ابيع الجين 2 واقول انها زباله ولا لاءه

السلام عليكم ورحمة الله وبركاته

انا امتلك حين منذ فتره 2007 وحاساس ان السياره بدت تخرف هى الصناعه الماليزيه مش وحشه بس المشاكل اللى ظهرت فى السيارات كترت والناس دلوقتى كلها ملاك الجين 2 بيبيعو العربيات علشان
1- قطع غيلر غاليه
2- صيانة توكيل زباله
3- استهلاك بنزين عالى جدا
4- عيوب ظهرت فى الصناعه كتير مثل عربية شريف اللى بتاكل زيت
5- خساره جامده فى اعادة البيع

اظاهر كده ا العربيه دى مستقبلها كده فى الدمار بالرغم من انتشارها السريع لكتها دلوقتى بقت فى الارض وانزلوا اى سوق سيارات واسسالوا

فالذالك الواحد بيفكر يبيع بدل ما يورط نفسه اكثر من كده

والله يا باشا انا كنت بفكر ف الواجا بس انا كده قلقت!!!!!!!!!!

اقتباس:

---

المشاركة الأصلية كتبت بواسطة gold_777

السلام عليكم ورحمة الله وبركاته

انا امتلك حين منذ فتره 2007 وحاساس ان السياره بدت تخرف هى الصناعه الماليزيه مش وحشه بس المشاكل اللى ظهرت فى السيارات كترت والناس دلوقتى كلها ملاك الجين 2 بيبيعو العربيات علشان
1- قطع غيلر غاليه
2- صيانة توكيل زباله
3- استهلاك بنزين عالى جدا
4- عيوب ظهرت فى الصناعه كتير مثل عربية شريف اللى بتاكل زيت
5- خساره جامده فى اعادة البيع

اظاهر كده ا العربيه دى مستقبلها كده فى الدمار بالرغم من انتشارها السريع لكتها دلوقتى بقت فى الارض وانزلوا اى سوق سيارات واسسالوا

فالذالك الواحد بيفكر يبيع بدل ما يورط نفسه اكثر من كده

---

اولاً تحياتي لحضرتك

طبعاً انا شايف ان في تحامل علي العربيه ( طبعاً انا بتكلم من وجه نظري .... زي ما حضرتك بتشرح وجه نظرك )

وطبعاً انا حرد علي حضرتك في نقطه نقطه من الي حضرتك ذكرتهم

1- قطع غيلر غاليه (حضرتك دلوقتي في محلات مليانه قطع غيار بروتون في شارع دمشق و الجيزه غير المحلات الي شغاله في استعمال الخارج في الحرفين ... و طبعاً طبيعي يكون التوكيل غالي و مبالغ في ثمن القطع )

2- صيانة توكيل زباله ( المشكله دي مش مشكله فنين او مهندسين التوكيل يملك كوادر محترمه جداً لحل المشاكل و لكن المشكله تتلخص ان الامكانيات قليله بالنسبه لعدد الشغل وطبعاً دي ممكن تقلل من الجوده الصيانه و لكن انا شايف انهم عادين مش متميزين برغم وجود كوادر ممتازه ولي اكثر من تجربه تؤيد ذلك الكلام ولكن نحن لا نلتفت الي الشئ الكويس .... )

3- استهلاك بنزين عالى جدا ( اسمحلي اختلف معاك بشده العربيه استهلكها زي اي عربيه 1600 يعني متجيش مثلاً تشد بيها علي 5 او 6 ار بي ام و تقول العربيه بتاكل بنزين و لا شغال كيك داون و تقول البنزين انا شايف انها معدلها طبيعي جداً )

4- عيوب ظهرت فى الصناعه كتير مثل عربية شريف اللى بتاكل زيت (عيوب صناعه وارد حضرتك جداً ظهورها في اي عربيه و الحمد لله معانا في المنتدي ناس كسرا بالعربيه ال 60 الف كم و بسم الله ما شاء الله ربنا يبارك لهم زي الفل العربيه .... ارجو عدم التعميم )

