الموضوع: إحنا عيزين ناخد حقنا من القانون الجديد, أو حتى القديم

أكيد طبعا مش كلنا عرفنا قانون المرور الجديد عاوز مننا إيه أو على الأقل أخدنا وقت شويه على مافهمناه.
القانون بيقول إنك ممنوع تتجاوز السرعه المقرره
وممنوع تركن عربيتك في مكان ممنوع الإنتظار
وممنوع تمشي عكس الإتجاه
وحاجات كده المفروض إنها بديهيه
وطبعا القانون ده ماعندوش خيار وفاقوس, يطبق على الكل والمخالف هاياخد بالجزمه وهايتبهدل ويتمرمط ويطلع عينه وعين الست والدته ومش بعيد يتحبس
مش ده اللي قريناه كلنا؟

طيب أنا ليا كام طلب كده يا ريت القانون الجديد يحققهولي, أو أي قانون إنشالله يكون قانون أوم (بتاع الكهربا)

- زي مابلاقي الأمين ناططلي جوا العربيه أول ماركن جنب الرصيف عشان يلبني المخالفه المتينه أو ياخد حسنته ويتكل, من حقي إني ملاقيش أتوبيس سياحي فاخر راكن في شارع الهرم الساعه 4 العصر قدام البازار قافل الشارع ونفس الأمين ومعاه واحد تاني واقفين يحرسوه

- وزي مابيطلع الأمين (ده أمين تاني على فكره) من مخبأه عشان يلبسك الأساور الحديد عشان ماشي عكسي في شارع جانبي, من حقي إن يبقى فيه يافطه توحد ربنا تقول الإتجاهات وياريت تكون معدوله ووشها للشارع.

-وزي مابيرجع الأمين الأولاني يلبك المخالفه المتينه عشان ماشي عكسي (تاني), من حقي إني مالاقيش مكروباص إلترامكو داخل عليا عكسي بسرعه جنونيه وهو بيشاور للأمين بيصبح عليه, وكمان من حقي إني ملاقيش عربيه كارو في شارع الهرم بتاخد الU turn بالمقلوب وبيقطع الشارع بالعرض عشان يوصل الكرنب لسوق العمرانيه وماشي مبنتهى البروووووووودددددد

-وزي مالأمين السئيل بيرزعك مخالفه ملصقات مع إنها أصلا كانت مخالفة أضواء مبهره بس هو بيعمل معاك الواجب وبيخليها ملصقات عشان مايسحبش رخصة المركبه عشان ياخد فوق نفحته نفحه, من حقي إنني مالاقيش سور مبني على الأرض بيقولوا عليه مطب ومطلوب مني إني أتسلقه بالعربيه ولا عزاء للعفشه

-وبمناسبة الملصقات برضه, أظن من حقي إني مانزلش الشارع ألاقي عربيتي متخبطه نتيجه إن فيه واحده معاها عربيه matrix ولما لقيت نفسها مابتعرفش تركن وبتخبط قدام وورا راحت مركب صدادات حديد عشان ماتبقاش قلقانه وهي بتركن, ده طبعا غير المواسير الحديد اللي بيركبوها سواقين المكروباصات

-وزي ما سيادة الأمين بيطلب منك تقف في الإشاره الحمرا, تخيل بقى إن في الإشاره اللي بعدها لو لقيتها حمرا ووقفت هتلاقي العسكري بيزعقلك وبيقولك "خش يا ملاكي", المهم إن من حقي إني ماقفش في طريق مصر الإسكندريه الصحراوي (والله العظيم) 4 ساعات واقف طافي الموتور ياريت عشان حادثه , لأ, absolutely, ده عشان فيه شخصيه مهمه (قوي) في الهرم بتتفسح. هو الشارع ده بتاع الشعب ولا بتاع الحكومه؟

-ويمكن يكون من حقي إني ماشوفش إشاره فيها كل الألوان أصفر بس, وانت وشطارتك بقى في الكبس

-ويمكن أطمع شويه ويبقى من حقي إن العسكري مايقفش يتفرج على الناس وهي بتكسر الإشاره على الناس التانيه والدنيا تضرب تقلب وهو واقف حاطط إيده في وسطه وساند على الإشاره (اللي عادة بتبقى مطفيه أو فيها درجات الأصفر بس) طب على الأقل يقعد يشاور بإيده كده كأنه بيقدف في مركب (قصده: خش خش خش) مع إن الدنيا واقفه أصلا

أنا مش هجيب سيرة التوكتوك عشان كده يبقى طمع (أنا مره شفت توكتوك خبط كلب فاتقلب, التوكتوك هو اللي اتقلب ماتفهموش غلط)
معلش طولت عليكوا, حسبي الله ونعم الوكيل ويجعله عامر

انا عايز حقي من عين القط اللي في كل حتة و الحفرة اللي في الطريق علي كوبري أكتوبر بين الزمالك و الدقي بالذات .