الموضوع: جينا عملت حادثه ... اهئ اهئ اهئ عااااااااه

هى حادثه صغيره فى اسكندريه امام الداون تاون وانا ماشى تقريبا على 50 كم لقيت مجموعه شباب بيعدوا السكه وجم قبل الحاره بتاعتى ووقفوا فقولت خلاص مش هيعدوا لحد لما قربت منهم واحد منهم قرر فى اخر لحظه انه ياخدها خطف فملحقتش اعمل حاجه فالواد جه على الكبوت وكسر البربريز بشده وانا رحت كاسر شمال على عربيه شاهين كانت عند الباب اللى ورا شمال عندى فلما كسرت عليه زنقته فى الجزيره الوسطى للطريق (الرفرف اليمين قدام بتاعه اتدغدغ وعلى كلامه عربيته محتاجه استعدال شاسيه بس هو بصراحه مسامح ومرضيش ياخد اى تعويض) وبالتالى انا لفيت 90 درجه ناحيه الشمال وطلعت على الجزيره وهى حوالى 40سم زى ما باينه فى الصوره .... بالنسبه للشاب الحمد لله ردود بسيطه وكل اشاعاته تمام والموضوع مشى بالتراضى ... بالنسبه لتلفيات جينا فمن الناحيه اليمين الجنطين طلعوا بره الكاوتش ففى جنط منهم اتعوج ( وده هيتغير) والجنط التانى ركبت عليه الكاوتش وبقى كويس المقص اتعوج عوجه بسيطه وفى شداد للموتور من تحت اتخبط خبطه بسيطه والخبطه البسيطه فى الباب اللى ورا شمال هى دى الخبطه بتاعه الشاهين وحزامين الأمان اتشدوا وبالتالى يلزم تغييرهم ولمبه الأيرباج نورت فيلزم تغيير (المفجر) وطبعا البربريز وهيغيروا الكبوت بالرغم ان الخبطه اللى فيه هابله اوى بس تحتيها عضم فالتوكيل قرر يغيره وكان فيه حبه سمكره بسيطه من الناحيه اليمين من خبطات سابقه قلت اخدها بالمره ... والفاتوره كانت ..... تاتاتاتاتااااااااااااا ....... 16000 جنيه وحبه فكه , منكرش ان هم مبالغين علشان عارفين ان العربيه تامين وبتوع التامين بيهروهم فصال حتى المهندس حكيم قاللى ان السعر ده هينزل بعد ما يجى بتاع التامين واسعار قطع الغيار كانت كالأتى:

البربريز الأصلى 1150 + 3 انابيب سليكون الواحده 95 جنيه ( بالمناسبه يوجد فى التوكيل بربريز مش اصلى بحوالى 700 جنيه
الكبوت تقريبا 1150 جنيه برضه
رفرف يمين 600 جنيه
الحزام الواحد 1450 جنيه
المفجر تقريبا 1600
الجنط 2009 1200 جنيه
ده اللى انا فاكره ودى الأسعار الحقيقيه من المخزن بس الأسعار المكتوبه فى المقايسه اكتر حبتين علشان موضوع التأمين
اللى حببنى فى العربيه اكتر انى مشيت بالعربيه حوالى 300 كم بعد الحادثه على الاستبن والعربيه كانت ماشيه زى الفل بس كانت ناشفه شويه ( يمكن علشان الأستبن ويمكن علشان ان الناحيه الشمال بها نيتروجين اما اليمين هوا عادى) وطبعا ماكنتش بجرى اخرى 80كم علشان الأستبن

اللى استفدته الأتى:
1- مجريش جوه البلد بالرغم انى ماكنتش بجرى اصلا
2- اى بنى ادم بيفكر يعدى من الشارع اللى هعدى فيه اقفله واقوله اتفضل حتى ولو كان لسه منزلش من بيتهم بس يادوبك عنده نيه النزول
3 - الأسعاف الجديده بتيجى بعد المكالمه الرابعه على الأقل وده تطور هايل فى مرفق الأسعاف
4- احتماليه وجود خط النجده 122 مشغول تقريبا 90 %
5- حسيت ساعتها من كتر الناس اللى بتتفرج على جنجونتى انها اشهر من تامر حسنى وبالطبع الطريق وقف بالرغم انى راكنها زى مانتوا شايفين فوق الرصيف
6-اوعى حد يخلى ونش الشرطه يشدله العربيه ( لأنه شدنى من الوضع ده علشان يودينى الناحيه اليمين من الطريق) وتقريبا 3/4 التلفيات اللى فى العربيه منه مش من الحادثه.
7- مدام هتتجوز كمان شهرين زى حلاتى (باذن الله) ياريت متسوقش العربيه خالص وقديها مواصلات اوفر بكتيير