عاجل حغير الكاوتش النهارده لل 128 (مشكلة حسابية)

حبايبي الحلوين

انا النهارده محتاج رايكم بسرعة عشان انا رايح اغير الكاوتش عشان كل يوم باخد ال lunch بتاعي عند بتوع الكاوتش

انا معايا حبيبتي ال 128 وكانت طبعا نازلة ب كاوتش مقاسه 1454/80 زي كل القبيلة بتاعتها

من سنتين لما اخدتها من والدي غيرت الكاوتش بتاعها ل 165/70 زي ما عامل كل ملاك ال 128

امبارح رحت اغير الكاوتش وانا متعود اني اغير الاربعة مش عنطزة والله ولكن عشان مبحبش الترقيع ومش عارف ايه حط الجديد ادام والطويل ورا قصدي القديم ورا (زي العقدة اللي كانت عندي من ايام المدارس)

رحت لبتوع الكاوتش اللي في القاهرة الجديدة معظمهم لقيتهم عندهم 175/65

بصراحة دماغي لعب فيها شوشو خصوصا ان الثبات حيزيد جدا

انا لما عرضت الكاوتش المرة اللي فاتت العربية استريحت فعلا
خصوصا ان محسوبكم كل طريقة طرق سريعة وساعات بعدي ال 130 بالعربية وهي الحمد لله مستريحة
فطمعان في ثبات ثاني

انا دخلت على النت ولقيت ان المقاس ده متوافق مع طول وارتفاع الكاوتش القديم والكاوتش اللي فيها
من على موقع اسمه tyre calculator

يعني مش حياذي العفشة في حاجه
المشكلة فعلا يعرفها المهندسين احسن مني ان لما بعرض الكاوتش انت بتزود من المقاومة على الارض فالعربية ممكن تبقى تقيلة

الكلام ده حقيقي ولا لأ
بس بسرعة لحسن العربية حتنام على الارض

يعني افضل على 165/70 ولا احول ل 175/65 خصوصا ان الفرق سنتي واحد بس

ياباشا انا كنت مركب لعربيتي ال 128 كاوتش مقاس 13/185/60 وكانت العربيه فله في الثبات ومكانش ماثر علي العفشه نهائي

الف شكر يا باشا

على فكرة انا رحت امبارح لسبعة بتوع كاوتش
2 في القاهرة الجديدة
5 في عين شمس

كل ما اقول لواحد على 175/65 يبص لي كاني جاي اطلب الغراب الابيض
وشوية واحد يتريأ ويقول يا باشا ركب لها 165/70 وخلاص كفاية عليها

المشكلة اني خايف احط لها 185/60 لاني لقيته صغير يعني القطر بتاعه صغير
يعني في ضياع لقوة الموتور على اساس انه حيلف لفات اكثر عشان يوصل لنفس السرعة اللي عليها القديم يعني حمل على الموتور ولا ايه راي سعادتك

هو انت مركب جنوط ولا لا
ولو مركب يبقى كفايه ال 175 لان اكتر من كده ممكن الكاوتش يحك فى الرفرف

لا انا مش مركب جنوط عريضة انا رحت جبت من حلوان 4 جنوط بتوع الفلوريدا
لانها هي اللي بتنزل في العربيات الجديدة
المهم ان الراجل الي كان عنده 175/65 رحت ملقيتهاش

ياريت تقولى اسعار الكاوتش ايه علشان انا مقبل على الخطوه دى

وبالنسبه للجنوط قصدك ايه بالفلوريدا

اقتباس:

---

المشاركة الأصلية كتبت بواسطة mahamedaraby

ياريت تقولى اسعار الكاوتش ايه علشان انا مقبل على الخطوه دى

وبالنسبه للجنوط قصدك ايه بالفلوريدا

---

أسعار الكاوتش
كومهو كوري 165/70 لقيته في مدينة نصر 250
ميدان ابن الحكم (جنب ميدان التجنيد) 230
الوحيد واحد اسمه مصرية جنب عمو حسني الألف مسكن لقيته 210 بالترصيص والبلف الجديد

جي تي نفس المقاس لقيته عند كل الناس ازيد من الكومهو بحوالي عشرين جنيه, الطريف انه من 3 سنين كان ارخص حوالي خمسين جنيه, انا جربته وهو فعلا حلو بس بحس انه ناشف على العربية وجايز هو ده السبب اللي خلى السواقين بتحبه خصوصا انه صعب يتقطع