5- خساره جامده فى اعادة البيع ( برده مع كامل احترامي ليك العربيه دي مثلاً ثمنها 90 الف جنيه مصري من يوم ما نزلت حضرتك عايز العربيه لما تكون 2007 او 2008 تتباع بكام و سعر الجديد ثابت ؟؟؟؟؟؟ )


علي فكره انا لا ادافع عن العربيه بشكل مستميت و لكن بحاول بقدر الامكان قول الحق و عدم تعميم الشئ و لكن انا اعرف و الكل يعرف ان هذه السياره تحتاج مجهود كبيييييييييييير من القائمين علي التوكيل للرقي بالماركه و لا اشكك ان التوكيل بينقصه اشياء مهمه لتكوين صوره افضل و لكن لن انسي ان مهندسي التوكيل يوجد علي هاكلهم حمل كبيييييييييييييير لايمكن الاستهتار بيه و لكن حمل كبير + امكانيات ضعيفه = نتيجه غير مرغوب فيها للعميل

وهي دي مشكله عز العرب

تحياتي

السلام عليكم ورحمة الله وبركاته

حضرتك انا مش فاهم بالظبط العنوان معناه ايه (تبيعها وتقول انها زباله ولا لا!!!!!!!؟؟؟؟؟؟ ) هو اى حد بيبيع عربيته لازم يقول انها زباله ؟طب ولو لازم كده حضرتك بتاخد راينا ليه حضرتك ممكن تقول انها زباله او جيلاتى حتى حضرتك حر مش محتاج مشورة حد تانى وفيه حاجه تانيه كلامك كله عام يعنى محدش عرف ايه بالظبط المشاكل اللى فى عربيتك ياريت نعرف ايه المشاكل اللى فيها او التخريف اللى فيها واتحل ولا لا عشان نعرف التجربه بتاعتك ونستفيد ولو حد يقدر يساعدك يقوم بالواجب خاصة ان معانا ناس هنا العربيه معاهم من ساعة ما نزلت مصر وما شاء الله لا شفناهم عاوزين يبيعوا او بيشتموا فى العربيه بل بالعكس بيشكروا فيها ومش ناويين يغيروا الا لبروتون برضه

اما بالنسبه للنقط اللى حضرتك بتاخدها على الجين اظن المهندس مؤمن رد عليها بشكل وافى وبحياديه فياريت حضرتك تكلمنا عن تجربتك بشكل خاص عشان تبقى الاستفاده اكبر وشكرا

سلامى للجميع

العربيه قطع غيارها غاليه ازاى....دى منتشرة جدا

السلام عليكم ورحمة الله وبركاته

بالنسبه حضرتك لقطع الغيار انا مش شايف اناها غاليه خالص بالنسبه للسيارات الجديده يعني مثلا العربيه من اول مانزلت
ثمن الكشاف الأمامي 600 جنيه مصري لاغير بالرغم من الألنترا الشكل القديم اول منزلت الكشاف الأمامي كان 900 جنيه
طبعا احنا بنتكلم عن الأسعار بره التوكيل عندك التيل من اول مانزلت السياره كان بحوالي 400 تقريبا في التوكيل بالرغم من
الانسر 2007 كان ب 550 الأمامي فقط تمن التيل دلوقتي في الجين بره 200 جنيه والانسر زي ماهوا
وانا بصراحه مشيت مع الانسر الجديد والقديم بالعربيه الجين وكلتهم في المشي كان الكلام ده علي الدائري

بيعها يا باشا من غير ما تاخد راينا !!!!!!!!!!!؟؟؟؟؟؟؟!!!!!!!!

