يوم عصيب جدا علي الدائري

**asbeats** · 18-08-2009 03:34 PM

المشاركة الأصلية كتبت بواسطة emsadeck

اللي زود الطين بلة كمية البشر اللي بتتفاجيء بيهم وهما بيعدوا قدامك في وسط ضلمة الدائري ، بجد ممكن في لحظة تلاقي نفسك موِِّت بني آدم وروحت في داهية

انا حرمت اطلع على الدائري بالليل بسبب الناس اللي بتعمل العمليات الانتحارية دي

يا باشا موت فيهم زي ما انت عايز ولا يهمك ومش هتروح في داهية ولا حاجة...لأن العبور ممنوع نهائيا للمشاة فوق الدائري...واللي يموت مالوش ديه...واللي يتمسك وهو بيعدي المفروض يتقبض عليه عشان تعريض حياته وحياة الآخرين للخطر

**إبراهيم.صادق** · 18-08-2009 04:37 PM

المشاركة الأصلية كتبت بواسطة asbeats

يا باشا موت فيهم زي ما انت عايز ولا يهمك ومش هتروح في داهية ولا حاجة...لأن العبور ممنوع نهائيا للمشاة فوق الدائري...واللي يموت مالوش ديه...واللي يتمسك وهو بيعدي المفروض يتقبض عليه عشان تعريض حياته وحياة الآخرين للخطر

أكيد طبعاً هو اللي غلطان وبيعرض حياته للخطر، بس تفتكر لو ده لا قدر الله حصل الواحد هايقدر ينام وهو مستريح؟؟؟

**M.Osman** · 18-08-2009 05:04 PM

انا بعيد الحمد لله عن دائري القاهرة و عمري ماسقت عليه ..
بس برضه في المنصورة دائري لا يوصف..
مسخرة بكل ما تحمل الكلمة من معانى ..
-طريق حارتين فقط
-يوتيرنات عشوائية و في الملفات كمان
-عرببيات نقل كبيرة ماشية اكتر من 100 كم/س عليه و انا يدوبك بجيب عليه 90 !! (مقضينها غرز زي في البلاي ستيشن كدا)
-بالليل معظم الوقت بيكون مظلم مش عارف ليه .. و نور المقابل في وشك و الكل بيكون ماشي بالبركة (انا مش بستخدمه بالليل نهائي)
-ناس بتمشي عكس الإتجاه .. بالهبل..عشان "يخطفوا" يوتيرن ولا حاجة.. عادي حقهم

في أخر الطريق ممكن تلاقي لجنة ولا شوية طراطير... واقفين بيعملوا اية مش عاااااااااااااااااااااارف !

**ابو فرح** · 18-08-2009 06:58 PM

انا كنت رايح كارفور من يومين واخد الحاره الشمال واخد سرعتى عادى افوجىء بميكروباس راح واقف مره واحده وبينزل واحد فى الحاره الشمال شوفتو الاستهتار والحمد الله فوقت من الصدمه وفديته
ربنا يصبرنا