السلام عليكم ورحمه الله......

المقصود يا شباب من الموضوع..مجرد دردشه للوصول الى أفضل الوسائل للدفاع عن النفس فى حاله التعرض للهجوم سواء من لص أو قاطع طريق أو شخص غير سوى أو غير متزن أو غير واعى أو شخص فاقد للإدراك فى قمه الثوره مما قد يعرض أمنك وسلامتك الشخصيه للتهديد....

نوضح شويه......

نفترض إنك ماشى بالسياره ولظرف ما احتكيت بسواق ميكروباص او سواق تاكسى او نقل او حتى ملاكى.....

والموضوع تطور لإشتباك بالأيدى........واللسان.....

هتعمل إيه؟!!

هتحمى نفسك إزاى؟؟

فى مننا اللى هيقول دنا ولله الحمد أدغدغه....وأكسر عظمه وعربيته فوقيهم......

أقوله كلامك مش سليم.....لأكتر من سبب...

أولا ....ممكن تكون فرد واحد والشخص الاخر معاه اتين ولا تلاته يساعدوه يبقى انت كده شكرا...

ثانيا....إنت متضمنش تكون فى حاله جيده بدنيا...تدافع الادرينالين ممكن يصورلك إنك تقدر تخش فى حيطه تهدها...بس الحقيقه إنك راجع من الشغل مش قادر تشيل نفسك وبتزق نفسك للبيت زق...

ثالثا....لو الظروف مواتيه وانت تمام....وزى الفل....مع اول ضربه هتيجى للشخص الاخر فى مكان خطر (وجهه مثلا ) أو نقطه دم هتنزل منه هتلاقى نفسك مصاب بزهول ومش قادر ترفع إيدك وخايف عليه ليحصله حاجه وتبقى السبب والموضوع يكبر....(تجربه شخصيه..)

رابعا....متعرفش اللى قدامك ده الجنان هيوصل بيه لإيه؟....يعنى ممكن يكون معاه سلاح وخطر...وممكن لو كرامته اتهانت قدام زوجته او اولاده او حتى خطيبته تاخده الحميه ويدغدغلك العربيه......

خامسا...ضربته وكومته على الارض....وبعدين؟.....ضيعت اى حق ليك وكل الشهود هتشهد إنك مسكته ونزلت فيه ضرب وانه معملكش حاجه...حتى لو كان شايل سيف بيهدد بيه حياتك.....وهتبقى المفترى اللى بيتشطر على واحد قد ركبته......


حد تانى هيقول .....

أنا معايا سلف ديفنس....

طب سواء سلف ديفنس أو اليكتريك شوك......

يتجابوا منين؟

وهل فى مسئوليه على الشخص الحامل ليهم؟

وأيه الضرر اللى بيحصل للطرف التانى فى المشاده؟


يعنى لو وصل الامر إنى كهربت الشخص اللى بيهاجمنى لانى مش قادر على الاشتباك والصراع اليدوى...أو إن الشخص اللى بيتعرض للهجوم أنثى....وممكن يكون الهجوم مش بغرض الإيذاء البدنى ...ممكن يكون بغرض السرقه...أو التخريب.....أو أى سبب تانى!!!!!!

الشخص ده بقى هيحصله ايه؟!!
ياريت يجاوبنى شخص يكون جرب فعلا مش شخص سمع او عرف من حد........!!!

مهو مش معقوله يكون الجهاز ابو صوت رهيب ده يادوب بيلسع او بيكهرب زى صاعق الناموس مثلا....


حاجه تانيه.....

أيه من وجهه نظر كل واحد فينا أنسب طريقه أقدر أدافع بيها عن نفسى وسيارتى وارواح الركاب معايا ضد السرقه او التهجم....


حاجه أخيره.....

أيه رايكم فى ما أسميه بالاعمال الانتقاميه......


بمعنى.....

دلوقتى واحد جرحلك العربيه او ركن ركنه غبيه جنبك بتقول معلش بسيطه.....

لكن واحد خبطلك العربيه او كسرلك فانوس او اى حاجه من اللى تنرفز دى...(أعرف واحد لما اركن قدامه يكسرلى الهولدر بتاع ربر المساحات....يعنى يبوظلى فرده من المساحات .. )....


واحد زقلك العربيه بالديفندر بتاعه عشان يركن هو فى الظل وبهدلك الاكصدام خرابيش..ويا سلام لو شادد فرامل اليد..تلاقى الاكصدام متدمر....

محل خرملك الكاوتش عشان ركنت قدام باب المحل...


واحد كتبلك شتيمه على الزجاج بقلم الدوكو عشان ركنت مكانه....


ولد بهدلك العربيه ولما كلمت والده قلك ...معلش دى عيال...أبقى أركن بعيد شويه.....بمنتهى البرود.....


طبعا شوشو هيلعب فى دماغك......

اللى خربشلى الاكصدام هجيب مفتاح وابهدله الكبوت عشان يتحسر على عربيته

واللى خرملى الكاوتش هرميله طوبه محترمه على الفاترينه أو هفصل الكهرباء عن المحل من بواط النور... يصبح يلاقى أرضه كلها غرقانه ..على رأى محمود مرسى فى الفيلم.....والبضاعه بتاعته اللى فى التلاجه تفك تجميدها.....

واللى ابنه بهدلى العربيه هصبر عليه كام يوم واجيبله علبه زيت باكم وارميهاله على السقف عشان كل ما يبص على عربيته من البلكونه يتحسر.......


طبعا كل اللى فات ده انا معملتوش......


بس قلت أدينا بندردش........

خلاصه القول....

عشان امشى متطمن فى شوارع المحروسه....

أشترى اليكتريك وعلبه زيت باكم ومفك وشاكوش وطوبه فى شنطه العربيه؟

ولا أجيب للعربيه سيكيوريتى وبودى جارد؟

ولا أيه رأيكم؟

منتظر تجاربكم وإقتراحتكم........

تحياتى

أشرف فتحى