أتفاق تام مع مداخلة المهندس مؤمن و الأستاذ أحمد فتحي .
حضرتك لم تحدد أيه مشكلتك بالظبط ؟؟

هو كل لما واحد تظهر عنده مشكلة نخاف و نكش كدا ......... أحنا منعرفش ظروف سواقة كل واحد أيه ؟؟؟؟؟

عاوز تبيع (بيع يا عواد)
لكن متقولش عليها زباله ( عشان العربيه دي بالذات مش زباله )
اقرأ عنها كويس اوي وحل مشاكلها بتروي ودلعها هتدلعك
( زي اي عربيه لما يمر عليها زمن وتستهلك كتير هتلاقي فيها مشاكل وهتلاقيها بتنحصر في قطع الغيار او مشاكل التقفيل في الموديلات القديمه وليها حلول كتير ( اسأل واعرف واتعلم ) )
ومش هتبيع ولا هتقول زباله
شكرا

وعليكم السلام ورحمة الله وبركاته

اولا ... فين الناس اللى بتبيع عربياتها دووول ؟؟؟؟؟؟؟؟؟؟؟!!!!!!!

انا دايخ بقالى شهر عاوز 2 جين مستعمل ومش لاقى

--------
1- قطع غيلر غاليه

اولا - قطع الغيار متوفره برا التوكيل كتير .... ورخيصه جدا .... والتوكيل مش بيمنع حد انو يركب برا ... وكمان ممكن تجيب القطعه من برا وتركبها فى التوكيل ..

ثانيا - حضرتك بتقول غاليه على اساس انك بتقارنها بقطع غيار الـ 128 والزاستافا مثلا ؟؟؟؟http://i173.photobucket.com/albums/w...ys/th_e055.gif

-----

2- صيانة توكيل زباله

زى ما ا/مؤمن اتفضل وقال ...

-----

3- استهلاك بنزين عالى جدا

ياريت تقولنا معدل الاستهلاك عندك كام عشان نقدر نحكم ان فى مشكله ولا لا ؟؟؟؟

-----

4- عيوب ظهرت فى الصناعه كتير مثل عربية شريف اللى بتاكل زيت

عربيه ا/شريف ... حاله خاصه ... وهل حضرتك تعرف تفاصيل قصه ا/شريف عشان تاخدها كمثال ؟؟؟؟؟

الراجل ذات نفسه عارف ان مشكلته نادره ... ولا يمكن ان حد ياخدها مقياس لتحديد مستوى العربيه

-----

5- خساره جامده فى اعادة البيع

اولا تمن السياره 90000 .... واسعار مو 2006 , 2007 بتترواح مابين الــ 65 والـ 75

يعنى 20000 فى 3 او 4 سنين استهلاك ... مش الخساره الجامده

وياريت باردوا تلقى نظره على اسعار اعاده البيع للسيارات الفرنساوى فى مصر(على سبيل المثال)

وعمر ماكان سعر اعاده البيع عامل اساسى بيحدد قوة ومستوى كفاءه العربيه (وخصوصا فى مصر)

---------

لو حبيت تبيع العربيه ياريت تقولنا على بيانتها وان شاء الله عندى اللى يشتريها

وربنا يباركلك فى بيعها

تحيــــــــــــــــــــــ ـــــاتــــــــــــى

انا متهيالى ان ده كلام فى الهواء حد بيقول اى حاجه ... مع احترامى :H_angry[1]: اتفق مع الاخوه فى كل الكلام الى قالوه :hlopaet_prv: وليه اول مره يشارك معانا ؟؟؟؟!!!!!! مع ان عنده مشاكل وممكن نساعده او يحكى المشاكل ونشوف ونعرف التوكيل عمل معاه ايه مش كلام عن مالكى العربيه اخرين وعن تجاربهم ... :44: مافيش فايده العربيه لازم تتحارب عشان طبعا مبيعاتها من غير دعايه نهائيا زى باقى العربيات المعروفه ومازال لها اعلانات ودعايه ودعم :B4_592:
ربنا يهدى

