بولو سيدان ،يارس،نيسان صنى

**م/مصطفى محمود** · 17-08-2009 11:17 PM

السلام عليكم ورحمة الله وبركاته

أنا كنت خلاص بفكر أشترى نيو أكسنت بس بعد كده عليت لبولو سيدان والصنى واليارس

انا بقى عايز آخد رأيكم فى كذا حاجه

مبدأيا الأستخدام عائلى وسفريات قليلة جدا جدا ( مرتين فى السنه مثلا)

بس لسة جديد (بعرف أسوق بس ممارستش )

انا بفكر فى اللى فوق بس ، بس لسة محتار بينهم ، انا ميال للبولو أكتر عجبانى كشكل وكفولكس

بس خايف من أسعار قطع الغيار الأساسية (يعنى الفوانيس والحاجات الخفيفة اللى بتتدغدغ بسرعة علشان لو لا قدر الله )

فأنا عايز أعرف رأيكم أية ومُقارنتكم للتلاتة من ناحية الأعتمادية وأسعار قطع الغيار والأمان وهل الميكانيكية بيفهموا فيها

وشكرا مقدما

**M.ABDEEN** · 18-08-2009 08:18 AM

نيسان صني 1600 و 118 حصان وثبات عالي
خلي بالك البولو السيدان تجميع صيني

**kojyad** · 18-08-2009 09:38 AM

- البولو بطلنا نسمع عنها خلاص , ومش اعتمادية ومش منتشرة , وتجميع صيني
انا مش قصدي اعيب فيها بس ده من وجهة نظري

- الصني طبعا تحفة , لا غبار عليها بس عربية غير موفرة في البنزين 1600 , وتستخدم بكثرة في السفر اكتر

- انا بصراحة ارشحلك اليارس , اعتمادية , ياباني 100 100x موفرة جدا في البنزين , ممتازة في المناورات وفي اليوترنات , لأنها باور كهرباء , ارتفاعها عن الارض عالي , وبالتالي ممتازة مع مطبات بلدنا من الاخر اليارس افضل سيتي كار ,

**akram2010** · 18-08-2009 11:51 PM

شوف يا اخى الكريم
جربنا اليارس على طريق مكه بالسعوديه عند 120 اقسم لك بالله السيارة فقدت توازنها معنا خفيفه جدآ ومع اى تريله تلاقى العربيه تعوم مع الهواء . الوش بالكامل مع الشبك والفوانيس مع الاكصدام قطعه واحدة يعنى اى صدمه تفتح الاجناب بالكامل لبرة ومع صدمه اشد شويه تلاقى الوش بالكامل نزل على الارض. النيو اكسنت مشينا بيها لغايه 170 ثابته جدآ على الارض وافضل جدآ من اليارس على طريق مكه برضه . ارشح لك النيو اكسنت طبعآ سيارة ممتازة . اما البولو والسيارات الاروبيه اسعارها عاليه وقطعهم عاليه وكله سكك توكيلات وجاجات تلاقيها وحاجات مش موجودة .. خد الهيونداى الاكسنت افضل

**tarekabosdera** · 18-08-2009 11:57 PM

اكيد النيسان صني هي افضل ما ذكرت . وحرام تقارن الياريس بالصني.

**M.ABDEEN** · 19-08-2009 08:23 AM

المشاركة الأصلية كتبت بواسطة tarekabosdera

اكيد النيسان صني هي افضل ما ذكرت . وحرام تقارن الياريس بالصني.

1111111111111111

**mxz911** · 19-08-2009 08:30 AM

الصنى طبعا احسن بكتير من الاتنين اللى معاها فى المنافسه

**عبد الرحمن اسامه** · 19-08-2009 09:32 AM

هات دايهاتسو سيريون ، يباني ١٠٠٪ ثابتة جدا علي الارض واسعة من جوة.
لو قدرت تزود و تجيب سيات ابيزا يبق احسن برده.

**M.Mekawy** · 19-08-2009 09:40 AM

صنى تقفيل مصرى
بولو تقفيل صينى
ياريس تقفيل يابانى

صنى على السمع الصراحة متوحشة بنزين
بولو معرفش
ياريس بتشم البنزين

لو مش فارقة معاك انها مش ثابتة على سرعات عالية (بعد 120) ,متهيالى خليك فى الياريس
انا كنت ماشى لوحدى فى العربية معييش و لا حد و لا شنط على طريق اسكندرية و الساحل و العربية كانت فى اللذيذ لغاية 100-120 حسب الطريق اللى ماشى عليه , اكتر من كده مراجيح , والحتت المتسفلتة جديد فى مصر اسكندرية قالت معايا لغاية 140 و بعد كدة فى المراجيح مع ملاحظة ان كان تقريبا مفيش اى وزن فى العربية

فى ناس كتير فى المنتدى بتشكر فى الابيزا , ابقى اديها بصة

**tofy_urban** · 19-08-2009 10:18 AM

غريبة الناس غريبة الدنيا دية ,,, الراجل بيقول صني , ياريس , بولو ........... ايه دخل بقي النيو اكسنت في الموضوع ,, علي العموم ثبات الياريس مش حلو و ضعف الاكصدام الامامي بتاعها غير كده الياريس كويسة ,, الصني جميلة جدا لكن استهلاك البنزين اعلي من الياريس وده لفرق الماتور و طبقا في فرق في قوة الماتور لصالح الصني الصني 118 الياريس 84 الصني عفشتها ناشفة شوية غير كده عربية عائلية كويسة و تصلح للسفر و ثباتها كويس لكنها تجميع مصري رغم اني مشفتش فيه مشاكل ملحوظة خالص لاني ركبتها اكتر من مرة ابعد عن اليولو لان التجميع صيني و ده لسه مخوف الناس شوية قطع غيار غالية موتور ضعيف 75 حصان شكلها من وراء مش حلو اوي لو عرفت بقي توصل لهوندا سيتي 2008 هيبقي مية مية و ربنا يوفقك في الاختيار