صحيح التعليم المجاني هو إللي خرب الدنيا

**أحمد كمال** · 03-08-2009 01:16 AM

المشاركة الأصلية كتبت بواسطة zalpany2000

دكتور هشام
تحياتي علي الموضوع

عندي ردين مختصرين جدا جدا
الاول : نعيب زمننا والعيب فينا و ما لزماننا عيب سوانا

الثاني ؟؟؟ هل حضرتك مقتنع انه مع متوسط دخل الفرد في مصر اللي اقل من الاشخاص اللي بيحصلوا علي معونات من دولهم علي مستوي العالم .. مقارنة بما تنفق الاسرة المصرية علي التعليم ... هايفضل لسه فيه ماجنية للتعليم ؟؟؟!!!!1

أنا رأيي الوحيد.. ان إحنا لهثنا جامد قووي ورا التعليم الجامعية والتعليم العالي و مؤخرا بقي خريجي البلد يا اما تجارة يا اما اداب او زراعة (اللي احنا شكلنا هاننسي يعني ايه الكلمة دي كمان كام سنة)

و نسينا تماما معاهد التأهيل الفني و ال polytechnic و ان دي الطبقة اللي احنا فعلا النهاردة محتاجنها

استثمارنا في التعليم و في توزيع الكثافة البشرية المصرية علي العالم اصبح فاشل لاننا ببساطة مش قادرين نطور نظم تعليم متميزة تخلي الناس تقدر تطلع تنافس بره علي وظايف

لان لو سوق العمل محتاج 10 % مؤهلات عليا
عايز تحتهم 90% متوسطة و ان اختلت النسب فعلي الاقل نسبة المؤهلات المتوسطة المؤهلة صح هي اللي النهاردة مطلوبة

و بعدين مش المشكلة في المجانية في حد ذاتها لو هاسلم ان فيه مجانية،، المشكلة في عدم صرامة نظام التعليم .. يعني تعالي علي اي مدرسة ثانوي مثلا .. وشوف فيه كام طالب بيحضر 60 % من ايام الدراسة ؟؟ هل فيه حد بيتفصل ؟؟ طيب لو مدرس مادخلش الفصل غير حصتين في السنة ... قولي هايتحاسب ازاي؟؟؟

المشكلة في اختلال القيم.. اختلال الادارة ... فساد التنظيم... وفساد الهدف.

تحياتي
و أأسف للاطالة

ماهو كتر المؤهلات العليا ده اللي خلا الكاشيرات في كنتاكي و الامن في الشركات و بعض بتوع الدليفري بقوا بكالوريوس ..... بعد ما كانوا من عشرة و لا خمستاشر سنة دبلومات

ربنا يوفق الجميع

**Abo_Lina** · 03-08-2009 09:57 PM

السوءال هنا هل المنتج النهائي للتعليم المجاني ده جيد و على مستوى و قادر على إفادة البلد بما تعلمه و لا سيئ و زي قلته ?
الاجابة بصراحة بدون شعارات هيا الي تحدد مدى فشل أو نجاح التعليم المجاني

**zalpany2000** · 04-08-2009 11:28 AM

حسام زلباني كان عنده مشكلة في بنزين 92 من المنيا للقاهرة..سوف تعاني من الموضوع ده في طريق اسيوط الغربي وفي الفيوم وفي الوادي الجديد...خللينا نبص بعمق شوية في بلدنا وبلاش نبص على المدن والمراكز الرئيسية فقط.نبص على القرى والبنادر الصغيرة ونشيل من دماغنا الاسكندرية والمنصورة والمنيا عند الجامعة واسيوط المدينة واسوان على الكورنيش..ده طريق العريش بعد كوبري السلام مافيهوش غير بنزينة واحدة فيها 92 من بعد كوبري السلام لحد العريش..بس مش عايز موضوع البنزين ياخدنا خارج الموضوع الأساسي بتاع مجانية التعليم

يا دكتور هشام انت فكرتني بالحوار ده ... بس المشكلة مش في اننا نلاقي بنزين 92.. اجنا دورنا علي 95 مافيش .. 92 مافيش.. و احنا علي الطريق اضطرينا نحط بنزين 80 كمان في عربية مرسيدس c350 موديل 2008. لان البنزينة ماكنش فيها بنزين 90 حتي

فعلا عن ملاحظة كل ما بتبعد عن القاهرة .. فيه حاجات بتقل... في المقابل فيه حاجات بتزيد

طيب تعالوا نسحب الكلام علي موضوعنا

عن تجربتي الشخصية .. بفضل الله لفيت الجامعات المصرية كلها من اول جامعة جنوب الوادي.. جنوبا لحد جامعة اسكندرية شمالا.. و جامعة قناة السويس شرقا.