الموضوع يستحق التصعيد

العربية دى كانت معايا من 2007 الى 2009 ولما بعتها و اشتريت نيسان تيدا والله انا مع احترامى الكامل للنيسان لكن انا ندمان اشد الندم على البيع لانها وانا مازلت مصر عربية مميزة بس عايزة عناية منك يعنى تهتم هى هتديك زى ما تحب ولا اتذكر اى موقف حصل معايا طول الفترة دى يكون بايخ او دقة نقص زى ما بيقولوا
وانا فعلا ارفض كلمة عربية زبالة دى

اقتباس:

---

المشاركة الأصلية كتبت بواسطة total_n76

العربية دى كانت معايا من 2007 الى 2009 ولما بعتها و اشتريت نيسان تيدا والله انا مع احترامى الكامل للنيسان لكن انا ندمان اشد الندم على البيع لانها وانا مازلت مصر عربية مميزة بس عايزة عناية منك يعنى تهتم هى هتديك زى ما تحب ولا اتذكر اى موقف حصل معايا طول الفترة دى يكون بايخ او دقة نقص زى ما بيقولوا
وانا فعلا ارفض كلمة عربية زبالة دى

---

والله إنت راجل محترم وحيادى

انا بحب جدا العربية دة لكن خايف انى اجيبها عشان توكيلها لكن هى فعلا عربية ممتازة فى امكانيتها وشكلها التحفة

اة لو كل واحد خايف يجيب عربية علشان خاطر التوكيل اللى لو يعرف قيمتها بجد يرفع سعرها
وبعدين ما توكيل الهنداى اسمع انه تعبان جدا و دة اللى سمعته لكن منتشر فى مصر
عارف اية مشكلتنا فى مصر كلها ان احنا ماشين بمبدأ الى نعرفه احلى من اللى ما نعرفهوش
انا حجزت العربية وهجيبها يعنى هجيبها وانا هعتبر نفسى ما قريتش حاجة من اللى انت كتبته علشان توبيك تعبان جدا
وبصراحة انا مفهمتش انت عايز اية مننا

يا ريت لو تقول المشاكل اللى حضرتك اتعرضتلها شخصيا فى عربيتك
مش عربيه حد تانى ............
وليه مشفناش مداخلات حضرتك لما كانت المشاكل موجوده!!!!!!!!!!!
ممكن كنا قدرنا نحلها معاك !!!!!!!!!!!!!!!!
لكن ياريت ماتبالغش لدرجة ( زباله ) دى
لان العربيه ما شاء الله عليها ممتازه جدا بالامكانيات اللى فيها مقابل سعر خرافى
ولو بتتكلم عن سعر اعادة البيع مكنش حد اشترى الهوندا او الستروين او او او......وكلها عربيات لا غبار عليها
وفى النهايه بتمنى لك النجاح فى بيع عربيتك ويكون حظك كويس مع اى موديل اخر

اقتباس:

---

المشاركة الأصلية كتبت بواسطة tutankhamoun

أتفاق تام مع مداخلة المهندس مؤمن و الأستاذ أحمد فتحي .
حضرتك لم تحدد أيه مشكلتك بالظبط ؟؟

هو كل لما واحد تظهر عنده مشكلة نخاف و نكش كدا ......... أحنا منعرفش ظروف سواقة كل واحد أيه ؟؟؟؟؟

