الموضوع: أرجوكم حد يرد بما يرضى الله

المشاركة الأصلية كتبت بواسطة mr_easier

أنا خلاص على وشك حجز a113

و الحمد لله بعد اقتناع بنسبة تسعين فى الميه..أو أقل شوية..و الباقى عند التجربه...و بصراحه أنا خايف و قلقان العربيه يطلع فيها أى مشكله من اللى كنت بسمع عنها..و هبقى سايقها و أنا فى حذر شديد..لإن دى أول عربيه جديده أجيبها بعد مشوار طويل مع القديم..و تقريبا صرفت كل ما أملك..عشان كده بطلب من حضراتكم اللى معاهم العربيه يقولولى اذا كنت اتصرفت صح ولا لأ..ولا كان ممكن أجيب العربيه بس تكون السيارة التانيه مش الأساسية....أرجوكم أنا مش عايز حد يشكرلى فى السيارة لإنها هتبقى شهادة مجروحه...أنا عايز بس أعرف أتعامل مع عيوب العربيه ازاى..مش عايز أعرف مميزاتها لإنى حافظها.

أكيد الكل كان قلقان زيى..بس أنا أكتر لإنى زى ما قلت صرفت كل اللى معايا عشان أدفع مقدم ..و يا ريت من فضلكم أعرف هل اللون الفيرانى لون كويس فى السيارة ولا مع الوقت بيطفى و يبقى مش حلو...و ايه الألوان الكويسه اللى بتخللى منظر العربيه شيك و بتفضل محافظه على بريقها بدون ما تطفى..أنا لسه ممكن أغير اللون...حاجه أخيره معلش طولت عليكوا..هل حد جرب راح بالعربيه شرم الشيخ أو الغردقه أو المسافات الطويله دى..و هل العربيه ممكن تتحمل طول الطريق بدون ما تسخن ولا بحتاج أريح العربيه كل شوية

أسف على الإطاله و متشكر جدا

http://www.nilemotors.net/Nile/89737-113.html

فين ردودكم يا شباب..محتاج مساعده والله

احسن لون ممكن تجيبه لعربيتك وعن تجربة
اللون الابيض ولا بيطفي ولا بيبهت ولا اي حاجة
وتقريبا كل الالوان الزيرو نضيفة و مش بيحصل فيها اللي انت كاتبه ده
وموضوع السفر بالعربية الزيرو
انت مش هتسافر ب 28 عايز تريحها كل 100 كيلو لحسن الموتور يقفش
غير زيت نضيف مع صيانة في مواعيدها
وامشي الف كيلو في اليوم مش هتقولك بم

اول عربيه بلاش صينى لاتكرة العربيات وتكرة نفسك . خليك فى الهيونداى فيرنا وعليها عرض حسم 2000 ج واللون الابيض حلو على المدى الطويل لو ان زهقنا منه عقود من الزمن واحسن لك من الصينى . وما يغرك شكل وموصفات كله كلام فاضى والصين لسه بدرى لما يصنعوا سيارات. خلى بالك هاتلاقى الوان ودى فى دى ومصابيح عدسات وضباب ومطر ويقول لك فيها ايه بى اس وكله حكى فاضى والشغل الصينى وهم فى وهم

السلام عليكم يا باشا

شوف الموضوع ده: http://www.nilemotors.net/Nile/89737-113.html

بلاش الصينى خالص حرام تدفع فيه فلوس

شوف Kia Picanto, Hyundai i10
Verna or renault Logan

شوف أيهم أنسب ليك بس نصيحة بلاش الصينى نهائيا

وربنا يوفقك للى فيه الخير

أنا بشكر كل اللى رد و مكنتش متوقع استجابة بالسرعة دى..و بصراحه الموضوع يحير جدا..و للأسف أنا مش معايا غير مقدم بسيط و مقدرش أدفع أكتر من قسط a113 حتى و لو ب 10 جنيه زياده و مش ببالغ والله...و حاسس ان جه الوقت عشان أركب عربيه نضيفه و رفاهيه...طب هل فى عربيه بنفس السعر و فيها مواصفات كده؟

المشاركة الأصلية كتبت بواسطة akram2010

اول عربيه بلاش صينى لاتكرة العربيات وتكرة نفسك . خليك فى الهيونداى فيرنا وعليها عرض حسم 2000 ج واللون الابيض حلو على المدى الطويل لو ان زهقنا منه عقود من الزمن واحسن لك من الصينى . وما يغرك شكل وموصفات كله كلام فاضى والصين لسه بدرى لما يصنعوا سيارات. خلى بالك هاتلاقى الوان ودى فى دى ومصابيح عدسات وضباب ومطر ويقول لك فيها ايه بى اس وكله حكى فاضى والشغل الصينى وهم فى وهم

طب حضرتك كان عندك a113 تحديدا ولا دى فكرة عامه عن الصينى..يا ريت لو عندك تجربه شخصيه تفيدنى بيها و جزاك الله خير