بس انا عن نفسي بفضل الكومهو بحس انه شديد وبرضه طري بيرقص العربية كده يعني على المطبات مش خشن

الهانكوك تقريبا نفس سعر الكومهو او يزيد خمسة جنيه

معتقدش ان حضرتك تحب تطلع للميشلان او البريدجستون لان كده عدينا التلتميات وممكن الربعميات

وبرضه معتقدش ان حضرتك تحب تنزل للاسا بتوع التاكسي او الحاجات الصيني لاننا ماشيين على اربع اكياس هوا, بس انت كده حتنزل عن الميتين للفرده


بالنسبة للجنوط:
من سنتين دخت على الجنوط لما الاستبن اتسرق كل ما تروح لواحد تلاقي عنده الجنط بيبرق وهو بيكون مصدي وبيرش عليه لون فضي اسبراي بستة جنيه ويبيعهولك بستين

مرة كنت ماشي في الزيتون ولقيت واحد بتاع جنوط اسبور قلت لما انزل ارخم عليه

قلت له عندك جنوط 28 جديدة؟
لقيته بيقولي عندي افتكرته بيخنق عليا
قالي ان فيه 28 واحد استلمها جديد وجاله باع له الجنوط الاصلية وركب سبور
انا مكنتش مصدق نفسي قلت سبحانك يا رب

وفعلا الاربعة كانوا زي بعض بالمللي ماعدا واحد كان فيه عوجه
واضح انه قبل ما يبيعهم للراجل حب يفتري عليهم

المهم رحت حلوان من منفذ بيع شركة النصر (قبل ما تقفل)
وسألت على واحد جديد وقلت حخلي المخبوط استبن (افترا برضه)
الراجل قالي ان الجنوط اللي بتنزل لل128 هي نفس جنوط الفلوريدا
ودي العربية اللي كانت شركة النصر بتعملها من سنتين برضه مع الشاهين وال 128

فقلت تبقى فعلا متوافقة مع عفشة ال128
واشتريت واحد جديد نسخة من الاربعة اللي عندي (مع العلم ان الراجل صاحب العربية كان 128) على حسب كلام البياع مما يؤكد انهم نفس الجنط

بس يا باشا هي دي حكايتي فعلا العربية زي الفل والجنوط الجديدة فعلا بتفرق وقلت بلاش الجنوط الاسبور عشان حكاية انها بتأثر على العفشة ناهيك انها مينفعش تستعدل (برضه على حسب كلام بتاع الكاوتش)
وربنا يوفقك بس نصيحة من اخوك
غير الكاوتش الاربعة مرة واحدة لانها حسابيا واحد ولانها فعلا بتفرق

علي فكرة انا لسة جايب اتنين كومهو جديد من شهرين عملوا 400 جنية الأتنين

165\70
متدفعش اكتر من كدة

كان شامل التركيب بس بصراحة بدون ترصيص

و اعتقد انة فيتنامي مش كوري

بجد شكرا شكرا على الرد

وعلى المعلومات ده جزاءك الله كل خير

بس انا مش عارف ازاى مفيش جنوط عاديه لل 128 !!!!

انا شكلى كده هطلع على الصين :)

هو اي احسن مقاس للثبات العربية 128

انا عارف ان المقاس مثلا

14 او 13

اما الرقم اللي بكسر زي قرائة الضغط مش عارفه :( ؟

ياريت حد يوضح لي اكتر

13 او 14 انت كده بتتكلم على قطر الجنط الحديد

يعني فيه عربيات نازلة 13 وفيه 14 زي اللانسر القديمةو فيه 15 زي اللانسر الجديدة واللوجان وفيه ال16 زي الكورولا الجديدة ومعاك لحاد حاجه وعشرين

احنا مش بنتكلم على الجنط مع ان فيه ناس بتغير والتغيير بيكون دايما للاعلى


بالنسبة للكاوتش

مثلا 165/70
معناه ان لو حطيت مسطرة على العرض بتاع العجلة حتلاقيه 165 ملليمتر

بالنسبة ل 70 دي بتكون نسبة وتناسب بس تتوافق مع المسافة من الارض للجنط انت فاهمني؟؟؟

يعني مثلا بالنسبة لل 175/65
حتلاقي ان عرض الكاوتش على الارض زاد انما المسافة من الجنط للارض قلت لان ال175 اكبر من 165
وال 65 اقل من ال 70

فيه موقع اسمه tyre calculator حيعجبك اوي