الملاحظة الاكثر وضوحا ان جامعات الاقاليم فيه حاجات كتير جدا ناقصاها.. مؤخرا مشروعات تطوير التعليم العالي بدات توصل شبكات اتصالات و فيديو كونفرانس و مكتبات رقمية و تعلم الكتروني.. وفيه تطور ملحوظ.. لكن لسه تحس انه فيه حاجه غلط.. فيه جزء ناقص مش مفهوم قووي.. انا من رأيي هي ان فيه مفهيم كتيرة لسه مزروعة في اقاليم مصر قريب.. ولسه ما بقيتش قوية.. أهمها علي الاطلاق التكنولوجيا .. مش انتشار آلات لأن ممكن تلاقي طفل في اولي ابتدائي في نجع جوه مركز شايل N95 ولا جايب PDA حتي.. هي الفكرة انه لسه بيقلد بس.. مش عارف ليه جهاز زي ده اتطور.. اللي انا اقصده حاجه شبيهه بده.. بمعني ان عندنا في الجامعات بقي فيه بنية أساسية و تحتيه لتطوير التعليم في الجامعات الاقليمية و لكن ناقص عاملين مهمين قووي .. الوقت .. اللي ممكن يترجم بعد كده لخبرة .. والعامل الاهم .. هو صلاح الفكر نفسه والرغبة في التطوير.

و علشان ما اتفهمش غلط . الموضوع مش كله عيوب .. الجامعات الاقليمية فيها مميزات كمان مهمة جدا.. الطلاب نفسهم -بنسبة كبيرة - عندهم روح الاصرار والتحدي و رغبة التفوق.. ويمكن كمان بيساعدهم قلة المشتتات و ان المجتمع هناك لسه فيه شوية خير من القيم بتاعته، اللي بتحترم العلم لانها مشتاقة ليه.. مش زي الطالب اللي في جامعات العاصمة ..

الميزة التانية اللي انا شفتها بمنتهي الامانة و اقف تحية اجلال لجامعات انا ما تخيلتش انها تكون بالمستوي ده .. زي جامعة اسيوط.. وجامعة المنصورة خصوصا طب وهندسة .. اهي جامعات اقليمية ولكن فعلا متطورة لاعلي درجة

النقطة الاخيرة بقي.. كل ما تبعد عن المركز .. هاتلاقي انخفاض في معدلات الدخل .. وده بينعكس علي قدرات الطلاب المادية بشكل أكيد... هل تفتكروا لو دوول اتلغي ليهم التعليم الشبه مجاني بتاعنا .. هايبقي قدامهم فرصة للتعليم العالي؟؟ طبعا مستحيل

أنا رأيي الخاص..
اعادة تقييم مؤسسات التعليم بالكامل
انشاء كليات تلبي احتياجات المجتمع الفعلية
الاهتمام بالمعاهد الفنية والتقنية ووضعها في الاولوية الاولي و التسويق لمثل هذه المعاهد بشكل ملائم... مش الواد تسأله انت بتدرس في ايه .. يبقي مكسوف ويتكلم بصوت هامس .. في معهد .. مش عارف ايه . ويقولك انا ادخل اي كليه ان شالله خدمة اجتماعية مش معهد
والاهم الادارة الحديدية لمنظومة التعليم علشان يبقي لاي حاجه أثر فعال..

