الموضوع: نيسان ليفينا . . . تقييمى لمركز الخدمة المعتمد (الاتحاد):

لما قربت على الالف كيلو قلت استقرب واروح للاتحاد فى طنطا (انا من المنصورة) فكلمتهم وسألتهم بتعملوا صيانة للليفينا قالولى طبعاً، قلت كويس واهو مشوار صغير ومفيش حجز ولا خلافه وروحت راكب العربية ووصلت المركز حوالى الساعة 12.30 الظهر.

كان قدامى حوالى 4 عربيات 2 منهم صنى وواحده ربع نقل. الناس هناك بصراحه تعاملهم كويس بس المكان نفسه مش عاطفى بتحس انك فى ورشه ميكانيكى (نضيف شويه) مش فى مركز خدمه معتمد.

سألت المهندس بيعدى عليك ليفينا؟ قاللى عدى علينا حوالى 4-5 عربيات و7-8 عربيات سيلفى.

المهم كشفوا على العربية وغيروا الزيت (موبيل 10.000 كيلو والفلتر)، وقلتلهم التكييف مش عاجبنى راحو كشفوا عليه وقالولى مفيش تسريب أو اى حاجة بس كان فيه 455 جرام فريون وأخد حوالى 470 بس بصراحة مش لاقى فرق.

الحاجات اللى تحرق الدم:

(1)كمية زيت الموتور:

الراجل وهو بيغير الزيت (الفنى مش المهندس) قلتله العربية بتاخد كام لتر زيت قاللى 4 فرديت عليه مش كتير قاللى لأ هى المكنة كده زائد اننا مغيرين الفلتر. المهم قلت لنفسى اكيد هو عارف اكتر مع انى سامع ان الليفينا هى نفس مكنه التيدا وعمر التيدا ماتكون بتاخد 4 لتر.

المهم بعد كام يوم قلت اكشف على الزيت لقيته معدى المقاس بكتير فتحت الكتالوج وقريته لقيت مكتوب ان كمية الزيت 2.8 لتر من غير الفلتر و 3 لتر بالفلتر. طبعا اتحرق دمى وروحت ظبطت الزيت عن واحد ميكانيكى معرفة.

(2)الكشف بالكمبيوتر:

لما المهندس جه يكشف بالكمبيوتر ببص معاه على السوفت وير مالقتش الليفينا فى اللسته بتاعت البرنامج اساسا (شكله برنامج قديم ومحتاج تحديث) مع ان السيلفى موجوده. المهم سألته هو انتو بتعملو كشف بالكمبيوتر ازاى بقى؟ قاللى استنى هشوف المهندس التانى المهم جه الباشا وقاللى احنا بنختار السيلفى والكمبيوتر بيشوف العربية (شوف ازاى) المهم عرفت انهم بيشتغلونى وخلاص فسكت على أساس انها هتكون أول وآخر مره أروح لهم فيها.
(3)قطع الغيار:
- بالنسبة لفلتر الزيت هو نفسه بتاع الصنى والتيدا ودى حاجة كويسة.
- انا كنت ناوى اشترى تيل فرامل واخليه معايا فى العربية علشان لو اتزنقت له مش هلاقيه فى المنصورة فسألت المهندس التيل بكام؟ قعد يتوه فى الموضوع وقاللى انت مش هتحتاج تغيره قبل 20-25 ألف كيلو. المهم بعد شويه سألته نفس السؤال قاللى حوالى 400 جنيه (انا كنت سالت بالتليفون عند السبع قاللى 552 جنيه). المهم الواضح انه معندوش اى قطع غيار للعربية اساسا.

طيب ايه المشكلة لو كان قاللى احنا لسه مااشتغلناش فى العربية دى وعدى علينا فى صيانة الـ 5000 ويكونوا ظبطوا نفسهم بدل مايقعدوا يفتو ويبهدلو فى عربيات الناس؟مش عارف . حسبى الله ونعم الوكيل