داري على شمعتك...... (مثل غبـــــــــــــي)

السلام عليكم...

حاجة لاحظتها فينا كلنا و يمكن اكتشفت ان انا كمان بعملها .. مش بس الناس .

و هي ان كل واحد بجد همه نافسه بطريقة غبية اوي اوي ...
مفيش حد بيحب يفيد حد بأي حاجة و يقولك اية : "داري على شمعتك تقيد"

طب و بعدين يا جماعة لحد امتى هنفضل كدا ؟
لحد امتى كل واحد هيداري على شمعته و مش هيخلى حد (من زمايله مثلاً) يستفيد من تجاربه و خبراته ..

الموضوع دا ملحوظ اكتر في مجال العمل على ما اعتقد ...
و اللي خلاني اكتب هنا اني اتضايقت انها كمان بتحصل بين الصحاب ..
حاجة غريبة فعلاً

الشعب المصري دا شعب عمره ما هيتعلم فكرة العمل الجماعى.. و بالمنظر دا هيفضل كدا!!

س: "انا جالي انترفيو في شركة و رايح يوم الحد"
ص: "مبروك يا معلم و شد حيلك ... متسيحش بقى في الدفعة و متقولش لحد اننا رايحين .. و داري على شمعتك تزيد "
و شوية كلام فارغ مش هيجيب ولا هيأخر..

و الكلمة الشهيرة بتاعت "متسيحش" !


انا مش عارف انا كتبت الموضوع دا لية اساساً..:fdsa:

يعني هو بيقولك متسيحش للدفعه تروح مسيح على النت كله ههههههههههههه

نيجي للجد موضوعك يشمل نقطتين او يتفهم بطريقتين
الاولى هي نداري على شمعتنا مخافة الحسد ده شيء وراد ومعروف ومع اني اخر واحدة ممكن تداري على شمعتها لكن بجد مش كل الناس بتحب الخير لبعضها وفي ناس قلوبها مريضه وحقودة وتكرهلك الخير وفي الحالة دي ضروري نداري

اما النقطه التانية هي العمل الجماعي .. طول محنا كمجتمع بنبخل على بعض بالمساعده في اي مجال وكارهين غيرنا يستفيد بخبراتنا هنفضل طول عمرنا ورا وعمرنا ما هنتقدم

يعني لو في ايدك تساعد حد متبخلش عليه عشان ربنا يوقفلك اولاد الحلال
لكن ده ميمنعش تداري على شمعتك عشان انت متعرفش ايه اللي في قلوب الناس

لما يبقى ليك صاحبك أنتيمك و تقله على فرصة ليك أنت بتسعى فيها و تفاجأ تلاقيه بيدور من وراك على واسطة أو طريقة ياخد فرصة زيها في نفس المكان بعد ما انت عرفته , و يكون السبب انها تروح منك و منه بغباءه و لو من غير قصد هتعرف ان اللي قال كده عبقري .....
متقلش حاجة عن اي موضوع الا بعد ما يكون خالصان و مضمون في جيبك تماما
أو يكون في أكتر من فرصة اللي هتقوله عليها يكون أولى بيها.


و داري على شمعتك تقيد

النفوس بقت وحشه اوي يا استاذي الفاضل
محدش طايق حد
فيه ناس مبتحبش الخير لحد
اللي ظروفو كويسه بيتحسد وبيتعب في حياتو
داري على شمعتك تقيد دا مثل كويس اوي هنا في مصر
طبعا مش كل الناس بالشكل ده ( بس هتقدر تفرقهم ) !!
الصحاب ساعات بيخدعو بعض وبيوقعو في بعض
دراي عليها وداري على نفسك
وحب نفسك وسيبك من الناس
العمل الجماعي في البلد دي في ظل الظروف دي مش هينفع
الدنيا بقت سوده اوي والخراب بيعم علينا والكويسين قليلين اوي
صدقني

اقتباس:

---

المشاركة الأصلية كتبت بواسطة mido01050

لما يبقى ليك صاحبك أنتيمك و تقله على فرصة ليك أنت بتسعى فيها و تفاجأ تلاقيه بيدور من وراك على واسطة أو طريقة ياخد فرصة زيها في نفس المكان بعد ما انت عرفته , و يكون السبب انها تروح منك و منه بغباءه و لو من غير قصد هتعرف ان اللي قال كده عبقري .....
متقلش حاجة عن اي موضوع الا بعد ما يكون خالصان و مضمون في جيبك تماما
أو يكون في أكتر من فرصة اللي هتقوله عليها يكون أولى بيها.


و داري على شمعتك تقيد

---

بجد الراجل ده جاب م الاخر

والله والله كنت بفكر فى الموضوع ده النهارده تصدق !

والله العظيم ما بهزر .

صلاة الجمعة لاقيت الناس كل واحد بيبص للتانى بخبث و نظرات من تحت لتحت و كان فى حرب اهلية مثلا بين الناس .

الناس كل واحد بيسلم على التانى و كأنه عايز يقوله من جواه اذهب للجحيم بلا رجعة .

و كل واحد ماشي بمثل دارى على شمعتك !! طب يا رب الشمعة تلسعك انت و هو :) .

انا كرهت مصر كلها من شرقها لغربها بناسها المنافقة .

