10 مرفق
نيسان ليفينا . . . تقييمى المبدئى
انا استلمت العربية من حوالى 15 يوم وعاملة حوالى 1800 كيلو.
·المواصفات:
العربية نازلة مصر كاتيجورى واحده:1600 سى سى - اتوماتيك - 2 اير باج – ABS – EBD – BA – 4 جنوط سبور 15 (الاستبن عادى) – 4 زجاج كهرباء – كراسى خلفية قابلة للطى - فوانيس امامية هالوجين – فرش مضاد للماء – فوانيس شبورة أمامية وخلفية (الخلفية واحد شمال بس وانا عرفت انه بيبقى كده زى العربيات الالمانى بس بصراحة مش عارف ليه) – سينسور لاضاءه النور اوتوماتيك – باور كهرباء – مفتاح ذكى (سنتر + مانع لتشغيل المحرك) .
·البنزين:
-تانك العربية بيشيل 52 لتر. المفروض على اساس المكتوب على النت ان استهلاك البنزين يكون 7.2 لتر/100 كلم (يعنى 277.7 كيلو فى الصفيحة وانا عمرى ماسمعت ان فى عربية بتعمل كده فعلا على الاقل بالبنزين "المحترم عالى النقاء" اللى موجود فى مصر).
-انا الصفيحة عملت معايا على الطريق مرة 230 ومره 240 كيلو، بس جوه البلد عملت معايا مره 150 ومره 170 كيلو بس (التكييف شغال على طول صبح وليل).
·سحب العربية:
-رأييى الشخصى ان العربية سحبها جميل جداً وناعم جداً بالنسبة لعربية بالحجم ده. تأثيير التكييف على السحب ضئيل.
-مواصفات المحرك: (.6 petrol-engine that produces 80ｋW＠6000rpm and 153Nm＠4400rpm – بس بصراحه معرفش يعنى ايه.
-التسارع – على حسب اللى بيتقال على النت من 0-100 فى 11.2 ثانية.
·الوسع الداخلى:
-العربية واسعة جداً من جوه أوسع من التيريوس بس اقل شوية من الماتركس.
-خامات التابلوه والفرش عالية جداً – العربية بتنزل مصر بلون صالون واحد هو الاسود.
·الثبات:
-بصراحه انا ماجبتش بيها اكتر من 140 كلم/س بس لغايه السرعة دى العربية ماشية زى الفل، مابتحسش انك معدى الـ90، المنحنيات (العادية) انا باخدها على 100-110 من غير مشكله.
·التكييف:
أنا كنت سامع ان تكييف النيسان تلاجه بس انا بصراحه مش مقتنع بالتكييف اوى. هو التكييف حلو يعنى اللى راكب قدام مش بيلاقى مشكلة بس مش عارف ليه حاسس انه مش قد كده مع انه بالليل غالباً بعد العربية ماتمشى شويه باوطى التكييف من (2) إلى (1) بس برده مش عاجبنى.
·التقفيل:
التقفيل "الصينى" ممتاز وانا مش لاقى فيه عيوب ظاهره أو أى حاجه اقدر آخدها عليه.
·العيوب:
·العربية بصراحه زى الفل بس اللى باخده عليها:
-الكاسيت Audio CD.
-العربية لسه مش منتشره اوى فقطع الغيار مش متوفره عند ناس كتير (انا فى المنصورة ولفيت محلات قطع الغيار محل محل مفيش حاجه غير للنيسان الصنى).
-التكييف مش عاجبنى.
-البلاستك بتاع العدادات لما بتنضفه بأى حاجة بيتجرح ودى حاجة تنرفز بصراحه.
ودى شويه صور للعربية (غالبيتها من على النت - أنا عربيتى لونها نبيتى
[IMG]file:///C:/Users/Marmar/Desktop/New%20Folder/01_l.jpg[/IMG]
