الموضوع: أول الكوبري ياسطة !!!

المشاركة الأصلية كتبت بواسطة abzoabzo

بشياكة كده اكسرلها مرياتها علشان تحترم نفسها وتحافظ على عربيات الناس التهاون مع المستهترين دول خالى الواحد كره حتى يمشى على رجليه فى الشارع

من حوالى 7 سنين سواق أجرة بيجو نصب عليا فحبيت أنتقم منه فمن غيظى قطعت له أكرة الباب اللى جنبى قبل ما أنزل واستريحت.... مؤقتا

تانى يوم عربية نقل دخلت فى باب عربيتى قسمته نصين!!

ساعتها حسيت بالرسالة اللى جاية من فوق وحرمت أعمل حاجة زى كده ، لو حد غلط دا مش مبرر لغلطى ، هو هيتحاسب مش لازم أنا كمان أتحاسب زيه، ماخد ثواب أحسن وأبقى أنا الكسبان!

المشاركة الأصلية كتبت بواسطة se_coralsea

بعيدا عن الخوض في موضوع الدين و علاقته بما يحدث ي شوارعنا من فوضي أسمحوا لي أن أختلف معكم هذه المرة و هذا لايمنع أبدا أحترامي لوجهة نظركم و لكن ...

اذا كنا نعرف الله و نتقيه فمن المؤكد أننا سنراعي ضمائرنا و سنخاف من عقاب الله قبل عقاب البشر المتمثلة في القوانين

تخيلوا لو أن سائق الميكروباص هذا يعرف الله و عنده وعي ديني :
- هل سيتلفظ بمثل هذه الالفاظ البذيئة ؟
- ألن يراعي حقوق الاخرين في الشارع و يحترمهم ؟؟
- الن يحترم من معه من ركاب و يتعامل معهم بطريقة محترمة كما حثنا علي ذلك ديننا الحنيف و كل الاديان السماوية الاخري ؟

نفس الشئ بالنسبة للنقل و الملاكي
المشكلة أننا بننسي ربنا و لما بنشوف حادثة كبيرة علي الطريق بنتعظ و نفتكر ربنا و بنطفي الكاسيت و نهدي السرعة الي حين ان يركبنا الشيطان مرة أخري

كلام مضبوط تماما

همّ فى بلاد بره عندهم نظام متعودين عليه وخلاص بقى سستم حياتهم...
عندنا هنا النظام اللى ينفعنا هو التدين السليم مش بتاع المظاهر دون الجواهر ...
الشعب العربى كله عمره ما انصلح إلا بالدين فقط ، أى محاولة تانية كانت فاشلة ، لا قومية ولا عربية ولا تقليد غرب ، مافيش حاجة نافعة معانا إلا اللى نفع بيه أجدادنا: الدين.

المشاركة الأصلية كتبت بواسطة dr ahmed abdelghany

من حوالى 7 سنين سواق أجرة بيجو نصب عليا فحبيت أنتقم منه فمن غيظى قطعت له أكرة الباب اللى جنبى قبل ما أنزل واستريحت.... مؤقتا

تانى يوم عربية نقل دخلت فى باب عربيتى قسمته نصين!!

ساعتها حسيت بالرسالة اللى جاية من فوق وحرمت أعمل حاجة زى كده ، لو حد غلط دا مش مبرر لغلطى ، هو هيتحاسب مش لازم أنا كمان أتحاسب زيه، ماخد ثواب أحسن وأبقى أنا الكسبان!

صح فعلا
مش صح انك تصلح الغلط بغلط

طيب ممكن اسأل سؤال؟ كل اللي شاركو في الموضوع معترضين على اأخطاء اللي في الشارع و مش عاجباهم... طيب مين اللي بيعملها؟!!

