وصلة كفر شكر وميت غمر (إهمال حكومي فادح )

انا مش قادر استوعب اللي شوفته في الطريق امبارح.

وصلتين
مدخل كفر شكر وانت جاي من ناحية بنها
ومدخل ميت غمر وانت جاي من ناحية كفر شكر

لو قلنا الطريق حفر يبقي بنبسط الأمور لو قلنا قنايات (بالفلاحي) ممكن نقرب الصوره
.

لو قلنا اهمال وغباء وتخلف يبقي أكيد نقصد الطريقين المذكورين.

المدخلين متدمرين نهائي

والله ولا كأنك بتعدي جسر في ارض زراعيه
.
والعربيات الواطيه بتتحشر في الرصيف. منظر بجد متخلف. عربيه محشوره عجلتين علي الارض وعجلتين في الهواء... انا كان نفسي اصور لكم المنظر لكن للأسف كنت مركز اني أعدي المنطقه المترهله دي من الاسفلت علشان عربيتي ماتدمرش من تحت.

كله كوم والطريق من كفر شكر لبنها كوم تاني.
3 سنين والطريق ده بيرصفوا فيه. ليه مش فاهم. 3سنين وراميين فيه الدبش وسايبينه.
(حرااااااااااااااام )
.
.

فين الحكومه. فين المحليات. فين هيئة الطرق. فين فين فين
.
والله حرام عليكم اللي بتعملوه فينا ده
.
اتقوا الله فينا
ده انت بتحصلوا (بلاش حاجه تانيه) أد كده من ضرايب وجمارك وتراخيص وتسجيل شهر عقاري ومخالفات
.
اتقوا الله فينا
.
حرااااااااااااااااااااااا ااااااااااااااام

والمسافة الكبيرة اللى لسة مترصفتش بين المنصورة وميت غمر
على ما اتذكر ان الطريق كلة اترصف فى اقل من شهرين
والمسافة دى حوالى 2 كيلو لسة طوب ابيض وعليها زفت سائل اسود
بقالها اكتر من سنة ومش عاوزين يعملوها
حاجة تنرفز

بالنسبه للوصله مابين كفر شكر وبنها بما انى مستخدم للطريق ده كل يوم فالوصله دى كوم والطريق كوم تانى .. يعنى افضل مثال للاهمال والسلبيه والاستهتار بحياه الناس اللى بيستخدموا الطريق ده .. الوصله دى اترصفت حوالى 3 مرات فى سنتين وكل مره اسؤ من اللى قبلها والظاهر ان البيه اللى ماسك مجلس مدينه كفر شكر مش حاسس بحاجه او شارب حاجه اصفره علشان مفيش اى تغيير فى هذا الاهمال .. لا وكمان اللى كان بيعدى على كمين (الصفين )ده فيها وقفه لمده سااعه علشان البهوات كانوا بيحطوا اسمنت مسلح بدل الاسفلت علشان التريلات ماتحفرش فى الاسفلت وقعد الطريق يستخدم حاره واحده لاكثر من 4 شهور فى الاتجاهين .. ولا حياه لمن تنادى ولا احساس بمعاناه الناس اللى رايحه جايه على الطريق
ياريت الاستاذ المبجل محافظ القليوبيه ينزل من مكتبه المكيف ويشوف الاهمال الرهيب اللى فى مدينه كفر شكر والاهمال الرهيب فى الطريق الزراعى عند مدخل طوخ للى جاى من القاهره عند بنزينه التعاون اللى فيها الاسفلت محفور حوالى نصف متر والعربيات بتعمل فيها حوادث جامده ومن كام يوم عربيه نقل محملم زلط اتقلبت فى الحته دى علشان السواق مكنش واخد باله وكان جاى بسرعه والعجل خبط فى الاسفلت المحفور ده وفقد السيطره على العربيه
ربنا ينتقم من كل واحد مهمل ومستهتر بارواح الناس اللى بتمشى على الطرق داخل البلد دى

انا عربيتى المساعدين بتاعتها باظت بسبب الطريق ده والله لانى عليه 4 مرات ف الاسبوع عليه العوض !!!!!!!!!!!!!!!!!!!!!!!!!!!!!!!!

انا دايما بستخدم الطريق من نزله طريق اسكندريه فى بنها لحد صهرجت الكبرى

كميه اهمال وتخلف مش معقوله بطول الطريق

بدايه من المطبات اللى بتظهر وتختفى بشكل عشوائى طول الوقت واللى منهم المطب اللى اتعمل وانت رايح بنها فى مدخل كفر شكر للاسف طرت من عليه فى مره بليل وانا ماشى 70 وكنت هدخل فى السور اللى بين الحارتين لولا ربنا سترها

اسفلت خشن جدا جدا جدا جدا لدرجه انى بحس ان الكاوتش اتبرى على ما بمشى الكام كيلو دول ده غير بقا الدوشه اللى بيعملها الاسفلت وبتجيب صداع مزمن

اهمال ملوش حل فى التكاتك اللى بتطلع من كل مكان برغم انه طريق سريع والعربيات النقل اللى بتحمل بأشكال واحجام غير طبيعيه

ربنا يكون فى عون الناس اللى بتستخدم الطريق ده يوميا