مرة تانية اكرر شكري لفتح الموضوع ده.. ده فعلا اهم ناقوس لازم نهتم بيه.. لو كانت المركب ماشية علي خفيف الفترة اللي فاتت .. فهي قربت تقف خالص.. ولازم لينا احنا وقفة علشان ما نغرقش كلنا
شكرا دكتور هشام
و أسف للاطالة

**M.Mekawy** · 04-08-2009 07:22 PM

مع احترامى لكل الاراء
موضوع "لا مساس بالتعليم المجانى " , " لا مساس بأعداد المقبولين بالجامعات المصرية " , الى اخرة الاسطوانات المشروخة دى هى اللى جابت البلد 600 سنة ورا
لو اعلم 1000 صح احسن مليون مرة من انى أعلم 100000 اى كلام

**Abo_Lina** · 05-08-2009 08:47 PM

المشاركة الأصلية كتبت بواسطة m.mekawy

مع احترامى لكل الاراء
موضوع "لا مساس بالتعليم المجانى " , " لا مساس بأعداد المقبولين بالجامعات المصرية " , الى اخرة الاسطوانات المشروخة دى هى اللى جابت البلد 600 سنة ورا
لو اعلم 1000 صح احسن مليون مرة من انى أعلم 100000 اى كلام

فعلا بس الناس مش عاوزة تقف و تبص على الصورة بالكامل
لما يبقى خريج تجارة زي الفل و مابيعرفش يحط ٣ كلمات انجليزي على بعض طالع متخرج هايهبب ايه

و مش مشكلته او تقصير منه..اعداد مهولة من الطلبة تعني قلة الاهتمام الذي يحصل عليه كل طالب و العيال تنجح عشان نفضي مكان للي بعدهم و خلاص ..
سياسة تعليمية فاشلة

**mido_919** · 05-08-2009 09:09 PM

هوا احنا بس عايزين نصرف علي التعليم شويه هوا انتا عندك حق ان معظم بلاد العالم مفهاش حاجة اسمها مجانية تعليم بس في مثلا دولة زي فرنسا عندها جامعات حكومية والتعليم فيها باسعار رمزية بس التعليم عندهم تقريبا 30%من الموازنة مش 3% زي عندنا

**osoliman88** · 06-08-2009 10:42 AM

المشاركة الأصلية كتبت بواسطة sab3aawy

اشكرك بشدة على هذا الموضوع القيم

حتى لو اختلفت الأراء فى الأسلوب الأمثل للتعليم، لكن بالفعل التعليم هو الفارق الوحيد بين جامع القمامة وجراح المخ(مع تقديرنا لكل المهن الشريفة، لكن المقصد هنا هو فرق دقة المهنة وحرفيتها ووجاهتها)

العالم كله بنى حياته الاجتماعية على التعليم، وفى كل دول العالم المتحضر يوجد تعليم مجانى للفقراء فى المرحلة قبل الجامعية، وتعليم مجانى للمتفوقين فى كل كل المراحل وفى اكبر المؤسسات التعليمية، يعنى فى اكبر الدول الرأسماليه انت تدفع مالا للحصول على تعليم مميز لطفلك فى مؤسسة كبرى وباستخدام ادوات تعلمية متكلفة، لكن كونك لا تملك مالا لا يحرمك من حق تعليم ابنك تعليما اساسيا سواء فى مؤسسة حكومية او اجتماعية، واذا اثبت تفوقا يؤهله لأن يكون محلا لاستثمار المجتمع فى تعليمه فان العديد من المؤسسات التعليمية المتميزة تعطيه منح تفوق مجانية او شبه مجانية لاكمال تعليمه، وبالتالى فان التعليم المجانى ليس رفاهية لكنه ضرورة لافكاك منها بالنسبة للتعليم قبل الجامعى واستثمار اجتماعى مربح بالنسبة للمتفوقين (المؤسسة التى تكفل الطالب المتفوق بمنح دراسية ثم تقوم بتعيينه فانها تحافظ مستوى الكفاءات العالية فى طاقمها التدريسى، فيما يحافظ لها دائما على سمعة مرتفعة وسط المؤسسات المنافسة فى سوق يخضع للعرض والطلب كغيره من اسواق العمل)

[overline]
هذا الكلام سليم مليون الميه ولا خلاف عليه والكل يعلم ذلك تماما
ولكن لماذا لا يطبق على أرض الواقع
الاجابة سهلة جدا
وهي أن التعليم الجامعي والتجنيد من الأدوات التي تعتمد عليها الحكومات الفاشلة في تأجيل مشكلة البطالة ، وهذا الكلام أيضا معروف للكل
[/overline]