الموضوع: صيانة ال 5000 + النيتروجين + أسعار .. (بالصور)

السلام عليكم ورحمة الله وبركاته


من يوم ما إستلمت العربية وأنا مفكر أن صيانة ال 5000 بتكون عند 6000 كيلو بمعنى أنك تعد 5000 ك بعد صيانة الألف .. وطبعاً ده كلام غلط


(( مواعيد العمل فى مراكز الخدمة من الساعة 9 إلى الساعة 5 ))

المهم روحت لمركز خدمة عز العرب بالإسكندرية حوالى الساعة 8:40 علشان أدخل بدرى وأخلص بدرى


ومكنش فى حد غير أمن فرع التوكيل .. وحوالى الساعة 9:10 جالى المهندس محمد صلاح المسئول عن سيارات البروتون ومعاه شخص تانى ماسك ورق فى إيده


سألنى المهندس صلاح إذا كنت حاجز ولا لأ ؟ .. قلت له .. انا أعرف أن مفيش حجز .. رد وقال .. أنهم شغلوا نظام الحجز من أيام حملة الصيانة المجانية .. قلت له .. مكنتش أعرف


الراجل طلع ذوق .. وقالى مفيش مشكلة .. وبالفعل سجل حضورى


وقعدت أدردش معاه فى شوية ملاحظات وكان منها أنى بسمع صوت فى العفشة .. لما أكون ماشى بسرعة شوية ويكون فى مكان عالى أو واطى .. أسمع طقة عالية .. قالى أن ده تربيط عفشة وهيروح ان شاء الله


الملاحظة التانية أن عندى حدفة يمين .. قالى ده ظبط زوايا .. وان معندهمش الخدمة دى فى التوكيل


الملاحظة التالتة أن عندى رجة فى الدريكسيون بتبدأ من عند ال 80 ك/س .. وبتزيد كل ما بزيد فى السرعة .. قالى ده ترصيص .. وأيضاً معندهمش الخدمة دى فى التوكيل


طبعاً أثناء ما كنت بتكلم معاه .. كان المهندس التانى .. بيلف حوالين العربية بيشوف اذا كان فيها خبطات أو خدوش .. قبل ما يستلموا العربية .. وبياخد بيانات العربية


وتم استلام العربية .. وقعدت فى الاستقبال .. علشان لسه مخلصوش شغل فى الكافيتيريا .. بصراحة مش فاكر قعدت أد إيه .. لكن تقريبا ساعة .. وجالى المهندس صلاح .. وقالى العربية فى الغسيل دلوقتى


استلمت العربية .. ودفعت الآتى :


105 مصنعيات
10.50 ضريبة مبيعات
141 قطع غيار ( 96 زيت سوبر + 45 فلتر زيت )
14.10 ضريبة مبيعات


الإجمالي : 270.60 جنيه


أخدت العربية وطلعت على بريدجستون (فرع سموحة) وطلبت ترصيص وظبط زوايا ونيتروجين


قالوا أن عندهم ترصيص ونيتروجين .. لكن ظبط الزوايا فى فرع (لوران) .. قلت مفيش مشكلة .. اشتغلوا


ومخدوش وقت بصراحة .. يادوب خلصت فنجان الشاى .. كانوا خلصوا


والحساب كان


ترصيص الأربع اطارات بالضريبة 40 جنيه
شحن الاطارات بالنيتروجين بالضريبة 20 جنيه

وطلعت على فرع (لوران) وظبطت الزوايا فى حوالى 15 دقيقة والحساب كان
ظبط زوايا أمامى وخلفى بالضريبة 40 جنيه


ملاحظات هامة :


1) فى التوكيل قالوا ان الرجة اللى فى العربية دى سببها الجنوط .. ولما روحت بريدجستون قالوا لى .. أن الكاوتش فيه عالى وواطى .. والجنوط كويسة
عايز اعرف لو الكاوتش فيه حتت متآكلة .. وفيه عالى وواطى .. أروح لهم فى التوكيل ويتم التغيير هناك على حسابهم ... ولا الكاوتش خارج الضمان ؟


2) اللى عايز يروح يعمل صيانة فى فرع اسكندرية .. ياخد باله أنه لازم يحجز الأول وده بناءً على النظام الجديد


3) بأمانة وحيادية : وانا بتعامل مع المهندسين فى التوكيل ومع المسئولين عن خدمة ما بعد البيع .. وجدت أنهم ناس محترمين جدا .. وذوق جدا جدا .. وحريصين على راحة العميل ورضائه


4) النيتروجين مش هيخلى العربية تطير من على الأرض .. لكن بجد حسيت بفرق كبير وخصوصاً أن طريقى معظمة مطبات وتكسير ومزلقانات .. بجد تجربة مفيدة جدا


5) انا مخدتش خصم المنتدى فى بريدجستون علشان لسه مش معايا الاستيكر


6) وأنا فى التوكيل سألت على تمن بعض الحاجات .. وده بيان بيهم :


اكصدام خلفى .. 950 جنيه
اكصدام أمامى .. 900 جنيه
رفرف .. 450 جنيه
كبوت .. 1150 جنيه
شنطة .. 3200 جنيه
باب أمامى .. 2750 جنيه
باب خلفى .. 2684 جنيه
زجاج أمامى .. 1200 جنيه
زجاج خلفى .. 1150 جنيه
زجاج باب .. 250 جنيه
فانوس امامى .. 955 جنيه
فانوس خلفى .. 550 جنيه
أريال راديو .. 86 جنيه


أسعار الدوكو ( أسعار دهان العربية )
الاكصدام : 250 جنيه
الرفرف : 250 جنيه
الكبوت : 500 جنيه
الشنطة : 500 جنيه
الباب : 500 جنيه

السقف : 500 جنيه


يتبع