الموضوع: العربية خوفتنى اوى يا رب محديش ينحاز للسيارة

السلام عليكم ورحمة الله وبركاته

انا على فكره واحد من الناس اللى لسه مشتروش العربيه بس ان شاء الله قريب جدا هشتريها انا حبيت بس اطمن حضرتك من مخاوفك لانى انا واحد من الناس اللى قروا معظم مواضيع جين 2 القديمه والجديده على نايل موتورز ولى مواضيع كتير عن العربيه اثناء دراستى لشراها ممكن تفيد حضرتك وعلى الرغم انى معجب جدا جدا بالعربيه من غير لا دراسه ولا حاجه بس حبيت برضه ادرس الموضوع جامد اوى عشان لما العقل يوافق القلب ده يعنى الاقتناع الكامل

بالنسبه للعيوب اللى حضرتك قرتها و ازعجتك المواضيع دى كلها اولا نسبتها قليله جدا من مجمل المواضيع على المنتدى يعنى مفيش عيب جماعى بالمعنى المفهوم الا عيوب معينه كانت منتشره فى الموديلات الاولى للعربيه اللى نزلت مصر بس الكل اجمع على انها انتهت تقريبا من اول موديل 2008 وتقريبا اختفت فى 2009 وده من شهادات اصحاب العربيه على المنتدى ومستحيل ان حضرتك تلاقى حاجه فى الدفعات اللى الناس اشترتها قريب فيها عيب عام, دائما ابدا حاجات عبيطه ومش مؤثره ابدا على العربيه وده وارد جدا فى كل العربيات فى مصر وفى العالم كله لدرجة ان فيه شركات كبيره جدا جدا فى العالم بتوصل انها تسحب موديلات من اسواق العالم بعد ما بيلاقو عيوب خطيره وده اللى بيسموه recall والحمد لله العربيه مفيهاش اى حاجه الا شوية حاجات بسيطه جدا اعتقد انها هتتنسى قريب اوى وفيه نقطه تانيه برضه احب اوضحها فيه مواضيع كتير بتتكتب عن مشاكل فى العربيه بس الاخوه اللى بيكتبوها بينسوا انهم يقفلوها يعنى محدش يقول لك ان فى الاخر الموضوع طلع حاجه هايفه اوى ان الموضوع اتحل فى ثوانى فى التوكيل فالكل يظن ان الدنيا بايظه مع ان الموضوع خلص زى ما الجرايد احيانا بتفضح اى انسان لمجرد انه متهم مش مذنب فى اى مشكله وتكتب عنه صفح ولما ياخد البراءه يكتبوها فى سطرين ان كتبوها

بالنسبه لموضوع استاذ شريف ده اول مره فى تاريخ نايل موتورز على حد اطلاعى الدائم على المواضيع القديمه ان حد يحصل كده وبرضه مع اعتراف استاذ شريف بان سواقته عنيفه وفيها مخاطره بغض النظر عن ان الموتور اصلا فيه عيب تصنيع ولا لا بس الموضوع فى مجمله بغض النظر عن التفاصيل الدراميه بين الاستاذ شريف والتوكيل اللى انتهت بعمل كل اللى كان عاوزه وباعتذاره عن اى سوء فهم او عصبيه حصلت الا ان الموضوع ده يتحسب للتوكيل مش عليه على الرغم من عيوبه برضه اللى الكل بيتكلم عنها بس ممكن حضرتك تقول لى كام توكيل فى مصر يغير الموتور لحد كاملا فى مصر طبعا بعد مفاوضات بس اتغير كليا كانه اشترى عربيه جديده بالظبط بس من غير مقابل فده انا شايف انه نهايه كويسه ومش مهزله زى ما حضرتك شايف واعتقد ان كان ممكن نفس النتيجه دى تتحقق من غير اى خناقات

حضرتك هنا فى المنتدى كل حاجه واضحه وصريحه والكل بينقل تجاربه بشكل امين فانت اقرا كل المواضيع بدقه كبيره عشان احيانا المشاكل لما بتتكتب على النت بتوصل بشكل اكبر من حجمها ففكر مرة واتنين وربنا يوفقك ان شاء الله

شكراا على ردك