الموضوع: (السيارات بين الماضي و الحاضر)__ارجو مشاركة جميع الاعضاء

لما نفكر في الاسئلة الي بنسألها قبل ما نجيب العربيه حاليا هناقيها بتختلف كثيراا عن الماضي و ده مثل : -1) زمان كان الواحد بيسأل هي العربيه فيها ازاز كهرباء و لا لأ دلوقت بيسأل هو الازاز الكهرباء اوتومانيك (تاتش) و لا عادي و فيه وحدات رفع ولا لأ.
2) زمان كان الواحد بيسأل العربيه فيها تكييف و لا لأ دلوقت بيسأل العربيه تكيفها قوي و لا لأ و اوتوماتيك ولا عادي و بيأثر علي السحب و لا لأ.
3) زمان كان الواحد بيسأل فرامل العربيه ديه حلوه ولا لأ دلوقت بيسأل العربيه فيها abs & ebd و لا لأ.
4) طبعا زمان ما كنش بيسأل علي الايرباج دلوقت بيسأل و ان كان في معظم الاحيان بيسأل دلوقتي هي فيها كام اير باج.
5) زمان كان الواحد بيشوف الكاسيت بتاع العربيه حلو و لا لأ و صوته دلوقت بيشوف فيه cd و لا لأ و في بعض الاحيان بيشغل mp3 و لا audio بس.(بغض النظر عن غبور :D )
6) زمان كان الواحد بيسأل العربيه فيها باور ستيرنج و لا لأ دلوقت بيسأل هو الباور الي فيها زيت ولا كهرباء.
7) طبعا زمان مكنش في اهتمام نهائي بأستهلاك العربيه للبنزين دلوقتي اصبحت حاجه اساسيه.
8) و اخيرا زمان مكنش حد بيفكر في اتزان العربيه و الاستباليتي بتعها نظرا لعدم قدرة (اغلب) المواتير للوصول الي السرعات التي نصل اليها الان.

ملاحظه : - 1) التطور ده اعتقد حصل في اخر 10:15 سنة
2) طبعا الحاجات ديه مش في كل العربيات و لكن اغلبها بالرغم من انها اصبحت في كل العربيات في العالم كله بس نقول ايه يبقي انت اكيد في مصر
ديه الحاجات الي انا افتكرتها ارجو من جميع الاعضاء المشاركه و الي يفتكر حاجه تانيه يقولها

فيه حاجات كتير جدا موجودة فى عربيات ديلوقتى عمر ما كان حد بيفكر فيها زمان ولو كانت موجودة محدش كان يعرف هى بتاعة إيه؟

مثلا احنا كان عندنا عربة 132 موديل 1976، ابويا فضل راكبها 18 سنة من يوم ما اشتراها سنة 80 لحد ما مات سنة 1998 وميعرفش عداد الRPM اللى قدامه ده لازمته إيه مع انه كان من حملة الماجستر

برضه نفس السيارة ونفس ابويا، العربية كانت خمسة غيار ، هو اشتراها سنة 80 ، اول مرة يجيب الخامس كانت سنة 1986 بعد ستة سنوات ركوب وحوالى 150 ألف كيلومتر ، مع انه بيسافر على طول لكنه كان مقتنع ان الخامس ده تكنولوجيا مخيفة يجب ألا يقترب منها، لكن لما عرف سكته بعد كدة بقى يستعمله على طول

نفس السيارة-السابقة لعصرها، كان فيها احزمة أمان، اول مرة تستعمل هذة الاحزمة بمعرفة شقيقى مالكها الحالى كان سنة 2000 لما طبقوا قانون حزام الامان اى بعد 20 سنة من امتلاكنا للسيارة وبعد وفاه صاحبها الأصلى بسنتين

العربيات ال 128 لما نزلت بمرايات بتتظبط من جوة يدويا سنه 1988 ، الناس كانت معتقدة ان القيامة هتقوم لان العلم وصل لدرجة السحر

اول مرة شفت عربية بتفتح وتقفل بريموت كونترول كان فى ألمانيا سنة 1992 وصاحبها كان بيحاول يقنعنى انه عامل لها تعويذة تفتح وتقفل بيها

العربيات 132 زمان كان الميكانيكية بيخافوا يصلحوها علشان فيها تكنولوجيا قادمة من وكالة ناسا لأبحاث الفضاء :D اسمها إشعال الكترونى(شريحة الكترونية عبيطة كدة بتلات تعريفة بدل الأبلاتين والكوندنسر) وكانو بيقولو علها عربية بالكومبيوتر، ياترى ميكانيكية السبعينات دول هيعملوا ايه ديلوقتى لو شافو شكل التحكم الإلكترونى فى المحركات حاليا

اللى كانوا زمان يعرفوا العربية الفلانية كام سى سى كانو الصفوة المثقفة، اما موضوع القدرة الحصانية فده كان خيال علمى

العربيات الالفين سى سى فى السبعينات كانت 100 حصان بالعافية، النهاردة ال1600 سى سى بتعدى ال120 حصان

كان فيه زمان تشكيلة من الاختراعات فى العربيات، عربيات تبريد هوا وعربيات تبريد مية،عربيات تانية موتورها ورا وعربيات تانية موتورها قدام ، عربيات جر امامى واخرى دفع خلفى، عربيات على علب واخرى على شاسيه ، عربيات بكاربراتير وعربيات تانية برشاشات ، ديلوقتى كله شكل واحد

زمان العربيات ام 2باب كان سوقها فى مصر هو سوق الغلابة( الفولكس والسيات وال127 توب والزاستافا) ، ديلوقتى سوقها بقى سوق الناس المقتدرة(النيو بيتلز والمينى كوبر)

العربيات الإستيشن فقدت سوقها فى مصر لصالح العربيات ال4*4 والمينى فان

العربيات الكابروليه فقدت سوقها لصالح العربيات ام فتحة سقف

فوانيس الشبورة زمان كانت كلمة ابيحة مبيسألش عنها غير الشباب الرقيع قليل الأدب، ديلوقتى بقت فوانيس الشبورة والزينون وغيره من متطلبات الرجل العادى الرصين

اللى كان عنده كاسيت ناشيونال فى عربيته زمان جايبهوله جوز اخته من السعودية كان بيتمنظر على مخاليق ربنا، ديلوقتى بقى اللى معندوش DVD فى العربية دا لسة عايش فى القرن الماضى