استفسار :من خبراء المنتدى ومستشارنا محمد بك والباش مهندس سمير

انا كان ليا استفسار عن اسباب حدوث عتب فى بلوك الماتور؟
ياترى دة بيكون عمرو افتراضى ولا سوء استخدام او السواقة العنيفة والحرق والقرص على المكنة بيأدى لذلك
وازاى نتغلب على العتب الموجود فى البلوك مكان حركة البساتم فوق وتحت لانة هيخلى البستم يلق فى حركتة
هل لينات نحكم بيها العتبة دى ولا تعمير وخرط ولا نغير مكنة افضل واوفر وانا شخصيا بأيد اخر حاجة نغير مكنة
بدل العك والخراطة
انتم لو تفتكروا كنت قولت لحضرتكم ان ابن خالتى عربيتة الانوس 2004 ماشية 85 الف كيلو كان شريها مستعملة الفترة الاخيرة بقت بتاكل زيت كتير ودخنت وعزم المكنة حوالى 50 % وكنا فكرينها هتيجى على قد طقم شنبر وخلاص على كدة
بس طلع الموضوع كبير والبلوكطلع معتب وراكبلة لينات قبل كدة
طبعا الميكانيكى......... قال افضل شىء نجيب نص مكنة تحت وعلى فكرة وش المكنة مفهوش كلمة ودة افضل حل واوفرمن التعمير ...يا اما نعمر المكنة ومش هتطلع قد كدة وهتبقى خشة وشوية وهدخن تانى
واشترينا نص متور تحت وحلينا الكنة وبعدين ركبنا المكنة بالنص الجديد( استيراد)والحمد لله على كل شىء

انا عملت الموضوع دة مخصوص لسببين نعرف الاسباب ونخلى بالنا ونقدر نحافظ على المكنة
والى يشترى عربية استعمال يخلى باااااااااااااااااالة كووووووويس اوووووووى عشان عشان ميفجئش بحاجة مش متوقعها من العربية
بس الى مستغربلة ان المكنة كانت موس وولا باين عاليها حاجة

واسف جدا للأطالة

اقتباس:

---

بس طلع الموضوع كبير والبلوكطلع معتب وراكبلة لينات قبل كدة

---

أشك فى الكلام ده ......يعنى أيه مركب لينات لغرف الحريق
غرف الحريق لما بتعتب فى المحركات الصغيره
بيتم خراطة البلوك سلندر وأستعمال بساتم بشنابر over size
وغرف الحريق من الداخل بتعمل عتب لما ينكسر شنبر مثلا بتاع زيت
زى موضوع أبن خالتك
أو لما تستعمل بستم بشنابر أاقل من المناسب لغرف الحريق
والبساتم تبقى حركتها مش منتظمه داخل غرف حريق البلوك
يعنى حركه مش تردديه مستقيمه أثناء الحركه التردديه للبساتم داخل غرف الحريق

اصلا صعب جدا تحصل الحوارات دى كلها فى عربية ماشية 85 الف فقط و بتستعمل اسعمال ادمى

MMamdouh

والله ياجماعة الكلام دة الى حصل لما فتحنا المتور لقينا متركبلةلينات والشنبر مفهوش حاجة
والعربية فعلا عدادها 85الف الا بقى لو ملعوب فى العداد اصل شاريها مستعملة من حوالى 7 شهور
ما الى خلانى ارجع ليكم فى الكلام دة انى شايف حاجات غريبة فى الموضوع مش راكبة معايا اولها عداد العربية

لينات أيه اللى كانت راكبه.....
ياريت توصف شكلها

يا هندسة اللينات دى بتعوض الخلوص الناتج عن تعتيبة البلوك عشان البستم تكون حركتة مستقيمة (بدل الخراطة وتوسع بتركب لينات بتعوض الخلوص اللى موجود ) وطبعا انا من رأئيى الشخصى ان شغل الخراطة والينات دة عك ومش هيطلع بالنتيجة المتوقعة انا رأى تغيير نص متور تحت يانغير ماتور كامل

