العربية اتخبطتت وانا واقف فى الجراج !!!!!!!
عجب العجاب فى هذا الزمان انا عمرى والحمد لله بعد 15 سنه سواقه ما خبطت عربية ابدا وانا سايق دايما وهيا واقفة النهاردة على الصبح كنت فى مشوار مع اخويا عند مديرية امن اسكندرية واقف فى الموقف الى امام المديرية واخوايا راح يجيب طلب وانا فضلت مستنى جوا العربية اسمع الردايو شوية وسمعت صوت طخخخخخخخخخخخخخ ببص ورايا الاقى واحد بعربية نوبيرا بيرجع بضهره وخبط الباب اليمين ورا بالاكصدام بتاعه وطبقه لجوه نزلتله قعد يحلفلى انه مش قاصده قلتله ما انا عارف انه مش قاصدك بس انت مابتعرفش تسوق ولازم تدفع ثمن غلطتك لو انت عامل سواق بص فى المرايات وانت راجع او خش بوش العربية قالى اصل انا معنديش مرايات قولتله وانا ذنبى ايه انا واقف فى حالى لو كنا ماشيين على طريق حنقول قدر والحمد لله انها جت كده لكن انا واقف مكانى وفى جراج كمان قالى طيب انت عايز ايه قلتله من اتلف شىء فعليه اصلاحه انا عايز تكلفة اصلاح الخبطه قالى دى بـ 20 جنيه وترجع زى الاول قلتله ده فى الاحلام ليه انت فاكر نفسك فى زمن ابو بلاش ده الصاج اتطبق ووالبويه اتبهدلت شوف مصنعية السمكرى والبوهيجى والخامات كام قالى انا مش حدفع غير عشرين جنيه قلتله بينى وبينك مدرية الامن حخش اعمل محضر ونشوف بقه كلامك ولا كلامى الى حيمشى الراجل ارتبك وقالى الى انت عايزة قلتله اضعف الايمان 100 جنيه وربنا يعوض عليا فى الباقى راح مطلع الفلوس زى الباشا ومشى حسبى الله ونعم الوكيل على الفكرة الموضوع مش موضوع فلوس ولكن انا عايز اعرفه انا ممتلكات الناس مش لعبة واخبط واجرى كفاية القاعدة عند الصنايعية قمة القرف والملل وعدم الضمير
