الموضوع: إفتتاح فرع أبو رواش و الزحف السيريوني - حصرياَ نايل موتورز

في ملحمة دايهاتساوية خالدة تقدمت الجيوش السيريونية و التيريوسية بمساندة كتيبة من جنود الماتيريا البواسل في إحتلال كامل لطريق محور 26 يوليو .. و إمتد الزحف للسيطرة علي منطقة ما قبل البوابات علي طريق إسكندرية الصحراوي و حتي مدخل أبو رواش .. و قد حاول العدو التصدي لهذا الجيش المجيد بالزحام و لكننا أسقطنا عتاد العدو من ميدان لبنان لمنزل الصحراوي في عشر دقائق فقط من خلال السيطرة علي الثغرات.. و قد علا كل مركبة من المركبات علم دايهاتسو وسط صياح "الله أكبر الله أكبر الله أكبر" .. و قد وصلت جميع القوات سالمة للإحتفال بالنصر في مركز أبو رواش الجديد لصيانة و مبيعات قطع غيار دايهاتسو .

أخيراَ فتح فرع أبو رواش .. و لكن ما رأيته جعلني أيقن إنه كان يستحق الإنتظار
في الحقيقة الفرع راقي جداَ و كبير الحجم (4 أضعاف العبور علي الأقل) .. و أماكن الإنتظار به متعددة و غرفة الإنتظار ذات أثاث راقي و كمان فيه بلاي ستيشن (حد جاي ؟!) .. و كالعادة الوايرلس .. و منطقة ألعاب للأطفال و عدة شاشات تليفزيونية .. و ركن للمأكولات و المشروبات .. و أيضاَ جزء أكبر لأعمال السمكرة و الدهان و جهاز حديث لإستعدال الشاسيه و ده هيكون له أثر كبير في الإصلاحات و سرعتها إن شاء الله .

تقابلنا في المهندسين أمام نادي الترسانة حسب الإتفاق انا و slim shika السيريوني الجديد اللي تشرفت بمعرفته و السيريوني الأصيل اللي مش مشترك معانا بس عالجروب في فيس بوك مصطفي سامي .. و كان هناك مهندسين و إداريين من التوكيل ثم إنضمت لنا العضوة nonalaziza بالتيريوس الجميلة .. ثم إنطلقنا في طريقتنا إلي 6 أكتوبر و في أول المحور إنضم لنا الموكب القادم من مدينة نصر لنصبح قوة باطشة علي الطريق (لاحظ في الفيديو أودي مستعبطة عاملة فيها دايهاتسو) .

و بعد وصول الموكب بدأ بروتوكول الإفتتاح .. مروراَ بإستعراض خطة دايهاتسو مصر في إفتتاح عدة فروع صيانة (قريباَ بالأسكندرية) و بتدريبها لعمالها علي الوصول لزمن "ساعة" من العمل للإنتهاء من السيارة عن طريق عمل أكثر من فرد بها في نفس الوقت .. مع الإشارة لثقة دايهاتسو مصر في شبابها الذين تعتمد عليهم و في مقدمتهم مهندس محمد عبد الصمد مدير فرع أبو رواش الجديد .

و بعد إلقاء الكلمة علي الحضور قمنا بعمل جولة في مركز الصيانة الضخم و الجميل .. و إنتهت الإحتفالية حوالي الثالثة و النصف .. مع تسليم الحضور جميعاَ هدية تذكارية عبارة عن كريستالة مكتوب عليها شعار دايهاتسو و كلام يشكر الحضور علي تشريفه للإحتفال .

الحقيقة انا مبسوط أولاَ عشان أخيراَ مش هضطر أسافر تاني للعبور كل ما أحتاج حاجة للعربية .. و تاني حاجة عشان مركز أبو رواش مشرف فعلاَ و واجهة عظيمة لدايهاتسو مصر .. و هيخف الحمل كتيييير عن فرع العبور .. و دلوقت بقت الصيانة متوزعة علي فرعي العبور بإدارة مهندس أحمد عبد الوهاب و أبو رواش بإدارة مهندس محمد عبد الصمد و الإتنين طبعاَ كل واحد فيهم غني عن التعريف و نتمنتالهم الخير و المزيد من التقدم لأنهم شخصيات جميلة .

للأسف مشفتش إنهاردة حد من السيريونيين القدامي عشان الميعاد في وسط الأسبوع و مش مناسب بس إتبسطت إن شفت أبو عبد الله في أخر اليوم هو جه متأخر شوية .
إن شاء الله هعمل صيانة قريب في الفرع ده و أكتب تقرير مفصل .

و ده فيديو بسيط عملته لإفتتاح الفرع للي مجاش ممكن يشوف الجو كان عامل إزاي .

و أشوفكم جميعاَ بخير .. تحياتي .

YouTube - Opening of the new Daihatsu service center - Abu Rawash