لا معلش بقه
أنا بأعمل عمرة محركات ....وياما خرطت بلوكات
وعملتلها booring وغيرت بساتم بمقاسات أكبر over size وعمرى ماسمعت عن حاجه أسمها تعويض غرف الحريق من الداخل بلينات لضبط الغرف لتتناسب مع قطر البستم ...
وده كلام مش منطقى خالص
طيب حتثبت اللينات دى أزاى من الداخل .....علشان البستم بشنابره يمشى عليها ..............
الا أذا كان قصدك ....أن كان فيه قمصان مشحوطه جوه غرف الحريق
علشان البلوك كان بايظ ومخروط قبل كده مثلا
ومش لاقينله بساتم كبيره ......وتم عمل الشمايز دى وشحطها بالبلوك سلندر لتتناسب مع البساتم ذات القطر الصغير (يعنى البساتم الأستاندرد أو الأصليه )
كده منطقى شويه

تصدق وتؤمن بالله
الكلام دة اللى طالع من بق الميكانيكى لما كان بيشرحلى الموضوع
وانا اصلا تعتبر اول مرة كنت اشوف ماتور مفتوح وشة واشوف بلوك قصاد عينى كدة فا خبرتى على قد المعلومات النظرى قبل ما اشوف الكلام دة قصاد عينى وانا اللى شوفتة فى البلوك حطيت ايدى فى المجرى بتاعت البساتم من فوق وحسيت بالتعتيبة
بس انا ماشوفتش الينات دى انا نقلت الكلام بس
بس لو العملية كدة انا اقول لصاحب الشأن واشوفة لما الميكانيكى قالة على الينات شافها بعينة بس مجرد انة قالة كان راكبة ويا نعمر يا نغير مكنة وبردو لو حضرتك شايف اروح للميكانيكى واشوف الينات دى بعينى ولو قدرت اصورهالك مفيش مشاكل
تحت امرك يا هندسة

حضرتك وضحت النقطة دى بردو

الا أذا كان قصدك ....أن كان فيه قمصان مشحوطه جوه غرف الحريق
علشان البلوك كان بايظ ومخروط قبل كده مثلا
ومش لاقينله بساتم كبيره ......وتم عمل الشمايز دى وشحطها بالبلوك سلندر لتتناسب مع البساتم ذات القطر الصغير (يعنى البساتم الأستاندرد أو الأصليه )
كده منطقى شويه

لأنى الصراحة مش عارف الينات دى ركبة
عشان تعويض غرف الحريق من الداخل بلينات لضبط الغرف لتتناسب مع قطر البستم
ولا زى محضرتك شرحت العملية الى بتحصل لما مش بيتوفر بستم اكبر يتناسب مع فتحات البساتم بعد الخراطة
اكيد حضرتك الصح للأن دة مجالك وشغلك وحتى اذا كانت معلوماتى كبيرة عمرها ما هتكون قد خبرتى بس على فكرة انا على قدى فى الحاجات دى
وسياتك كدة وضحت نقطة الخلاف الى كانت فى الموضوع
واتمنى ماتكونش المناقشة دى ضيقتك انا فى الاول والاخر كنت عامل الموضوع دة عشان نفهم اكتر القصة دى ماشية ازاى بدال فى حد فاهم وعندة خبرة فى المواضيع دى وتكون عظة للناس عشان تخلى بالها كويس من الاستعمال واية الى ممكن حد يفاجىء بية من حد معتدهوش ضمير بايعلة حاجة معيوبة ومتلسمة لحد ما تتباع وخلاص

بس الى عايز فهمة هو التعتيبة دى بتكون ناتجة عن اية سوء استخدام وافترى على العربية والشنبر كان اتكسر وهو الى بهدل البلوك قبل كدة يعنى من الاحر الاسباب اللى تخلى البلوك يعتب عشان الناس تخلى بالها عشان دى ملهاش حل صح غير انك تغير مكنة
بدل التعمير والخراطة عمرها ما عتعيش وهتطلع النتيجة زى ماتجيب مكنة تانية حالتها نظيفة ومتصانة