فعلا الناس بقت بتعمل حاجات غريبة انا فى اتنين اعرفهم فى وقت من الاوقات كنا زى الاخوات و كل يوم سواء فى الصيف او وقت الدراسة مع بعض و حتى بعد ما اتخرجنا ،واحد منهم يكلمنى من مطار القاهرة فى رمضان قبل المدفع بساعة و يقولى انا باتصل اسلم عليك اصلى مسافر الامارات دلوقتى رايح كده على شغلانة "تعبانة" اجرب حظى !!! طيب هو السفر ده مش محتاج تصاريح و اذن جيش و تحاليل و جوازات و مكتب عمل و دنيا كبيرة تاخد اكتر من شهر علشان تخلص ؟؟؟ ما قلتش ليه مش يمكن كنت ساعدتك فى حاجة من الحاجات دى ؟؟؟ طبعا مافيش دم
و التانى قالى اصلى ليا عم قاعد فى الكويت من السبعينيات و صحته تعبانه و شكله حايخلص و احنا رايحين نكون جنبه و هوب شهر فالتانى باتصل باهله اسأل عليه،،،اه هو كويس و ربنا كرمه و لاقى شغلانة و ادعيله !!!طيب هو انت لازم تقول ان عمك بيموت علشان تسافر ؟؟؟ و يتصل بيا بعد كده من هناك :ده انا متبهدل و طالع عينى و و و و و غيرم من اساليب ذر التراب فى العيون
حاجة غريبة مش كده ؟؟؟ و من ساعتها يلعن ابو الصحاب على المعارف على اللى عايز يفيد حد
السبب ان احنا شعب غريب ،الناس كلها بتبص لبعضها و كله مشغول بحال التانى و كله حاطط مناخيره فى قفى اللى حواليه ،الجيران يبصوا على بعض ،الناس فى الماركت عند الكاشير يبصوا انا شايل ايه فى الكيس و حاتدفع كام،فى الشغل انت جايب الساعة بكام و البنطلون بكام و النظارة بكام و كل حاجة بكام ،فى الشارع الناس كلها بتبص لبعض بصات غريبة ، اللى راكبين العربيات اللى جنبك يفضلوا يبصوا فى عربيتك و يبصوا على بعض و عربيات بعض..........من الاخر شعب مريض محتاج حقنة نووية فى مخه علشان يتعدل

طبعا انا متفق معاكو فى الطريقة الغريبة الى الناس بتاعمل بعضها بيها لكن على ما اتذكر ان فى حديث للرسول(ص) "استعينوا على قضاء حوائجكم بالكتمان" فده مش حرام لكن مش اكتم بالكذب

اقتباس:

---

المشاركة الأصلية كتبت بواسطة hossamdoaaaa

طبعا انا متفق معاكو فى الطريقة الغريبة الى الناس بتاعمل بعضها بيها لكن على ما اتذكر ان فى حديث للرسول(ص) "استعينوا على قضاء حوائجكم بالكتمان" فده مش حرام لكن مش اكتم بالكذب

---

انا متفق مع الحديث طبعا و كمان ( لا تقول انى فاعل ذلك غدا الا ان يشاء الله ) و يا ريت التصحيح لو فى خطأ .

و لكن اصدقائك دول اقرب الناس ليك , شوف الكلمة جاية منين ( الصدق ) الصداقة معناها الصدق , فيها ايه لما تعرف اصدقائك انك هتعمل اى شيء و تقول قبلها ان شاء الله !!

هل الاصدقاء هيغيروا اللى ربنا كاتبه ؟

هل الاصدقاء يعلموا ما فى علم الغيب ؟

لو ربنا كاتب لحد رزق فى اخر الدنيا هيروح و هياخده و مفيش حد هيمنعه من رزقه .

و لكن انت فى مصر اترك عقلك جانبا و عيش مع العالم زى ما هما احسن .

اقتباس:

---

المشاركة الأصلية كتبت بواسطة hossamdoaaaa

طبعا انا متفق معاكو فى الطريقة الغريبة الى الناس بتاعمل بعضها بيها لكن على ما اتذكر ان فى حديث للرسول(ص) "استعينوا على قضاء حوائجكم بالكتمان" فده مش حرام لكن مش اكتم بالكذب

---

+1

اقتباس:

---

المشاركة الأصلية كتبت بواسطة terrible_darsh

انا متفق مع الحديث طبعا و كمان ( لا تقول انى فاعل ذلك غدا الا ان يشاء الله ) و يا ريت التصحيح لو فى خطأ .

---

دى آية من القرآن

(ولا تقولن لشئ إنى فاعل ذلك غدا - إلا أن يشاء الله واذكر ربك إذا نسيت ... )

بيحصل معايا كتير موضوع الأصحاب اللى فجأة متلاقيهوش وتعرف انة سافر او اللى تتفاجئ بإنة خلاص مجهز نفسة وماشى فى خلال يومين تلاتة

لكن أكيد بيكونو مجرد اصحاب مش أصدقاء مقربين

المشكلة مش فى كدة .. انا عادة ماحبش احكى عن حاجة الا لما تتم .. يعنى بسعى لشغل محبش اتكلم فيه غير لما يتم ... بس لو اتسألت عنه مثلا ً اكيد مش هحور واعمل أفلام ... هتكلم بوضوح وصراحة ...

المشكلة فين بقى؟ فى الناس اللى تكتم علم .... يبقى عارف الحاجة تتعمل ازاى وميقولش .... عشان يبقى هو بس اللى عارفها !! وعشان محدش يعلى عليه ... فيفضل هو فوق الجميع ... حاجة بجد قميئة مش ممكن !! .. طب انت عملت دى ازاى؟ .. ميقولكش .. او يتوهك .. اى كلام بقى ..

تعالوا شوفوا الناس برة بتعمل ايه .... شوفوا منتدياتهم ... شوفوا بيحكوا ازاى عن تجاربهم ... شوفوا بينصحوا بعضهم ازاى ... شوف بيديك المعلومة ازاى ويساعدك فيها وهو ملوش مصلحة أصلا ولا يعرفك !!

انا كدة زيك يكرة المثل دة لحد يومين فاتو

بس بعد ما اتلسعت من ناس قريبة مني جدااااا
خلاص بقي المثل دة اهم حاجة في حياتي