يا رتنى ما نزلت سوق السيارات

**sayedmsm2** · 15-08-2009 08:40 PM

الجمعة اللى فاتت نويت اشترى عربية لانوس
اخدت معايا سمكرى ورحت السوق
عربيات كتيييييييييييييير
تجار كتييييييييير
عربيات مشغولة وعربيات متغير فيها حاجات ومحتجات
دوشة وزحمة وغش
وناس بتحلف بالله كدب
واللى يزعل
ان العربيات السليمة هناك قليلة
المهم لقينا عربية لانوس 2000 تكييف وباور بس
ورشة جنبين
شكلها بنت ناس
دا كان راى الاسطى السمكرى اللى معايا
سالنا الراجل بكام قال 46000
طب والاخر
قال 44000
وطب واخر كلام
قال 43500
قلت له اخدها على 42000
الراجل قال لا
المهم قلت للسمكرى تعالى نلف لفة ونرجع له كمان ساعة كده
لفينا ولا عربية مناسبة لقيناها
لانى بدور على لانوس فى حدود43000
والموديلات العالية سعرها اعلى من كده
المهم قررت ارجع للراجل وهو بالمناسبة تاجر من الفيوم
ورجعت
لقيت العربية اتباعت
بكام ب 43000
المهم الواحد زعل طبعا
قررت اروح
وروحت فعلا
اكتر من 5 ساعات ف عز الحر والشمس والجدل وحرقة الدم
وخلاص توبة نزول السوق
وهدور على عربية بيتى م الوسيط
ولا اى موقع لبيع السيارات
ولا بلاش مش عايز عربيات
ماله المترو والاتوبيس
ماله الموتو رجل
ولو حد فيكم يعرف حد عنده لانوس بيتى ف الحدود اللى معايا يقول لى
او حتى اكسنت او اكسيل
ولو حد فكر يروح السوق يشترى او يبيع
لازم يفكر بدل المرة الف مرة

**samirayad** · 16-08-2009 12:04 AM

بصراحه عندك حق
أنا روحت سوق العاشر حوالى 5 مرات
ومن اللى شوفته وعدم أقتناعى
قررت مجبش الا زيرو .....وقعدت سنتين من غير عربيه على ماجبت اللى معايا

**M.FOUAD** · 16-08-2009 12:35 AM

اصبر حضرتك مش من اول مرة روح تاني جايز تلاقي حد جاد في البيع لحد ما تلاقي في الوسيط او اعلانات النت

**moudy88** · 16-08-2009 01:56 AM

حضرتك متستعجلش والعربيه اللي من نصيبك ومكتوبالك هتتجيلك لحد عندك ... لو عايز عربيه بيتي ومش من تاجر عليك وعلى الوسيط ..انا اشتريت عربيتي عن طريقه ومن ولاد ناس ومحترمين جدا...والسبب لان الاعلان في الوسيط بيتكلف 150 جنيه ومش ممكن التاجر يعمل اعلان بالمبلغ ده ...وممكن تدور عالنت في car100100 و contactcar وmasrawy هتلاقي عربيات كتير

**A_H_M_A_D** · 16-08-2009 02:23 AM

انا لما جيت أشتري نزلت السوق 3 مرات و ملقتش اللي أنا عايزه
و فعلا الغش هناك كتيرا جدا
وفي الاخر إشتريت من إعلانات الوسيط

**Terrible_DaRsH** · 16-08-2009 02:24 AM

بلاااااااااش عربيات الوسيط نهائي و عن تجربة .

تشوف كلام فى الجريدة و تروح تلاقى كلام تانى خالص .

كنت شفت عربيه فيه مرة مكتوب فيها طقم صوت و زينون و جنوط سبور , بصراحة حسيت انى رايح اشوف 320 i .

رحت لاقيت كاسيت زبالة و سماعات صينى و حلة مرمية ورا و لمض تعبانة مسميها زينون و جنوط مستعملة حاجة قرف بجد رحت شاتم صاحب العربية و قلت له راعى ضميرك يا اخى تخلينا ندب المشوار ده كله على كلامك !

و ليا تجارب اصدقاء كتيرة جدا مع الوسيط فنصيحة ابعد عنه و ان شاء الله ربنا كاتب لك حاجة احسن بس مش وقتها .

**Haitham10** · 16-08-2009 02:32 AM

حرص من عربيات النت لان 90% منها هما الي كانو في السوق وغالبا مع تجار وسماسره وفيها شغل نصب....

**eslamrace** · 16-08-2009 02:43 AM

بص رايي تصبر لحد متلاقى حد محترم عايز يبيع من غير غش وده هياخد وقت انت وحظك لو مستعجل ممكن تاخد فكره من الموقع ده
انا مجربتوش قبل كده فى الشراء بس لو حابب تعرف المبلغ اللى معاك يجيب ايه
Car100100 - Used Cars - سيارات مستعملة

واتمنالك انك تلاقى ما تريد لانى حاسس بيك لما حبيت اغير عربيتى واجيب البرايد وبالمناسبه فكر فى الكيا البرايد لانها عربيه محترمه انا معايا اوتوماتيك مو2000 كنت جايبها ب37500 بس فول ابشن

وانا تحت امرك فى اى استفسار

**magyver** · 16-08-2009 03:02 AM

ربنا يوفقك

**amrico** · 16-08-2009 03:36 AM

اللي بيحلف كذب عشان يبيع عربية ايه نوع الإيمان اللي في قلبه
دا غير اللي بيحلفوا بالطلاق وعايش مع اهل بيته في الحرام
انا بطلت اقول للناس دي اتقوا الله لأن الله عز وجل ملوش مكان في حياتهم
يا راجل بيتهيألي حتى كفار قريش كانوا بالرغم من كفرهم عندهم اخلاقيات العرب والشهامة، معظم الناس اللي في المناطق دي بقوا العن من كفار قريش