الله يخليك .....أنا مصدقك أن فيه حاجه فعلا كانت موجوده فى البلوك
وخليك معايا فى الكلام ....طالما فيه لينات مثلا ....يبقى الموتور مفتوح قبل كده ...........حلو الكلام
ومعنى الموتور كان مفتوح قبل كده ....يعنى كان بيتعمله طقم شنبر قبل كده .......
ومفيش شك أن أبن خالتك شارى العربيه مستعمله ....يعنى العربيه مش معاه من الزيرو ................
وموضوع اللينات ده ( بغض النظر عن الأسم )
ميجيش غير زى ما حوصفلك ...............
لما البلوك بيبوظ ويعمل بيضاوى مثلا ....أو يريج ويعمل عتب ويتجرح
مينفعش نركبله نفس البساتم بشنابر جديده .....الا أذا كان يسمح بالتوسيع وتركيب بساتم وشنابر مقاس كبير ......ولكن لو كان التآكل كبير .....بيعملوا حركة الشمايز دى علشان ميرموش البلوك
لأن حيفوت تانى برضه .....
بيروحوا عاملين أيه ( وطبعا ده شغل عك برضه وحقولك سببه بعدين )
بيرحوا عاملين شمايز أو قمصان ( شبه علبة السمنه ) بس مفتوحه من فوق وتحت .....بنقول على الشكل ده فى شغلنا ( جلب أو شمايز أو قمصان ) وشحطينها على الساخن بالبلوك
بكده بيرجع الغرف اللى باظت لوضعها الأساسى ....بس ده مش صح
طيب ......مش صح ليه
علشان خامة أو مادة الماده اللى بيتصنع منها الشمايز دى ( اللى زى علب السمنه ومفتوحه من الجانبين )
بتكون خامتها مش مناسبه لتحمل الأحتكاكات والحراره وشغل الشنابر اللى على البساتم
من هنا بقه مع مرور الوقت ...بتحصل التعتيبه ....
ده غالبا ....اللى كان موجود عند أبن خالتك

اقتباس:

---

واتمنى ماتكونش المناقشة دى ضيقتك

---

متقولش الكلام ده ...دا أحنا أخوات ...ويجب اللى عارف حاجه يوضحها للتانى

اقتباس:

---

بس الى عايز فهمة هو التعتيبة دى بتكون ناتجة عن اية سوء استخدام وافترى على العربية والشنبر كان اتكسر وهو الى بهدل البلوك قبل كدة يعنى من الاحر الاسباب اللى تخلى البلوك يعتب عشان الناس تخلى بالها عشان دى ملهاش حل صح غير انك تغير مكنة

---

اقتباس:

---

علشان خامة أو مادة الماده اللى بيتصنع منها الشمايز دى ( اللى زى علب السمنه ومفتوحه من الجانبين )
بتكون خامتها مش مناسبه لتحمل الأحتكاكات والحراره وشغل الشنابر اللى على البساتم
من هنا بقه مع مرور الوقت ...بتحصل التعتيبه ....
ده غالبا ....اللى كان موجود عند أبن خالتك

---

وبالشكل ده ....ممكن ميكونش شنبر الزيت أنكسر ولا حاجه
بس الخامه الطريه بتاعة الشمايز المصنعه ....هى اللى تآكلت ...وكانت بتعدى زيت لغرف الحريق أثناء حركة البساتم بشنابرها لأعلى وأسفل جوه الشمايز التعبانه
لأن معروف هندسيا أن خامة الشنابر بالذات بتكون ناشفه جدا وقويه ومعمول لها معالجه حراريه خاصه

