أوبترا 2008

**TAMERSHAFIK509** · 24-10-2007 11:23 AM

السلام عليكم و رحمه الله و بركاته
بداية احب ان اشكر كل القائمين و المشاركين فى هذا المنتدى للمجهود الرائع الذى وجدته فى الردود وسرعة الأستجابة.
بداية هذه اول سيارة امتلكها و بعد بحث دقيق فى المنتدى عن اراء الاعضاء فى النوبيرا و الأفيو لان القرض المتاح كان فى حدود 75000جم طبعا كانت الأفيو جديدة من حيث الشكل لكن النوبيرا كانت واسعة لكن موديلها قديم و كنت محتار جدا بينهم لكن الحمد لله توافرت لى فلوس زيادة و استقريت على الأوبترا موديل 2008 و خصوصا ان الفرق بينها و بين موديل 2007 الف جنيه فقط.
على فكرة انا حصلت على القرض من شركة كونتكت و تقريبا هى اقل شركة تقوم بنفسها بالتقسيط لانى عندى مشكلة فى موضوع قروض البنوك و الربا و على فكرة هى نسبتها 8,6% سنويا و ملقتش غير شركة قبنورى اللى بتقسط بنظامين الأول خاص ببنك باركليز و الأخر تقسيط ذاتى ب 11%.
عموما انا هستلم العربية النهاردة و هقولكو الأخبار النهاردة باذن الله؟[/b]

**TAMERSHAFIK509** · 24-10-2007 11:51 AM

شكرا عل الرد السريع ده
اولا شركة كونتكت الناس فيها محترمة جدا و دا مش هتلاقيه فى اماكن كتير ,بخصوص الأجراءات
اولا الأوراق المطلوبة:-
1-مفردات مرتب من مكان عملك او كشف حساب من بنك الCIB لو كان مرتبك بيتحول عليه.
2-اى ايصال يثبت وجودك فى مكان سكنك مثل وصل كهرباء/تليفون/غاز حتى لو باسم والدك.
3-صورة البطاقة الشخصية.
4-تتصل ب أ/مصطفى عبد المحسن (0100182226) و تقولة يقابلك فى المكان اللى انت عايزة معاه ابليميشن علشان تملاه او تروح الشركة نفسها 1 شارع العزيز عثمان-الزمالك(27361234) او اى فرع لبنك الcib.على فكرة ممكن يقلك ان الابلكيشن ب 100 جم بس هو فى ايده انك تملاه ببلاش علشان كده ابدا انت و قوله ان زمايلك ملوه ببلاش.
بعد ارسال الورق يوم هيتصل واحد بيك و يقول انه عايز يقابلك اما فى مكان الشغل او فى البيت.و هيسالك عن دخلك و استهلاكك للكهرباء و مصاريف بيتك تقريبا فى حدود كام و بيتهيقلى دا علشان يحسبوا هيبقى قد قية من مرتبك و تقدر تدفع القسط و لا لأ.
و تستنى فى حدود يومين و هيتصل بيك واحد من خدمة العملاء و يقلك ادفع مقدم فى اى مركز او معرض معتمد (يعنى عنده فاتورة ضريبية و سجل تجارى) و خليه يبعت رقم الشاسية و الماتور و فاتورة مبدئية على فاكس شركة كونتكت.خلى بالك ان عندهم لسته بالاسعار الرسمية يعنى مثلا النوبيرا سعرها الرسمة 75 لكن احجز و استنى لحد 3 اشهر و بتتباع فى بقية المعارض ب 78 و بالتالى كونتكت هتمولك ب 75 و انت تقلل المقدم و تدفع ال3 الاف الفرق للمعرض.
بعد كده بيتصل بيك و بيقلك تعالى ادفع الفلوس و امضى العقد و يروح واحد معاك يدفع الشيك و تستلم العربية.
كمان هما بيعملوا تامين على الحياة مجانا.
التامين الشامل بتاعهم 2,8%سنويا تدفع على اقساط شهرية يعنى تضرب سعر العربية فى النسبة دى و تقسمها على 12 و تزودة على القسط الشهرى.و النسبة دى متقلش لان بعض المعارض بتقلك انها بتقل السنة الثانية و كده بس انا سمعت ان تامين المعارض ده جزئى يعنى بعد 3 سنين زى ما انت بتدفع جزء من التامين هو كمان هيدفع جزء من اى حاجة باظت بحجة ان سعر العربية دلوقتى رخص.

**Migo123** · 24-10-2007 12:43 PM

النسبة دى متقلش لان بعض المعارض بتقلك انها بتقل السنة الثانية

هي ممكن النسبه ما تقلش بس قيمة العربيه تاني سنه بتقل حوالي 10%- 20% يعني مبلغ التأمين بدل ما هيبقى 75000 مثلا هيبقى 65000 ... وده طبيعي كنسبه استهلاك للعربيه........ وده بيفرق فقط في حاله تكهين العربيه (حادثه جامده قوي لا قدر الله) وهنا المؤمن ليه الحق في مبلغ التأمين بالكامل واللي مش مفروض يزيد عن تمن العربيه في السوق بأي حال من الاحوال .....
بس ده ليس له علاقه بنسبة التحمل في حالة التعويض يعني سواء اول سنه او تاني سنه نسبة التحمل المفروض تكون 100% من التصليحات .......... لكن في شركات بتحملك جزء من التكلفه تحت مسميات مختلفه ( استهلاك.... او قطع غيار قديمه بتبقى ليها قيمه كانو زما بياخدها ودلوقتي بقو بيخصمو تمنها ويدهوالك ترميها انت ......)

**Air Karam** · 24-10-2007 01:34 PM

الف مبروك و ربنا يباركلك فيها و يحفظهالك و يحفظك منها.

**TAMERSHAFIK509** · 24-10-2007 03:08 PM

المشاركة الأصلية كتبت بواسطة Air Karam

الف مبروك و ربنا يباركلك فيها و يحفظهالك و يحفظك منها.

الله يبارك بيك,وعقبال لما نباركلك على اختها

**osman hisham** · 24-10-2007 04:52 PM

هل يوجد أختلاف بينها و بين 2007
و أيضا هيه لسه كورى و لا أتجمعت

**bassam nagy** · 24-10-2007 09:46 PM

الف الف مبروك ربنا يديك خيرها ويبعد عنك شرها

**Air Karam** · 25-10-2007 12:27 PM

لا يوجد فرق بين 2007 و 2008 و الاثنين كورى يمكن الفرق الوحيد فى عدد الرحلات بيديك Trip A and trip B
كونتكت شركة تتبع البنك التجارى الدولى حسب كلام احد مندوبى مبيعات شركة المنصور للسيارات.