---

السلام عليكم
أولا أنا أحب أحي أستاذ توت على السطر اللي رد بيه ولخص بيه كل اللي ممكن يتقال ورغم ردود باقي الأعضاء اللي كانت قاطعة بردو لكن الجملة دي يا جماعة هي مربط الفرس زي ما بيقولوا .....سواقة كل واحد ؟؟؟؟؟؟ ومع إحترامي للأخ صاحب الموضوع العربية مع حضرتك من 2007 يعني بقالها سنتين وهنا سؤال أستاذ توت في محله ؟؟؟؟ لأن في كتير معاهم العربية بردو نفس الموديل وماشاء الله ربنا يباركلهم فيها ماعندهمش أي مشاكل والكلام ده يا جماعة يشمل كل أنواع العربيات مش بس جين أنا بشوف لانسر 2007 وأقول ماشاء الله ربنا يبارك لإن صاحبها حاططها في عينيه وأشوف أختها نفس الموديل وأقول لا حول ولا قوة إلا بالله هو مش دافع فيها فلوس دي؟؟؟ وهكذا الإلانترا وغيرهم وحتى ال 128 ينطبق عليها نفس الكلام , وعلى كل حال ربنا يوفقك في بيعها بس نصيحة يعني أسلوب حضرتك ده في الكلام عن العربية هو اللي ممكن يخليك تخسر في بيعها .
وشكرا

واضح ان العيب عند حضرتك مش فى العربية

فى طريقة السواقة

هو صاحب الفرح راح فين

وبعدين فكرتني بواحد كان كاتب يافطه علي عربيته النوبيرا وبيقول بيبيعها لكثرة اعطالها وتوكيلها السيء

طيب تفتكر حد حيشتري منك لو انت جاد في عرض الشراء

الجواب رغم اللي قولته ظهر هنا اكتر من مشتري وراضيين ياتري عايز تبيع بجد ولا بتعمل فرقعه لحاجه في نفس يعقوب

مع احترامي البالغ لصاحب الموضوع واتمني الا يفهم حديثي بشكل خاطئ

اولا لست املك اي سيارة بروتون لادافع عنها

ثانيا ليست في نيتي شراءها

لكن بدأت الحظ ان المنتدي اصبح ساحة للضرب من تحت الحزام بين ماركات السيارات المختلفة !!!
خاصة السيارات الناجحة و التي يوجد اعضاء في المنتدي يقدمون خدمات حقيقية في الواقع لانجاحها و هذا غير معيب علي الاطلاق علي العكس هو مفيد للطرفين

وهذا الهجوم يأتي من اعضاء تكون اولي مشاركاتهم هو الشتم واللعن في السيارةوالتوكيل ...""ايا كان التوكيل اوماركة السيارة"

هل نستطيع ان نقول ان اصحاب التوكيلات في مصر فطنوا اخيرا الي اهمية نايل موتورز؟!


اما من ناحية السيارة فلدي خالي سيارة جين 2 منذ عام تقريبا اسبوعيا سفر من بني سويف الي العريش و لم تكل وماشاء الله لا قوة الا بالله ودائما يشكر فيها علما بأن قيادته رياضية لابعد الحدود و قاد الكثير و الكثير من السيارات خلال 20 عاما قضاها بالسعودية

لذا اتمني ان ننتبه لمثل هذه الامور وان يحصل كل منا علي معلومات اكيدة من اكثر من مصدر قبل ان يقدم علي شراء سيارة او ينوي التراجع عن شراء سيارة

واخيرا اكرر اتمني ان لا يفهم صاحب الموضوع كلامي بشكل خاطئ فأنا لا اقصده تحديدا انما اقصد ظاهرة لاحظتها و بالصدفة كتبت عنها في هذا الموضوع

كبار المنتدى ردو عليك فى كل حاجة وتقريبا مسبوش حاجة ممكن تتقال ولو لسة مصر تبيع ربنا يوفقق

بصراحه يجماعه انا مش بروتوناوي بس انا بعشق العربيه من اول يوم نزلت فيه مصر
شفتها فصيف من كذا سنه مع واحد وكانت الكامله تماما بالعتب وبكل حاجه
وعجبتني اوي وبحبها اوي وناوي لما ابيع اللانسر باذن الله اشتري بروتون جين تو اوتوماتيك كامله لاني شفت انها عريه بحبها
وشبابيه
ومشاكلها كلها تقفيل وبتروح فالصيانات الدوريه وشايف ان اجمد عربيه لاحلا سعر بصراحه ربنا يوفقني وابيع واجيب بروتون بقا

