الموضوع: نصائح لإختيار الشقة المناسبة!

ألف الف مبروك يا باشا مقدما
انا مش هعلق على اولا لانى معرفش نظام المنطقة اوى
ثانيا : اكيد مش الاول , ان كان و لابد يبقى التامن , و لو انى لا أفضل الادوار العليا بسبب امكانية تعطل الاسانسير , و بسبب تعرضها الاكبر للشمس , يعنى لو قدرت تتوفق فى حاجة من التانى للرابع يبقى احسن بكتير , بس الاول دوشة و عدم خصوصية و تراب و عرضة للسرقة
ثالثا : البحرى ثم طبعا الشرقى ,بينما الغربى هو أسوأ توجيه ممكن لشقة سكنية ( معلومة بيخدوها فى سنة أولى عمارة)
رابعا :
- تشطيب المدخل و السلم , اذا كانت لسة عمارة جديدة , و صاحب العمارة ايه نظامه معاهم
-الانتركم
-اذا كان فى اى حاجة فى الواجهات مش خلصانة
- الحلوق و الشبابيك و التشطيبات ( ان وجدت) مطابقة لما هو موجود فى العقد
-مخارج السباكة فى الحمام و المطبخ كاملة
-مخارج الكهرباء فى الشقة
- العداد اللى هيركب يكون 3 فاز مش أقل عشان شغل التكييفات و التلاجات و الكلام دا
لو افتكرت حاجة تانى هقولك
و الف مبروك تانى

السلام عليكم مبروك عليك و ليك انشاء الله
ممكن أعرف أخبار ألأسعار , و نظام الدفع و سمعت أنا حاجة عن ان الأراضي وضع يد و كلام من النوع ده فهل ده صحيح

المشاركة الأصلية كتبت بواسطة nadernabil

إ
ثانياً: لو أمامك 3 شقق بعمارة واحدة...الثلاثة نفس التقسيم و المساحة و الواجهة...و الإستلام فوري و عداد الكهرباء راكب و المفتاح تستلمه أول ما تمضي العقد...
لكن الشقق موجودة بالدور الأول بعد الأرضي...و الثامن و التاسع! مع العلم ان العمارات هناك 11 دور
أيهم تختار...و أسبابك التفصيلية يا ريت

و عموماً أي الأدوار هي الأفضل؟

عن نفسى هاختار اللى فى الدور الاول و ذلك باخذ عامل الامان لو حصل حريقه او زلزال لا قدر الله و لو هشترى اى حاجة سهل اطلعها البيت و الاسانسير مش هيبقى مشكله و طبعا القرب من الشارع هيبقى فيه ازعاج اكبر م الادوار العليا

لكن الادوار العليا تتميز بميزه هامه جدا و هى المنظر الرائع و انك شايف السما كفايه ان نور القمر يدخل اوضتك

لكن برده اختار الدور الاول

فكرة الأول أو الثامن ترجع مباشرة للمنظر اللي قدامك ..
يعني لو فيه قدامك عمارة يبقى العالي أفضل لأنك هتبقى مجروح
لو مفيش يبقى الأول أحسن لو مش مجروح لأنه هيرحمك من حاجات كتير جداً منها تعطل الأسانسير وفي حالة الكوارث وخلافه ..

الشرقي أحسن من الغربي طبعاً .. ودي معلومة يمكن إخوتي وأصدقائي فوق لم يعرفونها وأنا نفسي عرفتها على كبر ..

الشرقي الشمس بتضرب فيه الصبح بس .. بتبقى هادية وحنينة وبعد الظهر هتلاقي الشمس في الغربي حتى الغروب يعني صباح الشوي ..

أفضل الجهات لو فيه واجهة واحدة بس هي :
الشرقي
الشمالي (البحري ) وده لأن الشمس مبتدخلوش أصلاً
الغربي
الجنوبي (القبلي )

أما لو فيه واجهتين فأفضلهم :
البحري الشرقي
البحري الغربي
القبلي الشرقي
القبلي الغربي

وأفضلهم جميعاً البحري القبلي لكنه لا يتوافر إلا لو كانت شقتك على مساحة العمارة كلها أو نصفها على أقل تقدير ..
وشقة سعيدة يا نادر

المشاركة الأصلية كتبت بواسطة TIMODAX

السلام عليكم مبروك عليك و ليك انشاء الله
ممكن أعرف أخبار ألأسعار , و نظام الدفع و سمعت أنا حاجة عن ان الأراضي وضع يد و كلام من النوع ده فهل ده صحيح

متشكر جداً يا جماعة علي الردود...
انا رحت هناك تاني إمبارح...
الدور الأول إتدفعلها عربون...و الثامن إتباعت...فاضل التاسع...اللي هو أخر دور...يعني بخ

اللي عاجبني في العمارة دي انها كانت خلصانة تماماً...و واجهتها و تشطيب السلالم و المداخل علي أعلي مستوي في المنطقة كلها...عشان كده إتخطفت..

بس النصائح اللي قولتوها بقيت أخد بالي منها ...يعني بقيت فاهم الدنيا أكتر...

بالنسبة لمنطقة الزهراء

المتر يتراوح بين 2000 لحد 2500...بس الحاجات الكويسة جداً بتبقي في حدود 2300...

كل الأراضي كانت ملك لجمعيات (زي شمال سيناء و تنفيذ الأحكام...إلخ)...و بتبيعها لمقاولين و مستثمرين...اللي بدورهم بيبنوا لحسابهم...

طبعاً لازم تروح الحي برقم القطعة اللي انت ناوي عليها..و تتأكد ان تراخيصها مظبوطة و المرافق متوافق عليها و كل الكلام ده...

عيب المنطقة دي هي التكدس الرهيب...يعني هي فيها حوالي 200 برج...كل برج 10 أدوار...يعني تخيل الزحمة و الركنة هاتبقي عاملة إزاي

و عيب تاني هو ان الغرف الداخلية (النوم يعني) كلها بتبص علي المنطقة الحرة بين العمارات...يعني تفتح شباك الغرفة تلاقي بينك و بين الجار 5 متر فقط...و ده عامل نوع من الخنقة و عدم الراحة

عيب ثالث هو التفاوفت الرهيب في جودة الواجهات...يعني العمارات هناك تحس إنها سمك لبن تمر هندي...كل واحدة شكل و لون و تشطيب...في حاجات بأمانة تقرف تبص عليها...

بس في المقابل المنطقة دي ليها مميزات كتير:
1- في المعادي...يعني قريبة من كل حاجة..
2- جنبك نادي وادي دجلة لو مشترك أو ناوي تشترك
3- كارفور 5 دقائق منك
4- الدائري 5 دقائق منك...يعني القاهرة كلها
5- المستوي هناك معقول...يعني معظم العربيات اللي راكنة من فئات متوسطة و حديثة

و بيعملوا شارع دلوقتي هناك إسمه شارع الخمسين...هايوصل من عند برج فودافون في شارع الزهراء الرئيسي...لحد الصينية اللي عند شركة البوتجاز اللي علي أول طريق العين السخنة..