انا خلاص ياجماعة عداد عربيتي فاضله بتاع 20 او 30 كيلو كمان ويوصل ل 1000 كيلو (وطبعا ده عشان انا روحت الرحاب كذا مرة عشان موضوع الجنط والكاوتش بتوع الحادثة وكمان لسة رايحة مشوار ل 6 اكتوبر امبارح عشان كده العربية دخلت صيانة الالف بسرعة ) وسألتهم في التوكيل معايا أد إيه لحد ماعمل صيانة الألف قالولي لحد 1500 كيلو وده طبعا كويس.
بس دلوقتي انا مش عارفة اعمل الصيانة فين؟
هل لازم اروح اعملها في ابو رواش؟ بس ده هايستلزم يوم اجازة من الشغل (رغم اني ده صعب جداً لإني مش فاضل في رصيد اجازاتي غير يوم واحد فقط وشكله هايضيع في مشوار برده ) وانا اجازتي جمعة وسبت، بفكر اروح يوم السبت لكن في ناس بتقولي يوم السبت الدنيا بتكون زحمة اوي والعربيات بتتأخر وبتتكروت كمان إيه رأيكوا؟

هل ده برده هاينطبق على رمضان يعني يوم السبت في رمضان هايكون زحمة ولا هاتكون الدنيا رايقة شوية؟

طب لو عملت الصيانة في مركز معتمد زي كارفان الرحاب مثلا (اصلهم ميزتهم يعتبروا قريبين من شغلي وكمان بيشتغلوا جمعة وسبت ولحد الساعة 9 باليل يعني ممكن اروح يوم بعد الشغل كمان) تفتكروا ده هايكون كويس ولا لازم غبور نفسهم هما اللي يعملولي صيانة الالف؟
برده قولولي ايه اللي بيتعمل في صيانة الالف بالظبط وبيتكلف حوالي كام وفي حاجات لازم تتعمل عندهم ولا ممكن اعملها بره ارخص؟

بالنسبة للعربية هي ادائها كويس معايا لكني حاسة بتقل بسيط في نقلات الفتيس وصوت الموتور عالي شوية ودول هاقولهم عليه لما اروح، والكاسيت كان ساعات بيقلب سي دي لوحده ويرجع يشتغل فلاشة لوحده تاني بس المهندس اللي في مركز كارفان قاللي لما تشغلي الفلاشة شيلي الاسطوانة ولو هاتشغلي السي دي افصلي الفلاشة وفعلا من ساعة ماعملت كده مبقاش يقلب تاني .

مستنية ارائكوا بقي وياريت اللي يقترح اني اعملها في ابو رواش يقوللي مواعيدهم ايه في رمضان (رغم اني مستتقلة موضوع الصيانة ومشوار ابو رواش ده في رمضان والدنيا صيام ) بس لو مفيش حلول غير كده هاعملها في رمضان وامري لله بس عموما رأيكم يهمني وماخاب من استشار .