انا شايف من خلال مروري على اول 10 صفحات فالمنتدي هنا
انها بصراحه عربيه جامده والناس كلها بتجمع على انها رائعه وانا مش مستني حد بصراحه يقولي لاني مقتنع تماما بيها

وملقيتش غير دي اول مشاركه واول موضوع بيشتم فالبروتون بصراحه
وحاسس انك متحامل على العربيه وظروفك هياه الي عملت كده سواء كان من البلد الي انت عايش فيها او طريقه سواقتك واخمن انك معاك مانيوال

بصراحه رايك يحترم بس انا مش مقتنع بالكلام الي قلته ولسه حابب العربيه

عارف انكم هتحسوا اني بتحامل عليك وبدافع قوي بس لياه حق بجد وربنا يباركلك سواء هتبيع او هتخليها

اقتباس:

---

المشاركة الأصلية كتبت بواسطة gold_777

السلام عليكم ورحمة الله وبركاته

انا امتلك حين منذ فتره 2007 وحاساس ان السياره بدت تخرف هى الصناعه الماليزيه مش وحشه بس المشاكل اللى ظهرت فى السيارات كترت والناس دلوقتى كلها ملاك الجين 2 بيبيعو العربيات علشان
1- قطع غيلر غاليه
2- صيانة توكيل زباله
3- استهلاك بنزين عالى جدا
4- عيوب ظهرت فى الصناعه كتير مثل عربية شريف اللى بتاكل زيت
5- خساره جامده فى اعادة البيع

اظاهر كده ا العربيه دى مستقبلها كده فى الدمار بالرغم من انتشارها السريع لكتها دلوقتى بقت فى الارض وانزلوا اى سوق سيارات واسسالوا

فالذالك الواحد بيفكر يبيع بدل ما يورط نفسه اكثر من كده

---

انا هقدر ارود عليك فى نقطتين علشان دول اللى اتعرضتلهم

* بالنسبه لاستهلاك البنزين انا عربيتى مانيوال ( فى الطوالى بالتكييف 270 كم/الصفيحه - فى البلد 220 كم/الصفيحه) وبيتهيألى الأستهلاك ده مناسب جدا لعربيه 1600 سى سى

* بالنسبه للعيوب فعلا فى عيوب تقفيل بسيطه زى زرار فى المالتى فنكشن بيعلق ... صوت تزييق بسيط جدا بيبان فى الأماكن المكسره ...وهكذا بمعنى اخر حاجات مبتأثرش على اداء العربيه اللى اديله جيد جدا من وجهه نظرى ومتجيش حاجه جنب المميزات العديده الموجوده فيها وبالذات ثباتها على السرعات العاليه ... ولو بنتكلم على العيوب الفرديه فياريت تطلعلى موديل سياره مظهرش فيه عيوب فرديه فادحه

ومستنيين رد حضرتك الموضوعى اللى يثبتلنا ان حضرتك عندك العربيه فعلا ... ولا ده كان كرسى فى الكلوب

ملحوظه هامه .... وانا بعمل رد باقتباس دوست بالخطأ على زر شكرا اسف لهذا الخطأ الفادح

السلام عليكم
اولا نشكركم لحسن اهتمامكم بالموضوع وجزاكم الله خير
المشكله حضراتكم اولا انا كنت راكب قبل الجين عربيتين بيجو 405 2000 سس وموديل 2000 وانجكشن ماشى داخل المدينه مش بتاكل الاكل ده فى البنزين وقبليها كان معايا تويوتا كورولا 1300 سىسى طبعا انا فاهم الفرق بين البيجو والتويوتا والجين من حيث كل حاجه الحمدالله انا بركب عربيات من سن 12 سنه وانا دلوقتى 32 وعلى فكره برده بالنسبه لعربية شريف شلريف ده صاحبى وانا عارف المشكله بتاحته من الالف الى الياء لانه قبل ما يروح التوكيل انا وهو رحنا مركز صيانه وفكينا وش الموتور وقسنا الكبس بتاع العربيه وكان مظبوط يعتى انا غندى خلفيه جامده عن العربيه وقارى برده عنها كتير بس كنت لسه مجربتش

