أى هذه الطرق أفضل و أأمن و أقصر للذهاب الى شرم الشيخ: كوبرى السلام أم نفق أحمد حمدى أم عبارة من الغردقة؟ و كم تتكلف العبارة و كم يتكلف عبور الكوبرى؟
أى هذه الطرق أفضل و أأمن و أقصر للذهاب الى شرم الشيخ: كوبرى السلام أم نفق أحمد حمدى أم عبارة من الغردقة؟ و كم تتكلف العبارة و كم يتكلف عبور الكوبرى؟
عبور الكوبرى يا سيدى بجوز جنيهات بس و هو جميل جدا خصوصا و إنه يابانى حتى الأسفلت فهتحس إنك ماشى فى دولة تانية بس المسافة كده هتزيد حوالى 100 كم عن لو رحت من نفق أحمد حمدى لو رايح من القاهرة أما لو رايح من إسكندرية فهتاخد الطريق الدولى لغاية ماتعدى دمياط و ماتدخلش بورسعيد و تطلع من الدائرى لحد القنطرة و من هناك تطلع كوبرى السلام و رحلة سعيدة إن شاء الله يا هندسة وخد بالك إن السرعة عليه 80 كم فقط و الكاميرات متثبتة على العواميد و بتشتغل طويل اليوم بسطبعا بيفوتوا موضوع السرعة فى بعض الأوقات زى الصبح بدرى و بالليل و رحلة سعيدة. :mrgreen:
:lol: 8) :lol:
:
ألف شكر على المعلومات الجميلة دى ... أنا بأفكر أروح شرم ان شاء الله أول الشهر القادم بس لسة محجزتش و ربنا يسهل.
أنا رأيي طالما حضرتك ساكن في القاهره يبقى تروح عن طريق النفق أقصر
يا باهر واضح جدا إن الراجل من إسكندرية هو كاتب كده فى خانة المكان فى الأفاتور بتاعه فأحسن له الكوبرى :mrgreen:
بصراحة افضل وآمن وسيلة للذهاب الى شرم الشيخ هى الطيارة
مع نوعية الطريق المفرد وضعف الخدمات بشدة وكمائن المرور وما ادراك ما كمائن المرور (لعل قصة الشاب"اللى كان ابن ناس اوى" اللى معجبش امين الشرطة اللى كان طالع يفتش الاوتوبيس وتلقى من صنوف وواجبات الإحترام فى كمين الشرطة ما تلقاه لحد ما اهله انقذوه عن طريق العديد من الوسايط لا تزال ماثلة فى اذهاننا) ، انا ارى ان طالما الواحد رايح شرم الشيخ للفسحة بيقى افضل وسيلة هى الطيارة والواحد يرحم نفسه من البهدلة
انا مع سبعاوي في موضوع الطياره
اي وسيله تانيه حتبوظ طعم الرحله نهائي
هوه بديل مكلف في ظل اسعار الطيران الداخلي الجديده بس هوه اامن و اكثر الطرق احتراما
و اجازه سعيده يا ابوحميد
أشكركم جميعاً على ردودكم الرائعة و أنا فعلاً من اسكندرية فأعتقد حأجرب كوبرى السلام و أهى تبقى فرصة الواحد يشوف الحاجات النظيفة دى ... بالنسبة لموضوع الطائرة هو أنا بصراحة بأحب الرحلات الطويلة بالسيارة و كمان حتديلى فرصة أروح لكذا مكان داخل شرم و حولها بسهولة ... دة غير ان مريم بنتى آخر مرة ركبت الطائرة فى رمضان اللى فات كانت فضيحة بمعنى الكلمة لأنها مبطلتش صريخ طول السكة :(
و ربنا يستر و يسلم ان شاء الله ...
و بالكوبرى برضه ممكن تيقى فضيحه يا باشا علشان الكوبرى عالى موت و يقلق بجد .... انا وقفت تحته و حسيت انى مرعوب من المنظر ..... احسن حاجه النفق و اديك بتتفرج على الطريق .اقتباس:
دة غير ان مريم بنتى آخر مرة ركبت الطائرة فى رمضان اللى فات كانت فضيحة بمعنى الكلمة لأنها مبطلتش صريخ طول السكة
a7'ook
Sherif
طيب قوللى يا شريف أنا فاكر أيام كونتاكت انك كنت بتناقش فكرة انك تروح لشرم بالعبارة من الغردقة ... يا ترى جربت الموضوع دة؟ و ايه نظامه؟ أنا خوفى فعلاً زى ما قال سبعاوى ان الطرق داخل سيناء خطرة جداً فالعبارة ممكن تحل المشكلة دى
باشا انا ماخدتش العباره و سافرت بالعربيه من شرم للغردقه .... انما بخصوص العباره انا فاكر ان العربيه ب 350 جنيه و كل فرد ب 250 جنيه و بتاخد ساعتين فى البحر .......
