التقييم المبدئي للسيارة رينو سينيك 2009 - بعد 500 كيلومتر
السلام عليكم
من ساحل البحر الابيض المتوسط نرحب بكم و ننقل لكم (عبر شبكة اتصالات تلاتة و نص جي .... برضه اعلان !!) التقييم المبدئي
ده مجرد تقييم مبدئي للسيارة لسه فيه تقييم كامل بالصور بعد 2000 كيلو بعد ما التليين يكون خلص (1000 كيلو) و اكون جبت اخر العربية :)
بسم الله ...... نبتدي
1- الشكل العام:
السيارة عائلية ذات شكل ظريف جدا مستساغ .... و كمان غير منتشرة يعني لم تألفها العين بعد ......
2- الصالون
الصالون اتساعه رهيب .... اضف الى ذلك ان حوض موتور السينيك مضغوط و صغير جدا و ده زود مساحة الصالون ..... يمكن ما شفتش صالون واسع كده غير في الكارينز ..... الخامات فخمه جدا و الشكل عصري و انسيابي ..... فيه كمية ادراج تخزينية و احواض تخزينية خفية تصلح لتهريـ ....... إحم .... تصلح لنقل "احتياجاتك" بشكل امن ..... فرامل اليد كهربائية مما يوفر مكانها ...... الكراسي مريحة جدا و الكرسيين الاماميين بهما مسند للفقرات القطنية Lumbar support يمكن ضبطه للامام و الخلف حسب الراحة ...... التابلوه واسع جدا و يشيل حاجات كتير و الابواب تنجيدها فخم للغاية ...... الكونسول الاوسط يمكن تحريكه للأمام و الخلف بسهولة و يحتوي على وحدتين تخزينيتين واحدة كبيرة جدا و التانية صغيرة للركاب الخلفيين بالاضافة الى حامل لكوبين و طفاية كوب يمكن وضعها في الحامل ...... الفتيس مرتفع و راكب في التابلوه برضه ..... المساحة للارجل وهمية جدا .......
نيجي بقى لورا ...... الكنبة متقسمة تلات اتلات مش تلت و تلتين ..... و كل كرسي من التلاتة يمكن طيه للتخزين عليه و كذلك تحريكه للامام و الخلف حسب الراحة او لزيادة سعة الشنطة ..... الكرسي الخلفي الاوسط ضهره من ورا بلاستيك لامكانية استخدامه كترابيزة للشخصين اللي ورا (يلعبوا كوتشينة .... تكتب و تقرا .... تحط عليه لابتوب ..... الخ) و ضهر الكرسيين الاماميين فيه ترابيزة زي بتاعة الطيارة بتتفرد و تتني و فيها حامل اكواب برضه ...... غير حوامل الاكواب الخلفية اللي في القايم الخلفي
احزمة الامان الخلفية افضل بكتير من سيارات تانية كتير شفتها ...... كل كرسي ليه حزام باتنين كليبس ...... و فيه مكانين لربط الحزام ...... بحيث تجيب الحزام بالورب على جسمك تثتبه في الاول ..... و بعدين تشد الكليبس التاني و تثبته على الحوض في الفتحة التانية
مساند الرأس مريحة جدا و المساند الامامية قابلة للفرد للامام ......
3- الشنطة
اتساع الشنطة رااااااااااائع جدا ...... الصراحة الكارينز كانت اوسع ...... بس قشطة ...... اخدت صورة و العربية متحملة عالاخر و هاوريهالكم
4- تجربة القيادة .....
