حد يعرف واحد يعلم جيتار فى مصر الجديده او قريب منها
عرض للطباعة
حد يعرف واحد يعلم جيتار فى مصر الجديده او قريب منها
أستاذ طارق
فيه عندك cairo music center و ده ممتاز لتعلم الجيتار من ناحية و الموسيقي من ناحية
http://www.cairomusiccenter.com
معظم اللي بيعلموا جيتار بيعلموا الواحد إزاي يلعب الأغاني و إزاي إيده تمشي عليه و بس، إنما مبيبقاش فاهم النوتة اللي بيلعبها دي إيه و ال scale اللي هو ماشي عليها دي إيه و ممكن يلعب فيها إزاي .. بمعني أصح مبيبقاش عارف هو بيعمل إيه .. هو بيبقي عارف إن لو حط صباعه هنا و بعد كدة هنا هيحصل الصوت الفلاني اللي هو الأغنية الفلانية ! إنما لو فهم التركيبات الموسيقية هيبقي أسهل بعد كدة في فهم أي حاجة و لو الواحد حب يتعلم ألة جديدة بيتعلمها في تلت الوقت اللازم لأنه بيبقي بيفهم تركيبة الألة و بيبتدي يلعب السلالم اللي عارفها .
فيه كمان مركز في مكرم عبيد بس مش فاكر الموقع بالضبط لو تحب أسألك .
و فيه في الستوديوهات بيبقي فيه دروس .. انا مليش في ستوديوهات مصر الجديدة و مدينة نصر بس فيه ستوديو رحته مرة إسمه "جنوب" كان قرب جنينة مول .. و فيه أعتقد double vision برضه ده كان ناحية سانت فاتيما .. مش فاكر تحديداَ .
بس هو جيتار إيه ؟ كلاسيك ولا فولك ولا إليكتريك .. و يا تري جبته ولا لسة ممكن أديك ملاحظات تاخد بالك منها في الشراء .
و علي فكرة الجيتار من الممكن أن يتم تعلمه ذاتياَ .
و أي إستفسار تحت أمرك .
شكرا يا عزيزى موتو
انا هبتدى كلاسيك انشاء الله حكم السن و بعدين ممكن نشوف هنوصل فين
انا كنت بفضل ابتدى عود بس صعب شويتين
و ربنا ييسر الحال
المهم انا ماعرفش كتير بس عايز اتعلم اعزف موسيقى و ياريت لو حاجه تاحيه مصر الجديده و مدينه نصر
لو فيه نمر تليفونات تديهانى يبقى كويس جدا
و شكرا للمداخله يا موتو
شكرا على فيه cairo music center
انا كلمتهم و ناس كويسه
هاروح اشوفهم بكره ان شاء الله
هم محترمين جداَ فعلاَ و يعتبر قريبين لحضرتك
و إن شاء الله هحاول أجيب نمر تانية .
ماتعرفش اى نصيحه ممكن تديهانى
يعنى بس انا بحب الشرقى القديم
و موسيقتى المفضله هى الروك و مشتقاتها - طبعا الواحد اهدى شويه عن زمان بس تستمر هيه المفضله
و الله حيران مش عارف ابتدى من فين
اللى اعرفه ان العود صعب كتير
العود ده دمااغ تانية خالص , بس برده انت هتحكم بنفسك و تعمل اللى انت عايزه لما تتعرف على الاساسيات الاول و تتعرف على انواع الموسيقي و تتعمق فى اللعب على الجيتار .
لما بنقعد مع صاحبي و نسمع جيتار من تأليفه هو يعنى مش بيعزف اغانى لحد , بصراحة بيبقي مُبدع .
لكن لما بيمسك العود بيقعد لوحده :)
طيب انا نفسى اتعلم بيانو
فيه مكان ناحية الهرم
أسف علي التأخير لسة شايف الرسالة :)
بالنسبة للعود من صعوباته إنه ألة مفيهاش فريتات ... يعني ال neck مش متقسمة فا بتحتاج من اللي يتعلمه يبقي عنده معرفة سابقة و لو بسيطة بالنوتة الموسيقية و كيفية توزيع النوت المختلفة علي ال neck و السلالم ماشية إزاي و المسافات بين كل نوتة و اللي بعدها .. و طبعاَ الأذن الموسيقية .
الجيتار أسهل لأنه ألة fretted يعني معروف الواحد بيحط صباعه علي الوتر الفلاني في الفريت رقم كذا بيطلعله النوتة الفلانية ..
نصيحتي بصراحة يا طارق باشا إبتدي إليكتريك .. و هقولك ليه .
مبدئياَ فيه فتي كتير زي مثلاَ إن لازم تتعلم كلاسيك قبل ما تلعب إليكتريك .. و إن اللي بيلعب إليكتريك يقدر يلعب bass !
و الحقيقة إن الجيتار الكلاسيك يعتبر ألة مختلفة عن الجيتار الفولك و الجيتار الإليكتريك (الفولك و الإليكتريك تقريباَ نفس الألة بس دي بصندوق صوت و ده كهربائي و ممكن التحكم في صوته)
إنما الكلاسيك مختلف تماماَ في التركيب .. نوعية الأوتار و خامتها .. عدد الفريتات (النك بتاعة الكلاسيك أقصر) .. و المزيكا اللي ممكن تلعبها عليه .. طريقة اللعب .. الكلاسيك هتلعبه بإيدك عشان تطلع منه المزيكا اللي حلوة فيه زي الفلامنكو .. الفولك و الإليكتريك هتلعبه ب pick .. أو بإيدك برضه .