و انا سافرت شرم و الغردقه كتير جدا و الطريق بتاع شرم مش وحش بس الطريق رايح جاى يعنى تسافر الصبح بدرى احسن حاجه ..... انما طريق الغردقه بقى حلو قوى و عملوه طريق رايح و طريق راجع منفصل عن بعضه و ده من عند الزعفرانه و هى بعد القاهره بحوالى 160 كيلو .
بالنسبه لشرم اخر الطريق يعنى بعد حوالى 360 كيلو من القاهره يوجد مجموعه جبال لا تتعدى 40 كيلو بس لازم تبقى مهدى سرعتك و مصحصح على الأخر.
a7'ook
Sherif
شكراً يا شريف على المعلومات القيمة و معاك حق كدة لازم أطلع من اسكندرية وقت الفجر عشان أفضل ماشى فى النور طول الطريق ....
أنا أقترح عليك السفر برا و تأخذ معك كاميرا جيدة وخذ رحتك في الطريق و لن تندم يوجد كثير من المناظر الجميلة و قبل رأس صدر يوجد عيون موسي و يوجد تبه عيون موسي متبقية من خط بارليف متفوتهاش فهي فخر لكل مصري كيف أستطاع أخترقها و رحلة سعيدة إن شاء الله
عندي سؤال من الأسكندرية للشرم كام كيلو تقريبا وشكرا
من الأسكندريه الى القاهره حتى اول طريق السويس = 260 كيلو
من اول طريق السويس و حتى نفق الشهيد احمد حمدى= 100 كيلو
من بعد النفق الى شرم = 350 كيلو
حوالى 710 كيلو
و مش لازم تنزل من الفجر , لو طلعت من الأسكندريه الساعه 9 صباحا توصل شرم الساعه 6 مساءا (وطبعا ده حسب سواقتك فى الأخر) مع وقوفك للراحه مرتين مره و انت بتحط بنزين فى اون زا ران اللى اول طريق القاهره , و مره تانيه فى موبيل اللى فى الغراندل و دى بعد النفق بحوالى 200 كيلو و دى من احسن الأستراحات على الطريق و بتقعد فى مكان محترم و مكيف و فيه كل طلباتك من شرب او اكل و صاحبها راجل محترم جدا .
و عموما بعد الغراندل بحوالى 100 كيلو لازم تبتدى تهدى علشان الجبال و الملفات و هى مش خطيره بس لازم الحذر (مرفق صوره للجبال مع الموضوع) .
و اى استفسار ان تحت امركم فى شرم او الغردقه لأنى سافرتهم كتير جدا .
a7'ookom
Sherif
انا اسف مش عارف انزل الصوره بتاعت الجبال .... الموقع مش عايز ينزلها مش عارف ليه !!!!!!
Sherif
ياباشا أنا قصدي الطريق من الأسكندرية إلي الشرم عن طريق الطريق الساحلي الجديد ثم الكوبري المعلق كام كيلو هل أقصر من طريق القاهرة النفق؟؟؟؟؟؟ وشكرا :roll:
اكيد الموقع مش بيقبلها علشان حج الصور كبير. ممكن لو عندك برنامج معالجه الصور تقلل ال resolution بتاع الصورهاقتباس:
انا اسف مش عارف انزل الصوره بتاعت الجبال .... الموقع مش عايز ينزلها مش عارف ليه
ابسط برنامج هو ال ACD see ده اكيد هيبقى عندك جربه و نزلنا الصور
طريق الأسكندريه ماعرفوش
لكن بالنسبالى العباره أسهل بكتير بتاخد ساعتين و ب 150 جنيه
لكن نصيحه ماحدش يفكر يركب اتوبيس أبدآ ابدآ. ( بهدله و كل شويه بتقف بتتفتش )
و كمان لو طالع من شرم هيوقفوا الأتوبيس قبل النفق و يفتشوا الركاب بالشنط بتاعتهم
و بالنسبه للطيران افضل بكتير لكن من الغردقه مفيش طيران لشرم
هى عباره واحده و مافهاش جراج للعربيات يعنى ركاب بس
طيران من الأسكندريه ميعادين فى الأسبوع تقريبآ
و طيران من القاهره اكتر من طياره فى اليوم
على فكره الطريق بالعربيه متعه . انا لسه ماجربتهاش لكن انشاء الله هجرب قريب