بجد من غيرك ياهندسة كان الواحد ممكن تعدى عالية بيكون مش واعى عنها
وجشع الميكانيكية بيبان

ربنا يخليك يا باش مهندس
والله انا استفد من حضرتك كتير فى المنتدى الجميل دة
وتقريبا كل فترة بكتسب معلومات اكتر فى مجال السيارات بالذات فى ميكانيكا السيارات
والفضل للمنتدى وبحضرتك وبمستشارنا محمد بك ممدوح والاعضاء الافاضل فى اسرة الدايو والمنتدى

بس حضرتك شايف ان احنا اتصرفنا كويس اننا جبنا مكنة استيراد والحمد للة ماشاء اللة عاليها بعد ماركبت ناعمة ومفيش اصوات طالعة من الماتور ...................بدل ما كنا نخرط ونعمر المكنة وبردو الشغل مش هيطلع بالنتيجة الصحيجة والمكنة اكيد هتكون خشنة وبردو هدخن تانى وقطع الغيار اللى فى السوق مش اصلية وتعبانة

اقتباس:

---

بس حضرتك شايف ان احنا اتصرفنا كويس اننا جبنا مكنة استيراد والحمد للة ماشاء اللة عاليها بعد ماركبت ناعمة ومفيش اصوات طالعة من الماتور

---

مفيش شك ده الصح

اقتباس:

---

بدل ما كنا نخرط ونعمر المكنة وبردو الشغل مش هيطلع بالنتيجة الصحيجة والمكنة اكيد هتكون خشنة وبردو هدخن تانى وقطع الغيار اللى فى السوق مش اصلية وتعبانة

---

دا اللى أنت عملتوه ....هو ده اللى كان مفروض من زمان مع صاحب العربيه الأولانى (اللى كان بايع العربيه لأبن خالتك )
قبل موضوع اللينات أيه
طالما البلوك كان بايظ كده ومتعالج بالطريقه الغشيمه دى

دى صوره للشمايز اللى كانت معموله لغرف حريق المكنه المذكوره فى الموضوع الحالى
طبعا الصوره دى لمحرك ديزل ( طراز فولفو )
جبتها من كتالوج عندى
بهدف توضيح الشمايز بيبقى شكلها عامل أزاى
وهى بتتركب جوه البلوك للمحركات الكبيره
الشميز هو القطعه رقم ( 2) على الرسم
http://i728.photobucket.com/albums/w...ntitled-79.jpg

أخي العزيز كاتب هذا الموضوع :
بصراحة صعب أوي ان عربية عاملة 100000 كم حتي يحصل معاها الموضوع ده زي ما مستشارنا قال , يا أما العداد ملعوب فيه يأما كان فيه كارثة حصلت للموتور ده

و علي فكرة اللي باع العربية لأبن خالتك كان المفروض يقوله علي الكلام ده , و كده حرام فعلا و أسمه غش
فعلا الضمير أنعدم في الزمان ده ألا من رحم ربي

باشمهندس / سمير :
شكرا علي المعلومات و الشرح الجميل الوافي , فعلا أنت عندك المقدرة علي توصيل المعلومة بشكل سهل و مبسط , ربنا يبارك لك و يجازيك عنا كل خير

اقتباس:

---

باشمهندس / سمير :
شكرا علي المعلومات و الشرح الجميل الوافي , فعلا أنت عندك المقدرة علي توصيل المعلومة بشكل سهل و مبسط , ربنا يبارك لك و يجازيك عنا كل خير

---

الله يخليك
شوفت الغش وصل لفين ..........
حسبنا الله ونعم الوكيل

:majd(4):

اقتباس:

---

المشاركة الأصلية كتبت بواسطة se_coralsea

باشمهندس / سمير :
شكرا علي المعلومات و الشرح الجميل الوافي , فعلا أنت عندك المقدرة علي توصيل المعلومة بشكل سهل و مبسط , ربنا يبارك لك و يجازيك عنا كل خير

---

1111111111111111111111111111111111+