انا عندى اسنهلاك البنزين عالى جدا ازاى العربيه داخل المدينه فى المطبات والتكيف شغال انا ماشى حوالى 43 ك . م واستهلكت حوالى 20 لتر بالظبط العلامه فى المنتصف
وخارج المدينه انا بمشى بسرعات مختلفه ازاى
2.5 ار بى ام والسرعه ىلا تزيد عن التسعين بتاخد فى 100 ك. م 16 لتر
السرغات العاليه طبعا اعلى زى انا كنت ماشى على الدولى 200 طبعا كان الاستهلاك لازم انا عارف يبقى عالى لان طبعا عد لفات الموتور بتزيد وبالتالى الاستهلاك بيزيد يعنى انا اقصد كده العربيه بتستهلك بنزين كتير مقارنه بسيارات اخرى


ثانيا اما بالنسبه للتاس اللى بدت تبيع حضرتك تصفح كل يوم كونتكت كار وكايرو كار ... وانت تعرف ..

وعموما ادى بياناتها

العربيه موديل 2007

لونها اسود

فبريكه بره وجوه

57000 ك.م

ترخيص العتبه

نهاية الترخيص 4/2010
فرش جلد ريكاردو
مطلوب انشاء الله من الاخر 64000ج.م


والسلام عليكم ورجحمة الله وبركاته

السلام عليكم ورحمه الله وبركاته

نشكركم لحسن اهتمامكم بالموضع واحب ان اوضح لكم بعض الاشياء

اولا انا كان عندى قبلها سيارتين تويوتا وبيجو و

وكان الاستهلاك البنزين عادى فى الاثنين باللرغم من ان البيجو 2000 سى سى

الا ان الاستهلاك كان مظبوط انما فى الجين انا حاسس ان استهلاكها عالى بالنسبه للسيارات الاخرى
انا هقول وانتو احكموا على المزضوع

التجربه الاولى : - 2.5 ار بى ام 90 ك/م/ س ........ ..... . . استهلاك 100 ك.م. 16 لتر

التجربه التانيه : 6 ار بى ام 200 ك/م/س/ ......... استهلاك 100 ك.م. 20

التجربه الثالثه داخل المدينه 42 ك.م 20 لتر

عموما العربيه بياناتها كالاتى :-
السياره فبريكه بره وجوه
2007
اسود
57500 ك.م
فرش جلد ريكاردو

الغفشه تمام اوى
المطلوب 64000 ج .م

والسلام عليكم

طيب جميل ....... يعني أنت كل مشكلتك في أستهلاك البنزين .
بس سؤال بقى

أنت ليه عممت تجربتك أو مشكلتك و محسسنا ان الجين 2 كله بيعمل كدا ؟؟؟؟
مع أن فيه ناس كتيرة دخلت و قالت على الأستهلاك بتاعها و ده أقل بكتير من الأستهلاك اللي أنت كاتبه .

العادي بتاع العربية
10 لتر لكل 100 كم داخل البلد في الزحمة بالتكييف
و من 12 إلى 14 لتر لكل 100 كم أو أأكثر على الطرق السريعة

يعني واضح أن أنت عندك مشكلة فردية ممكن تكون ناتجة عن طريقة سواقة ( حرق و جري على سرعات عالية ) ....... بنزينة مش نظيفة بنزينها أثر على الرشاشات و أتسدت سداد جزئي مما يزيد أو يرفع الأستهلاك ......... مشكلة في فلتر البنزين .....
يعني المشكلة بتاعتك دي مشكلة ممكن تظهر في أي عربية مهما كان ماركتها ....

السؤال هنا ............. ليه حضرتك ما فتحتش موضوع في الورشة و تشوف الناس الخبيرة في الميكانيا تفكر معاك بصوت عالي بدل موضوع زبالة !!!!!
و لا أيه ؟

بالنسبة للشق التاني و ه موضوع اعادة البيع
طيب ما مواقع بيع السيارات مليانة
هوندا سيفيك موديلات حديثة
تويوتا كورولا و تويوتا ياريس
و ماركات تانية حديثة

هو لازم اللي يبيع يكون عنده مشكلة ؟؟؟؟؟؟؟؟؟

ناس كتيرة بتبيع علشان التغيير مش أكتر
و ناس تانية بتبيع علشان مزنوق في فلوس
و ناس بتبيع علشان عندها مشاكل ....

ارجو الإفادة عن اماكن بيع قطع غيار ثانية غير التوكيل

شكرا لتعاونكم

اقتباس:

---

المشاركة الأصلية كتبت بواسطة tutankhamoun

طيب جميل ....... يعني أنت كل مشكلتك في أستهلاك البنزين .
بس سؤال بقى

أنت ليه عممت تجربتك أو مشكلتك و محسسنا ان الجين 2 كله بيعمل كدا ؟؟؟؟
مع أن فيه ناس كتيرة دخلت و قالت على الأستهلاك بتاعها و ده أقل بكتير من الأستهلاك اللي أنت كاتبه .

العادي بتاع العربية
10 لتر لكل 100 كم داخل البلد في الزحمة بالتكييف
و من 12 إلى 14 لتر لكل 100 كم أو أأكثر على الطرق السريعة

يعني واضح أن أنت عندك مشكلة فردية ممكن تكون ناتجة عن طريقة سواقة ( حرق و جري على سرعات عالية ) ....... بنزينة مش نظيفة بنزينها أثر على الرشاشات و أتسدت سداد جزئي مما يزيد أو يرفع الأستهلاك ......... مشكلة في فلتر البنزين .....
يعني المشكلة بتاعتك دي مشكلة ممكن تظهر في أي عربية مهما كان ماركتها ....

السؤال هنا ............. ليه حضرتك ما فتحتش موضوع في الورشة و تشوف الناس الخبيرة في الميكانيا تفكر معاك بصوت عالي بدل موضوع زبالة !!!!!
و لا أيه ؟

---

و تعقيبا علي كلام استاذ توت فيه كذا حاجه مش واضحه في الموضوع
١- حضرتك بتقول انها موديل 2007 طب انت المالك الاول ولا رقم كام و لو انت مش الاول طب اشترتها من امتي
٢- هل عيب استهلاك البنزين ده من يوم ما اشترتها و لا من امتي بالظبط
٣- ايه بالظبط الاجراءات اللي اتخذتها عشان تصلح عربيتك يعني اخدتها التوكيل ولا لا ولو اخدتها عملوا فيها ايه بالظبط احنا حقيقي عاوزين نستفيد بالتجربه ولو ما ودتهاش التوكيل عملت ايه بالظبط
٤- لو محدش حل لك المشكله في التوكيل ليه ما عرضتهاش علي الماليزيين او ما صعدتش الموضوع طالما انت شايف ان معاك الحق وعملت اللي عليك مع العربيه
مستنيين من حضرتك شوية التوضيحات دي يمكن حد يقدر يساعدك في بيعها او اصلاحها
سلامي لجميع

اقتباس:

---

بتاخد فى 100 ك. م 16 لتر

---

استهلاكك اصلا مش طبيعي وعربيتك فيها مشكلة طبعا !!!!!!!!!!!!!

بس انتا ليه محاولتش تحل الكلام دا من الاول يعني؟

ايه هو اللى 16 لتر فى 100 كيلو....

يعنى تسافر اسكندريه..ب 40 لتر رايح بس دة لو فرضنا ان اللكس 250 ك...

اكيد فى غلط