مبدئيا احب اقول لكل الاخوة احباب الياباني و اعداء الفرنساوي (و انا كنت واحد منهم لحد اسبوع فات) ان اللي ما ركبش فرنساوي ما ركبش عربية ..... الراحة و النعومة و السرعة و الثبات و استهلاك البنزين رووووووووووووووعة
العربية ناعمة جدا ..... و الباور ستيرينج لو نفخت فيه هيلف لوحده بس في نفس الوقت بدون التضحية بالثبات .... الفرامل قوية جدا و بتكلبش بشكل رهيب حتى مع زيادة وزن السيارة (حوالي طن و 400 كيلو فاضية) و مع التحميل الكامل ...... انا مرة سرحت و انا ماشي و الطريق وقف فجأة و اضطريت افرمل جامد و فرملت جامد و دهشت من سرعة التوقف الرهية
و تحية كبيرة جدا جدا جدا جدا للعفشة ...... كمان مرة العفشة ...... اول و تاني و تالت للعفشة ....... يخرب بيت النعومة ....... انا حاسس اني ماشي على وسادات هوائية.........
نفسي اعرف مين اخترع اختراع ان تكييف الاوروبي تعبان .... انا اهه نازل من ياباني و احب اقول ان التكييف لا يقل كفاءة نهائي عن الياباني سواء في سرعة التبريد او سرعة الوصول لدرجة التبريد المطلوبة او كفاءة التبريد .....
الاوبشنز وهمية ...... الكمبيوتر بتاع العربية بيدي قراءات دقيقة جدا و ظريف جدا ..... انا انبهرت صراحة ..... مثبت السرعة و محدد السرعة اضافة ممتازة للسيارة و انا على طول الطريق للساحل مستخدم المثبت و فعلا مريح جدا ان الواحد ما يبقاش خايف من الرادار او ان رجله تتقل شوية ..... المثبت بيغلط احيانا في المنازل او المطالع بس الخطأ لا يتجاوز 2 او 3 كيلومتر/ ساعة و بيلحق يلمها بسرعة
التسارع و الفتيس الصراحة حلوين بس احيانا الفتيس بيستغبى شوية يعني كنت واقف في الثبات باخرج من مدخل القرية عالطريق السريع و دست بنزين جامد و الفتيس اخد ثانيتين على ما قرر يعمل ايه و ده يمكن العيب الخطير الوحيد ......
جودة خامات السيارة و تقفيلها عالي جدا .....
الساوند سستم رائع .... التويترات الامامية اللي تحت القزاز الامامي رائعة و صوت الطرقعة بتاعهم حقيقي لدرجة عالية جدا و كذلك بقية السماعات ....
استهلاك البنزين رائع رائع رائع ..... دي تاني عربية اوتوماتيك اتملكها و اكتشفت ان استهلاكها قريب جدا من العربية المانوال اللي كانت معايا و يمكن احسن
طبعا انتوا عارفين طريق النطرون-العلمين كله مطالع تقريبا و دي بتحتاج عزم اكتر و بنزين اكتر ........ و مع ذلك انا فولت العربية قبل بوابات اسكندرية و صفرت العدادات كلها ...... و النتيجة ؟
8 لتر لكل 100 كيلو ..... او 12.5 كيلو للتر .....
مع وزن العربية و طول الشاسيه بتاعها
مع الحمولة اللي كانت فيها (هتشوفوا الصور ....... 3 شنط كبيرة + 2 وسط + عربية اطفال كبيرة + مرجيحة و عجلة + شوية حاجات تانية)
مع المطالع الرهيبة بطول طريق العلمين
مع ان العربية لسه في التليين (حسب تعليمات الكاتالوج ماعديش 130 اول 1000 كيلو)
انا ما توقعتش كده
و فيه اوقات كان معدل الاستهلاك كمان اقل (6 لتر لكل 100 كيلومتر) لما كان الطريق مستوي ...... و اقل لو في منزل كمان
نهايته ..... تقييمي للسيارة ..... 9 من 10 .......
تحفظي الوحيد على الفتيس و حركاته "القرعة" و على مساحة الشنطة اللي كان ممكن تبقى اكبر شوية ....
و اشوفكم في التقييم الكامل بعد 2000 كيلو ........ يعني بعد التليين بالف كيلو ..... اما نشوف امكانيات الموتور :049:
