عربيتي احترت فيها و من اللي بيجرالها

**walids** · 09-08-2009 12:23 PM

السلام عليكم

انا عربيتي فيها حاجه غريبه مش عارف ده حسد ولا ايه

طبعاً من كم يوم العربيه مكنتش بتقبل غيارات نهائي
المهم فيه واحد ظبطهالي كده بقت بتقبل ، بس قالي شكلها محتاجه اسطوانة و ديسك
و هي فعلاً شكلها كده لأن العربيه سحبها اتغير و صوتها بدأ يعلي و فيه رجرجه في الطلوع و كده

المهم النهارده انا راجع بالعربيه من مشوار بسيط ، حسيت انها مش طبيعيه ، و انها هتبطل مني لو وفت بالعربيه ، فمرضيتش اقف الا لغاية ما وصلت ، و فعلاً لغاية ما وصلت ، مورت العربيه ، و هوب ببص كده لقيت الماتور كانه بيقطع و بعدها العربيه بطلت !

بعدها قعدت اشغل المارش ، مفيش !! ، ادور ، الماتور مش راضي !!
قول يمكن بنزين !! مع اني لسه قبله ابربع ساعه حالاً كنت مديها ب 10 جنيه بنزين !!
برده ! ، روحت متمشي لغاية البنزينة بجركن ، و مليته ، و رجعت للعربيه ، و حطيت البنزين ، و ادور عشان البنزين يتحرك ، برده مفيش ، المارش شغال لكن الماتور مش راضي يقوم
مع اني متأكد ان العربيه فيها بنزين قبل كده بس قلت أرضي نفسي و اتاكد علشان كده زودتها بنزين تاني

المهم دلوقتي لما بجي ادور المارش ، المروحه بتدور برده بس بيطلع صوت مزج اوي اوي ، كان حاجه بتكسر ، مش عارف دي من المارش ولا ايه ، المهم ان برده الماتور مبيشتغلش

الصراحة انا محتار و مقلق جداً ، اول مره اتعرض لموقف زي ده و مش عارف اعمل ايه ، دلوني ايه ممكن تكون لمشكله دي و من ايه و ايه حلها

انا هشوف ميكانيكي برده بس عايز اسمعكم الأول

العربيه بيجو 305 ، و الحركه دي اول مره تحصلها

**samirayad** · 10-08-2009 09:36 PM

أنا عارف أن سير كاتينة ال305 جنزير
بس أهو برضه سير وليه عمر أفتراضى
وربنا يستر وميكونش جرى للسير حاجه

**walids** · 11-08-2009 02:45 AM

أشكرك جداً بشمهندس سمير

النهارده فعلاً بعد الكشف ، طلع علي كلام الميكانيكي أن الأبلتين عايز تغير ، و البوجيهات عايزه تتغير ، و الموبية عايزه تتغير

و اتغيروا فعلاً ، و اهو كل شيء تمام ـ بس السلانسيه مش مظبوط ، ديماً العربيه بتدي لون احمر في التابلوه علشان الأخطاء يعني
فهو بيقولي ممكن تكون علشان الاسطوانة و الديسك و ممكن تكون علشان الزيت

**samirayad** · 12-08-2009 07:31 AM

و اتغيروا فعلاً ، و اهو كل شيء تمام

الحمد لله ......أنه خاب ظنى ....وربنا ستر

بس السلانسيه مش مظبوط

ده بقه سببه ضبط نسبة خليط السلانسيه
الهواء للبنزين
روحله خليه يضبط الكربوراتير
وياريت تغير فلتر الهواء والبنزين كمان
أذا كنت مغيرتهمش من زمان ....وتجرب الأول قبل ماتروح للميكانيكى

ديماً العربيه بتدي لون احمر في التابلوه علشان الأخطاء يعني

لازم نعرف شكل الأنذارات بتاعة الأخطاء دى الأول
علشان نعرف جايه من أيه
ومن معرفتى عارف أن ال 305 نظام كربوراتير

فهو بيقولي ممكن تكون علشان الاسطوانة و الديسك و ممكن تكون علشان الزيت

لا هو مفيش حاجه بتدى أنذار للديسك والأسطوانه
ولكن ممكن لمبة الزيت تدى خلل وأنذار .....بس بيبقى معروف شكل لمبة الأنذار ( شبه المزيته اللى بينزل منها نقط زيت )
لو تعرف ترفعلنا صور عن الأخطاء دى .....أرفعها وعلم عليها