الكلاسيك هتطلع منه مزيكا متطلعش من الفولك و العكس .. مينفعش تلعب فلامنكو عالإليكتريك و الفولك و مينفعش تلعب riff روك عالكلاسيك .. فبكدة هما بيبقوا نظرياَ ألات مختلفة يجمعهم فقط إسم الجيتار .
فا اللي يحكم الموضوع التوجهات الموسيقية .. و بما إن حضرتك بتقول روك .. يبقي إليكتريك وش !! لأن اللي هيحصل اما تلعب كلاسيك إن هتزهق لأنك مش حابب المزيكا اللي بتلعبها .. إنما في الإليكتريك اما تبقي بتدرب علي أغاني عارفها و بتحبها أصلاَ و تقعد تكتشفها و تطلع أغاني من درج الذكريات و تنزل النونة بتاعتها من عالنت و تجرب تلعبها .. هيبقي ال progress بتاعك مختلف تماماَ !
إنما لعب الكلاسيك is getting much of what you don't need زي ما بيقولوا .. في رأيي ضياع وقت .
بالنسبة لإشاعة الكلاسيك قبل الإليكتريك فا مش صح خالص .. اللي صح إنك تلعب فولك قبل الإليكتريك ده يبقي كلام ينفع نتناقش فيه .. لأن الفولك بتطلع النوتة زي ما لعبتها بالضبط .. لو صباعك مش ناشف عالوتر أو في مكان غلط في الفريت هتسمع زن .. صوته كلين .. عكس الإليكتريك اللي ممكن بالإفيكتس اللي بيلعب يبقي بيعمل بلاوي و محدش واخد باله .. فا رأيي تجيب إليكتريك و تلعب عليه clean يعني من غير إيفيكت .. منه للأمبلافير كدة أكنه فولك .. و اما إيدك تمشي شوية جرب بقي إيفيكتات و عيش و حط ديستورشن و إلعب guns n roses :)
انت كده قريت دماغى صح
انا اصلا بكره الفلامنجو و الجيبسى و كل ما يمت بصله للنوع ده والحوارات بتاعه الجيتار الكلاسيك بسس كل واحد يقوللى ابتدى كلاسيك و انا اصلا مش طايقه
و كمان صوابعى قصيره و مليانه يعنى هيطلع عينى من غير pick
فكرت اجيب الاول اكوستيك بس طلاما كده كده هنقل اليكتريك يبقى ادوس على طول
طيب فيدنا كده ممكن نبيتدى منين يعنى اجيب ايه و بكام
انا دورت اونلاين ولاقيت ناس بتتكلم فى حاجات صينى و حاجات ياماها و حاجات مش فاهم اسمها :)
و ناس شكرت فى pearl river كويس للتعليم فى الاول
قلنا بقى افادتك فى الموضوع ده و ماليا برضه عشان مايضحكش عليا فى كتير
أنا قرأت الموضوع و حبيت بس أنقل بعض أقوال أهل العلم من باب التذكرة...
فإن مما يؤلم القلب ويدميه انتشار تلك المعازف بين المسلمين انتشار النار في الهشيم...
وقد قال صلى الله عليه وسلم: "ليكونن أقوام من أمتي يستحلون الحر والحرير والخمر والمعازف" رواه البخاري،
فتضمن هذا الحديث الإخبار عن حال كثير من المسلمين وما هم عليه من الإسترسال في هذا المحرم، بحيث إن الموسيقى تعومل معها كما يتعامل مع الحلال، فهذا الحديث من أعلام نبوته صلى الله عليه وسلم، حيث تضمن الإخبار عن مغيب وقع، وتضمن أيضا أن المعازف (آلات اللهو ـ الموسيقى) حرام لدلالة كلمة يستحلون، وهي لا تكون إلا للمحرم...
فقد نقل الإجماع على حرمة استماع الموسيقى والمعازف، جمع من العلماء، منهم الإمام القرطبي و ابن الصلاح و ابن رجب و ابن القيم و ابن حجر الهيتمي
تمام .. حضرتك قوللي ال budget و أقولك الأنواع المتاحة .
و يا ريت تعمل مبلغ للجيتار لوحده و الأمب لوحده .
تمام أوي حضرتك ممكن تجيب جيتار ibanez و أمب مارشال صغير (أنضف أمبات) .. و عامة ممكن تجيب نوع أمب أقل بس أحسن و أنقي صوت فعلاَ مارشال .. و هسأل برضه و أقولك علي جيتارات معينة .
زي ما قلتلك ابتدي اليكترك و نفض للباقي لأن كدا كدا في الاول صوابعك حتوجعك ! فا توجعك مره احسن ما توجعك 10 مرات
و حيعتمد علي نوع الموسيقي اللي بتحبها
لو 2500 للجيتار بس جيب ibanez زي ما موتو قالك بس قبل الماركه حدد المواصفات
يعني هات jumbo frets خلي دي اهم حاجه عندك عشان متتعبش نفسك في اللعب
لو عاوز زياده في الحوارات و الامكانيات هات البريدج floyd rose بس ساعتها متسترخصش في الجيتار عشان حيطلع عينك لو نوعها وحش
ابقي بص علي الفروق في مواصفات الجيتارات و متتسرعش في شراه خالص
يستحسن تخلي الامب في ميزانيه تانيه !َ اصلك ممكن تغير الجيتار عادي لكن الامب نادرا ما بتغيره فا اشتري حاجه كويسه مره واحده