المفروض أستلمها مجانا حسب قرار الوزير لقيت اللي واقف في الكشك بيقولي ده التسليم بيقى يوم الأحد والأربعاء الصبح من الساعة 7:00 للساعة 7:30 بس وغير كده اللي عاوز يشتري .....فطبعا الكلام ما يتردش عليه أساسا ........ يا جماعة ده لو كارفور عمل عرض هيعد أكتر من النص ساعة دي وبعدين بصراحة لما شوفتهم بجد لقيتهم حتى ما يستاهلوش إني أخدهم مجانا

**H.ibrahim** · 30-07-2009 07:52 PM

وانا رخصت عربيتى فى المعادى من يومين و لم اخذ اى شى من هذه الاشياء ( المثلث او الشنطة )- انا كنت عاوزهم علشان غلاسة الكماين فقط لاغير .

**M.Mekawy** · 30-07-2009 08:53 PM

المشاركة الأصلية كتبت بواسطة as01241

أنا كنت في مرور مدينة نصر برخص عربيتي من حوالي أسبوعين ولما روحت أسأل عن المثلث وشنطة الإسعافات إني المفروض أستلمها مجانا حسب قرار الوزير لقيت اللي واقف في الكشك بيقولي ده التسليم بيقى يوم الأحد والأربعاء الصبح من الساعة 7:00 للساعة 7:30 بس وغير كده اللي عاوز يشتري .....فطبعا الكلام ما يتردش عليه أساسا ........ يا جماعة ده لو كارفور عمل عرض هيعد أكتر من النص ساعة دي وبعدين بصراحة لما شوفتهم بجد لقيتهم حتى ما يستاهلوش إني أخدهم مجانا

حضرتك فعلا ده الطبيعى , لما كنت هناك قاللى تيجى الاربعاء او الاحد عشان تستلمهم , استلم بايه يا عم , قاللى بالرخصة , رحتله فعلا الاربعاء الصبح و خدتهم بالرخصة و مضانى على ايصال اهبل كدة و خلاص