بالنسبة للميكروباصات فيه جزء كبير من الغلط بيقع على الناس اللى بيركبوه وهو اللى سمح لسواقين الميكروباصات انهم يركبونا بالشكل دا
انا من منوف وجت على فترة لمدة سنة كنت لازم اسافر للقاهرة كل من مرتين لتلاتة كل اسبوع وكنت بنزل من 5 ونص صباحا كنت بلاقى ازمة وملقيش ولا عربية والناس تفضل تزيد تدريجى فتيجى عربية فالناس تندفع عليها ويضطروا انهم يركبوا اربعات ولما عدد الناس يقل متلقيش ولا عربية لغاية ميزيد العدد تلاقى عربية تانية تيجى وعرفت من انهم بيقفوا فى حتة تانية غير الموقف وبينزلوا الموقف واحدة واحدة عشان يركبوا اربعات

ان كان الغلط على السواقين فالغلط الاكبر على الناس اللى بتركبدلوقتى العربية خدت العدد بتاعها بس السواق رافض انه يقوم الا بعد ميحمل زيادة لو الناس رفضت انها تركب زيادة مش دا كان حيخللى السواق يمشى وكل الميكروباصات تيجى عشان هما عارفين ان الناس عمرها محتركب زيادة

الكلام دا بيتعمل كل يوم تقريبا من الصبح بدرى لغاية الظهر لانها فترة الذروة وتلاقيها فى موقف عبود الازمة دى من العصر حتى الليل

انا عاوزكم مرة تنزلوا موقف عبود وشوفوا موقف منوف عامل ازاى وشوفوا كل المواقف اللى حواليه

حاولت انى اعمل محضر بس عرفت بعد كده ان الشرطة اللى موجودة فى عبود بياكلوا من السواقين فمش حيعملوا حاجة ولو اتعمل اى محضر ورقة بعشرة تقفل المحضر

سالت ناس فى نيابة لو حبيت اعمل محضر واصريت ان الموضوع يكمل ويمشى فى النيابة ايه مصيره قالوللى ان النيابة حتحفظه لان من كتر ضغط الشغل اللى عليها مش حتبص للمواضيع دى

وحاولت اشاغب مع السواقين بس لقيت نفسى ان انا اللى حتهان خاصة ان انا لوحدى وممعيش اى راجل يقف جنبى

فملقتش غير حل واحد هو انى لما اكون مسافر والاقى ازمة بقول للناس متركبش زيادة عشان ونفضل واقفين بس مين اللى يسمعلك
الناس خلاص بقى عندها حالة من الخنوع والاستسلام لدرجة فظيعة ويقولك ازنق نفسى ويفضل يسب ويلعن فى السواقين اللى زانقينهم طب مانت اللى رضيت بكده

مرة كنت راكب الصبح ومفيش ناس كتير ولا اى حاجة والسواق مصمم انه ميطلعش الا لما يركب زيادة فجه واحد عشان يركب فالسواق ركبه رابع زيادة فانا قلت للسواق انت ناوى تحمل اربعات يا اسطى فقاللى اه فقمت نازل من العربية ومفيش دقيقتين لقيت عربيات تانية جت وركبت فيها براحتى والناس فضلت مزنقة نفسها فى العربية التانية وانا مشيت قبلهم كمان

سؤال .....ايه اللى يخلى الناس توافق على الاوضاع دى ليه مبقاش عندها كرامة والغريبة انى بلاقيهم يهزروا مع السواق اللى هاينهم وزاللهم

والانيل من كده كمان انى عرفت ان الموقف بتاعنا بيسيطر عليه مجموعة من السواقين الكبار وكانوا ولاد سواقين فالناس عارفاهم فى الموقف وهما اللى بيجبروا الميكروباصات انها تحمل زيادة قصاد انهم بياخدوا اجرة فرد من كل عربية ودا انا صدقته لانى كل ملاقى ازمة فى الميكروباصات الاقى واحد من السواقين دول موجود فى كل مرة ويحمل اربعات لكل عربية طالعة وياخد فلوس من ورا كده ومعدتش فيه دور واللى عاوزينه يحمل هو اللى يحمل بمزاجهم واللى مش عاجبه بيمسكوه يضربوه العلقة المحترمة لانهم مجموعة مع بعض

معلش انا طولت عليكم بس اصل الكلام عن السواقين والميكروباصات جه على الجرح وخلانى افضفض لان مبقاش فى يدى اى شئ حتى فى اخر يوم كنت راجع فيه من السفر ولقيت الناس زى ماهيه متغيرتش ولسه مزلولين عشان شوية سواقين ولاد......قلت فعلا الناس دى متستاهلش سواقين غير دول

بس كفاية كده لانى شكلى حيجيللى الاكتئاب تانى