انا اعتقد انك تنزل على القاهره صحراوى ثم دائرى المعادى وتنزل على طريق السويس الى النفق ثم طريق شرم وده احسن بكتير من كوبرى السلام لانه طرىق طوييييل جدا انا اشتغلت فى شرم 6 سنين و كان معايه ناس من الاسكندريه بيجوه بعربياتهم عن طريق القاهره بس خاى بالك من المنحنيات بعد ابو رديس وقبل ابو زنيمه وكمان قبل شرم ب20 كيلو و توصل بالسلامه ان شاء الله
أنا جربت موضوع العباره ده و كانت من أسوأ الرحلات اللى طلعتها فى حياتى, كنت رايح من الغردقه لشرم الشيخ, الرحله كلها مشاكل و تعب بداية من الميناء فى البحر الأحمر , وده طبعا بسبب الاجراءات الأمنيه لأنهم بيدخولوا الميناء واحد واحد و فى عز الشمس و انت شايل شنط تقيله, و يومها سمعت كم شتايم لمصر من العرب و الأجانب اللى داخلين معايا الميناء. أما العباره نفسها ف دى قصه تانيه, أولا و انت داخل بتلاقى ناس ياخدوا منك الشنط لكن اللى لاحظته ان مافيش مكان مجهز فى العباره يحطوا فيه الشنط يعنى مثلا ممكن تلاقى شنططك فى طرقه بين الكراسى , جنب حجرة الماكينات أى حته و السلام, بعد بداية الرحله حسسينا بدوخه من حركة المركب لكن أنا عارف ان دى مسأله نسبيه تختلف من واحد للتانى. بعد حوالى ساعتين وصلنا ميناء شرم الشيخ و دى كانت قصه تانى , فوجئنا ان الناس اللى أخدوا مننا الشنط فى الغردقه اختفوا تماما و بقى مطلوب مننا ان احنا ندور على شنطننا جوه العباره و نطلعها , و طبعا مع الشنط الكتيير و الزحمه و الحر حصلت خناقات كتيير بين الناس و اللى شغالين فى العباره و لولا تدخل الأمن كانت حاتبقى ملحمه , المهم خرجنا من معركة الشنط دخلت أنا بقى فى معركة الخروج من الميناء لأن المسافه من الرصيف لغاية باب الميناء عباره عن مطلع كبير طوله حوالى 300 متر,و لا مطلع الجبل الأخضر بتاع استاد المقاولين العرب , رحت عشان اخد عربيه أحط عليها الشنط فوجئت ان العربيه بخمسه جنيه و من غير ما يكون معاك حد يزءهالك(يدفعها) , و دى بالنسبه لى كانت القشه اللى قسمت ظهر البعير , رحت متخانق مع الراجل و ضربته و اتلم عليا عساكر الميناء عشان ياخدونى على النقطه و لولا ان ظهر راجل محترم كده أنا معرفش ده مين بصراحه لغايه دلوقتى هدانى و طبطب عليا و قالى حقك علينا , بصراحه الراجل أحرجنى بأدبه و بعت معايا شيال و عربيه لغاية باب الميناء و عشان خاطر الراجل ده بس دفعت الخمسه جنيه( ده كان طبعا أحسن ما أبات فى قسم شرم الشيخ السياحى). دى كانت تجربتى مع العباره . و نصيحتى الشخصيه لكل الناس من الآخر ابعدوا عن النقل البحري فى مصر لأنه و لا مؤاخذه يعنى زبااااااااله
أنا جربت الطريق من القاهره و حتى شارم عن طريق النفق و ده كان فى شهر مارس , الحقيقه الطريق كان ممتع جدا و مرصوف بطريقه خلتنى أفتكر إن إسرائيل هى إللى عاملاه , كنت ماشى على 140 و مش حاسس إنى سايق أصلان و ده خلانى أخد الطريق بدون توقف فى رحله الرجوع , المشكله الوحيده هى إن الطريق رايح جاى و لكن مش حتحس بيها أوى لإن الحركه على الطريق مش عاليه يعنى فين و فين لما تشوف عربيه , أما بالنسبه للكمائن فا طول الطريق ذهاب و عوده ما حدش فكر يسألنى عن الرخص أو أى حاجه يمكن علشان كان معايا الأولاد و ده أعتقد له تأثير, عموما الرحله كانت ممتعه و لا أنصح بالأتوبيس على الإطلاق علشان طول المسافه و الأولاد و كمان موضوع التفتيش كل شويه و رحله سعيده