الموضوع: احتياطات صعود ونزور الكباري؟

اخى العزيز هذا الموضوع سهل خالص بس محتاج تقرأه بعناية وتجربه بهدوء وبدون عصبية اوشدة اعصاب وبحبة تركيز زيادة عن السواقة فى الارض المستوية وهو كالتالى :-

اولا بالنسبة لصعود المطالع او الكبارى وسوف نقسمه الى جزئين :

الجزء الاول لو الكوبرى فاضى والطريق ماشى وده مفهوش مشكلة كل اللى عليك انك تحاول تشد شوية قبل الكوبرى علشان تطلع الكوبرى والعربية مستريحة ومتريحش او تنخع منك ولو حسيت ان عزمها ضعف شوية فى المطلع ووصلت لاقل سرعة للغيار اللى انت عليه انزل للغيار التالى مباشرة وبسرعة ومتحاولش تدوس بنزين للغيار السابق لانها موش هتشد معاك طالما نوت تريح او تنخع مع انى كنت اسمع للامانة انك لو فى مطلع او كوبرى متحاولش تغيير للعربية لانها ممكن تفصل منك او تبطل وتريح على اللى وراك وانا شخصيا بغيير عادى خالص ومحصلش معايا اى مشكلة بس بخطف الغيار بسرعة شوية ولو لاقدر الله بطلت منك تماما تشد فرامل اليد ( ولو فرامل اليد ضعيفة ممكن تديها غيار ) علشان متريحش على اللى وراك لحد متدورها وتطلع بالسلامة

الجزء الثانى لو الكوبرى واقف والطريق زحمة وده علاجه انك تسيب مسافة امنه بينك وبين العربية التى امامك علشان ما يريحش عليك لو نسى او سهى عليه ولما تيجى تقف تربط العربية كويس بمعنى انك تفرملها كويس ودي ليها طريقتين كالتالى :

طريقة عادية وهى انك لما تيجى تقف تروح ممور العربية وشادد فرامل اليد - فرامل اليد وليس بدال الفرامل لانك لو اعتمدت على بدال الفرامل ففى لحظة ما ترفع رجلك من بدال الفرامل الى اكسلاتير البنزين عندما يمشى الكوبرى هتلاقى نفسك ريحت على اللى وراك وخبطته وممكن تكون خبطه جامدة لاقدر الله لو المطلع عالى شوية - يبقى الاعتماد على فرامل اليد ولما الطريق يمشى بتاخد الغيار الاول ثم تضع ايدك على فرامل اليد وتعمل الثلاث حاجات التالية مع بعض تدوس بنزين و ترفع رجلك من على الدبرياش و تنزل فرامل اليد وهكذا لما الكوبرى يقف تانى والبراعة انك لما تعمل الثلاث حاجات دول بدون ما تريح على اللى وراك 1 سم

طريقة روشة وجامدة شوية بس عاوزة تركيز اعلى عن الطريقة السابقة وهى انك تكون عارف نقطة الفصل بتاع الدبرياش بتاعك بمعنى انك وانت ماشى وشايف الكوبرى هيقف تروح ممور العربية وتدوس فرامل عادية علشان تقف برجلك اليمين عادى خالص لحد ما تقف وانت لسه دايس فرامل وتروح دايس دبرياش وتاخد الغيار الاول ورجلك لسه على الدبرياش وتسيب الفرامل بسرعة وتدوس بنزين سنه سنه وترفع رجلك من على الدبرياش سنه سنه لحد متوصل للحظة اللى تحس فيها ان العربية هتمشى للامام ( تحس فقط مش تمشى ) فى هذه اللحظة يجب تثبيت الوضع على ما هو عليه تفضل دايس دبرياش وبنزين عند نقطة الفصل هذه لحد ما الكوبرى يمشى تروح ماشى عادى وهكذا

وكلتا الطريقتين محتاجين منك تجربة فى مطلع كوبرى يكون فاضى تماما او حتى مطلع طريق لحد ما تتقنهم تماماً وهما على فكرة فى منتهى السهولة بس تجربهم كذا مرة وبصفة خاصة الطريقة الثانية محتاجة تجربة زيادة وتركيز زيادة

ثانيا بالنسبة للهبوط من المطالع او الكبارى وسوف نقسمه لجزئين ايضا :

الجزء الاول لو الكوبرى فاضى والطريق ماشى ودى سواقة عادية خالص كل اللى تاخده فى حسبانك ان قوة اندفاع السيارة فى النزول بتزيد من سرعتها وبالتالى لو عاوز تنزل على سرعة 60 كم مثلا تدوس بنزين يمشيك على سرعة 30 كم فى الارض المستوية وقوة اندفاع العربية هتوصلك لسرعة 60 كم وهكذا وبمعنى اخر يفضل انك تاخد يمينك وتنزل بالراحة وبشويش كده لحد ما تتعود على النزول الصح واصح نزول فى رأى الشخصى هو النزول على سرعة واطية لان سرعة العربية بتزيد طبيعى من المنحدر كما وضحت لسيادتك ومع هذه الزيادة بتضعف الفرامل فلو فوجئت بأى عارض بعد ما تنزل لاقدر الله ممكن متقدرش تفاديه من سرعة العربية وقوة اندفاعها

الجزء الثانى لو الكوبرى واقف والطريق زحمة ودى سواقة عادية خالص ايضا واسهل كمان وباستخدام الفرامل العادية او باستخدام فرامل اليد زى ما تحب كل اللى عليك انك تسيب مسافه امنه بينك وبين السيارة التى امامك ومتقفش على غفلة لان ممكن اللى وراك يلبس فيك وتكون ملاحظه كويس ده حتى فيه ناس مبتخدش غيار وهى نازلة وتسيب العربية تتدحرج بس ده غلط لان الغيار بيحكم العربية من الانحدار القوى الغير محسوب بمعنى انه بيحجم سرعتها لو مشى الطريق مرة واحدة .

ارجو ان اكون افدتك بخبراتى المتواضعة والموضوع متروك للتعليق لمن هم اجدر منى طبعا والله اعلى واعلم