طبعاً يا باشا في ناس بره بيعملوا داونلود وأبلود زينا بالظبط، بس السواد الأعظم من الناس مش بيعملوا كده.
يا باشا ده انا واحد صاحبي كان في كندا وقال لصحابه على موضوع فك الهارد عشان تنقل حاجه من جهاز لجهاز. صحابه جالهم ذهول.
تخيل بقى إن الناس بره عندهم باندويدث بالهبل وما عندهمش حد بيسئ إستخدام الداونلود وإحنا عندنا العكس تماماً، عندنا باندويدث محدوده جداً وغاليه جداً وعندنا ناس كثير بيعملوا داونلود للإنترنت كلها تقريباً!!!! طبعاً الإنترنت عندنا لازم تبقى تعبانه.
وكمان اللي زود شكاوي الناس من الإنترنت في الفتره الأخيره جداً هو القرار الحكومي اللي أنا شايفه غير مدروس جيداً بمضاعفة سرعة الإنترنت لكل الناس.
تخيل إنت بيتك شايل 5 أفراد راحت الحكومه قالتلك بدءاً من الشهر الجاي هانجيبلك كمان 5 أفراد هايعيشوا معاك ... يا ترى هاتلحق تضاعف سعة بيتك في أقل من شهر؟ تخيل بقى كمان لو إنت معاك فلوس عشان تعمل التوسعه دية بس ما فيش إمكانيه ... ماحدش عنده مواد خام يبيعهالك مثلاً ..... هاتعمل إيه؟
هو ده اللي حاصل دلوقت.
وعلى فكره عروض شركات الموبايلات الجامده دية ومستوى خدماتها الجيد ده عشان هم لسه ما عندهمش عدد كبير من المستخدمين وعشان هم كمان عاوزين يلموا زباين، لكن كلها كام شهر وهايقعوا في نفس المطب. وعلى فكره سعة الإنترنت الدوليه في أكبر شركة موبايل عمرها ما هاتيجي نصف شركة إنترنت عاديه. وده بالإضافه إلى إن الشركات دية لسه مش موجوده في معظم السنترالات واليو إس بي بتاعهم مش شغال بكامل سرعته إلا في المناطق اللي فيها تغطية الجيل الثالث.
الخلاصه يا باشا إن التخلف بيعم في كل حاجه ... طالما إنت عايش في دوله من دول العالم الثالث يبقى توقع إنترنت بتاع العالم الثالث وده لأسباب كثير أوي.