الاستفزاز في المطار

**الريس** · 24-10-2007 07:37 PM

بداية يا جماعة الخير انا سافرت السعودية امبارح في شغلانة سريعة كده ممكن شهر و لو حد حابب اجيبله اي حاجة من هناك خصوصا الادوية الي ناقصة او مش موجود عندنا انا تحت امركم

امبارح بقى في المطار (الجديد!!!!) و بعد كل الاجراءات و الحركات وصلت للGATE ودخلت علشان استنى نطلع الطيارة
الصالة مليانة علامات ممنوع التدخين
و الصالة مليانة مدخنين و اغلبهم سعوديين
انا مش بحب الدخان ... و كمان مش بحب الاستهبال .. وخصوصا لو كانت الناس دي هتنزل بلادها تمشي بالقانون و رجلها فوق رقبتها
رحت كلمت الامين اللي على القاعة
قلتلو هو مش التدخين ممنوع يا استاذي
قاللي لا و لا يهمك خش دخن كده على اي جنب و كبر

قلتلو لا يا سيدي انا اللي مش عاوز حد يدخن
قاللي طيب ما تروح تقعد في اي حته فاضية و متضايقش الناس ماهو اصلهم كلها شوية صغيرين ومش هيعرفوا يدخنوا في الطيارة !!!!!!!

مش هطول عليكم خناقة كبيرة و جبت المقدم بتاع المطار الجديد والناس طفت السجاير بس كله بيعاملني على اني مخلوق فضائي اصابته لوثة عقلية من الجو بتاعنا

انا محبط جدا

**sokasoon** · 24-10-2007 08:09 PM

10/10 يا ريس علشان يلتزمو بالقوانين وياريت احنا

كمان نلتزم علشان هما كمان يلتزمووو لان طول

ما احنا مستهترين هما كمان هيستهترو بينا

**sherif_84** · 24-10-2007 08:15 PM

بص ياباشـا طالما انت صح وتصرفاتك كلها صح تأكد ان ربنا سبحانه وتعالى معاك دائمـا ومش هيسيب حد يسخر منك أو يتريق عليك إلا وهيرودهاله فى حاجة تانية وعموما ماتزعلش ولا تتأثر للأسف بلدنا هى اللى عملت قيمة للسعوديين دول عننا عشان كده السعوديين بيتمرعوا فى مصر انما فى بلدهم ماشيين زى الألف
ربنا يهديهم ويهدى الناس اللى بتشوف التصرفات الصح على انها تصرفات ساذجة ولك تحياتى

**hazem_khidr** · 24-10-2007 08:29 PM

تصرفك تمام يا ريس
انت لا مخلوق فضائي ولا حاجه انت بني ادم محترم و اللي بيعمل غيرك دا مش بني ادم خالص
لو انت كنت عندهم في مطار السعوديه و دخنت و مكتوب ممنوع التدخين شوف ايه اللي كان حيحصل.!!!!!!!!
يبقي لما نشوف غلط نصلحه لو بادينا

**sokasoon** · 24-10-2007 08:33 PM

المشاركة الأصلية كتبت بواسطة sherif_84

بص ياباشـا طالما انت صح وتصرفاتك كلها صح تأكد ان ربنا سبحانه وتعالى معاك دائمـا ومش هيسيب حد يسخر منك أو يتريق عليك إلا وهيرودهاله فى حاجة تانية وعموما ماتزعلش ولا تتأثر للأسف بلدنا هى اللى عملت قيمة للسعوديين دول عننا عشان كده السعوديين بيتمرعوا فى مصر انما فى بلدهم ماشيين زى الألف
ربنا يهديهم ويهدى الناس اللى بتشوف التصرفات الصح على انها تصرفات ساذجة ولك تحياتى

شريف باشا واحشنى يا راجل بقالى فترة مش شايفك

**hatem_badawe** · 24-10-2007 08:52 PM

هما فاكرين احنا خادمين عندنا والي ميعرفوش يعملوة عندهم يعملوا عندنا

زي الي حصل في حديقة الحيوان السعودين دخلوا الحديقة وعاكسوا كل الستات ببشاعة (علي اساس ان المصريات متربين كلهم في شارع الهرم)

ولما الستات استنجدوا بالنقطة الي في حديقة الحيوان

ضربوا العساكر وامين شرطة وكسروا شباك تقريبا (علي اساس ان الرجالة المصريين متربيين في الهند ) وخدم عندهم

**PRO-DRIVE** · 24-10-2007 09:02 PM

عموما عادي مش اكتر ما المصريين بيعملوه هناك

**ahmed1981** · 24-10-2007 09:22 PM

إنت عملت الصح
جزاك الله خير الجزاء وأكرمك الله
أنا زيك كده ياما إتخانقت في مواصلات عشان السجاير
ومرة خليت الميكروباص يقف في طريق مصر إسكندرية الصحراوي عشان واحد ولع سجارة والسواق قاله إنزل دخن ولما تخلص هنمشي المهم الزبون لقى الميكروباص كله بيبصله قام رامي السجارة وقالي مش عشانك عشان الناس اللي معانا بس .. طبعاً إكتفيت بعدم الرد عليه وهذا هو السلوك الصحيح مع السفهاء

**Nader** · 24-10-2007 10:24 PM

متستغربش يا باسم.. اللى اتعود على حاجة صعب يغيرها، يعني لما تشوف حاجة غلط ومتقدرش تمسك نفسك على الاعتراض شيئ طبيعي.. ومطلوب كمان، اما الامين اللي متعود على كسر القوانين فكسرها عندة هو الطبيعي وليس المطالبة بتتطبيقها... للاسف دة بقى نظام البلد.

المهم تروح وتيجي بالسلامة ان شاء الله.

الموضوع: الاستفزاز في المطار

LinkBack

أدوات الموضوع

عرض

الاستفزاز في المطار - انشر الموضوع فى :

-

-

-

-

-

-

المواضيع المتشابهه

الاستفزاز الى اين يقود اصحابه...

ايه الاستفزاز ده

ما زال الاستفزاز مستمر

عن الاستفزاز وماجنوتن.. وأشياء من هذا القبيل

الكلمات الدلالية لهذا الموضوع

المفضلات

المفضلات

ضوابط المشاركة