الموضوع: حادثة-تأمين=محدش هينفعك

انا هحكي تجربة شخصية و اللي عايز ياخد بيها ياخد و اللي مش عايز هوه حر و ذنبه على جنبه

قبل العيد بأسبوع كنت لسة شاري عربيتي لانوس 2007 كاش و علقت نمر و كلله 100 100
و كان معايا واحد صاحبي و قلتله يلا نروح للراجل بتاع التأمين علشان نعمل الوثيقة و نظبط المسائل و رد عليا و قاللي لأ يا عم ده حرام و بلاش و الكلام ده و فكرت فعلا انني انسى الموضوع ده و أتكل على الله و خلاص

و لما روحت و مراتي عرفت انني مأمنتش كانت هتاكولني و طبعا خفت منها Red_Colorz_PDT_05 (و طبعا ده مش عيب Red_Colorz_PDT_02 ) و جريت رحت تاني يوم أممنت بمبلغ 1370 و هو كل ما دفعته أول عن آخر

و بعديها بكام يوم رايح الشغل كالعادة و واقف في نفق الثورة و الدنيا كلها واقفة بس فاضية ورانا و فجأة لقيت رقبتي إتلوحت لورا و بعدين ضربت في الدريكسيون لدرجة إن جبهتي اطبع عليها علامة دايو

نزلت زي المجنون من العربية و محستش بنفسي غير بأني رحت أجيب الحمار من العربية الانسر اللي دخلت فية و وشه دم و عمال يقول الفرامل سابت يا بيه و بصيت على العربية لقيتها 2006 اتوماتيك من الآخر كداب يعني

جه الظابط شاف المنظر و فهم ان هوة اللي غلطان و متخلف كمان و كذاب و عرض عليا اني أعمله محضر و يبهدولي شوية و طبعا مش هينوبني غير العطلة و و جع الدماغ اللي لا بيودي و لا بيجيب و قلتله بعد إذنك رخصه و أنا هتصرف معاه

و فعلا خدت رخص الواد و طلع سواق عليها (يعني سواق و حمار و كداب كمان) و قلتله 2000 جنيه يا حلو علشان أسيبك و أديلك الرخص أحسن أشردك و أجيبلك مصيبة

و بقي كل شوية واحد يجيبله 100 او 150 200 جنيه كده المهم و بعد وقفة 3 ساعات في الشارع طللعت منه 700جنيه و ساعتها انا نفسي كنت زهقت فرميتله الرخص على عربيته اللي أصلا كانت جايبة ربع قداماني و قلتله انا أصلا مأمن و دول علشان أربيك بس و أحس أنني خدت حقي

و مشيت و بللغت منتج الوثيقة و سألته عن المحاضر و الإجراءات و قاللي مالكش دعوة و هبعتلك حد ياخدها و يعمل اللازم

و طبعا النتيجة كانت عندي كالتالي
اكصدامين أمامي و خلفي
الشنطة و المراية بتاعتها
الرفرف اليمين ورا بفانوسه
و الكابوت
و قطع حديد و خلافه
كام يا عم التكلفة اللي مش دافع فيها ولا ملليم؟؟ 7200 قطع غيار أصلية كلها من التوكيل بدون الرش و المصنعيات و الذي منه
و كل اللي دفعته 1370-700=670جنيه

و العربية طالعة كأنها من المصنع حالا و رحت رفعتها في بنزينة و بقول للي واقف ايه رأيك أشتريها؟؟ قاللي يا بيه دي زيرو طبعا و مفيهاش الهوا

و رجعت بوست ايد حبيبتي و رفيقة عمري مراتي و قلتلها انت صح و أنقذتيني من كارثة حقيقية

السؤال هنا:
ايه اللي كان هيحصل في الحالة دي لو كنت مأمنتش عليها ؟؟؟

محدش هينفعك

انا شفت اللينك . ممكن توضح لنا ايه اللى بتطلبه شركة مصر فى حاله زى اللى حصلت لك لو سمحت ؟

هحط الردود عن الشركة هناك
و هنا نخليه موضوع الحادثة و اهمية التأمين