اشتري فيات ب 10 واظبطها بخمسة ولا اشتري واحده متوسطه بال 15 ... ؟!

**EmBaWe** · 02-08-2009 11:01 AM

السلام عليكم

عندي استفسار لو سمحتم

كنت عايز اشتري عربية

تنفعني في مصر

وامكانياتي في حدود ال 15.000 الف

فياريت ترشحوا لي واحده بالامكانيات ديه وتكون تستحمل شغل جامد

علشان ان شاء الله العربية هتعقد معايا مده لا تقل عن 7 سنين واحتمال اكثر بكثير ... !!

طبعا الحمد لله ... رضا على كل شيئ ... في ناس مش لاقيه تاكل ...

اللهم لك الحمد والشكر كما ينبغي لجلال وجهكك وعظيم سلطانك

المهم

طبعا في ناس رشوحوا لي الفيات 128 ( هل عندكم ترشيح افضل ام لا )

فانا كنت عايز استفسر عن

هل اجيب واحده مثلا ب 10.000 جنيه

واظبطها ب 5.000 حنيه

ولا اجيب واحده على طول حالتها متوسطه بسعر ال 15

ولا انتوا ايه رايكوا

ولو هجيب مثلا واحده ب 10 ايه الشروط الصحية اللي لازم تتوافر فيها ؟

وهل تكفي 5 الالاف لتظبيط وتعديل الفيات وجعلها جميله وفي صحة حلوة وممتازة وشكلها شبابي وفيها روشنة معقولة ؟

وما نصائحكم عند شراء سيارة عموما ... ؟

لي سؤال اخر :

ان لا افقهه شيئ تمام عن العربيات وعن اسماء الاجزاء بتاعتها واللذي منه

فهل هناك مواضيع تنصحوني اقراها

وهل هناك دورات تعلمني مثلا ان تعطلت العربية مني اثناء ما انا سايقها ... ايه

الاجراءات اللي المفروض اخدها ... ؟

لاني المفروض العربية جايبها توفر لي الوقت ... فخايف تعطلني وتاخر وقتي ...

واخر سؤال مهم جدا

هل صحيح في قانون جديد اسمه قانون الاحلال ينص على ان كل العربيات اللي اقل من سنة 85 المفروض هتتشال من السوق ولا لأ ؟

انا تقريبا اعرف ان فيه قانون الاحلال ولكن صيغته تقريبا غلط

ياريت حد يوضحلي الدنيا وينورها ليا

ربنا يبارك له ان شاء الله

في انتظار تعليقكم ورايكم

مع العلم اني اعتمد على الله ثم عليكم

والسلام خير ختام ... :)

**x_gomgom** · 02-08-2009 12:20 PM

انا كل اللي اقدر اقولهولك عشان متوهش 128 ب 10,000 يبقي اكيد فيها شغل... و احتمال تعدي ال5000
عشان تستريح هات حاجه ب 15000 حالتها نضيفه بدل البهدله و العك بتوع الصنايعيه (في مقوله سمعتها من سمسار قبل كده بيتقول اتغلب في باكو ولا اني اتغلب في عربيه)...
متجيبش حاجه رشه دواخل ولا تكون مكنتها خفيفه و لا تكون عفشتها ضايعه عشان الكلام دا بيصرف.. رش الدواخل دا دليل علي انها عامله حادثه جامده و خلي بالك من التاكسي القديم اللي اتقلب ملاكي و اتباع على اساس انه ملاكي...
بالنسبه لاحلال للملاكي من موديل 1980 و مش بالين انه اصلا هينفذوه و بصراحه احسن...
ارجو اني اكون افدت

**ahmed_esmail** · 02-08-2009 06:59 PM

على حسب الشغل
انا مثلا كان قدامى 128 موديل 77 حالتها جيده جدا عمرة موتور سمكرة ودوكو خارجى بيونير فتحه سقف وجنوط سبور
كان طالب 15 الف ودا كتير طبعا ع 77 بس خلصتها معاه على 11 الف لواحد جارنا وربنا يبارك له بجد مش تعباه خالص
يعنى انت مش حتجيب باكو بسكوت مش عارف شكله ازاى من جوه
ف ناس حتشوفها وتقول الحاله وترميك سعر وملكش دعوه بالسعر اللى حيحددهولك انت تشوف وتميز وتقرر
نصيحتى بلاش تجيب 128 ب 15 الف المستعمل مستعمل مهما عملت حيجى عليك يوم تصرف
يبقى تجيب ب 11 او 12 مشدوده ولو صرفت تصرف باكو واى حاجة طارئه لاا سمح الله يبقى ربنا يقويك

**EmBaWe** · 02-08-2009 07:02 PM

شكرا يا x_gomgom على ردك

بس ازاي اعرف انه كان تاكسي واتقلب ملاكي ... ؟؟

هل ده بيكون مكتوب في الورق ولا اي ... ؟؟

وشكرا ليك بجد وعلى رايك

__________

افيدوني بخبرتكم يا شباب ... اكيد في يوم كنتوا محتاجين مساعده ... :(

**ahmed1981** · 03-08-2009 12:06 AM

هات حاجة نظيفة جداً ب 15
وإشتري راحتك بالفلوس
لازم سمكري ثقة يكشف على السيارة عشان تتأكد من سلامة الشاسيه وحالة الجسم عموماً

وحط في دماغك:
99.5 % من البياعين كذابين وحرامية ونصابين ويرسمون على وجوههم سمات الملائكة
فلا تنخدع بطيبة أحدهم أو بوجه آخر

**x_gomgom** · 03-08-2009 12:47 AM

بص هي في كذا طريقه اولها المرور لو ليك حد في اداره التراخيص هيقولك كام مالك عدي عليها و هي كانت ملاكي من يوم ما اشتراها ولا كانت اجره...
في بقي الطرق التقليديه اللي هي لون الحوض... ابعد عن اللي الحوض بتاعها احمر فاتح لان معظم التاكسي دا لون السياره الاساسي (الكلام دا من فم سواق تاكسي هما بيفضلوا اللون دا عشان بيخلي الحوض منور!!)
و كمان انت لما تكشف عند سمكري خليه يشوفلك الرش ايه ظروفه (معلومه سواق التاكسي لما بيقلب مش بيحرق البويه القديمه بيرش عليها و غالبا بيكون الدهان ضعيف ف بيبان بيكشط اماكن معينه ب سكينه معجون بيطلع اللون القديم)..
و النصيحه الاهم ابعد عن اللونين الاسود و الكحلي بالذات..
و صدقني هما بيبانوا لوحديهم دلاقي عربيه شكلها كدا مش تمام و معلق نمر جديده...
دا من واقع تجارب شفتها قدامي و معلوماتي و يا ريت اللي عنده اي معلومه زياده يقول او يناقش الكلام دا عشان الافاده العامه...
يا رب اكون افدت