حادثة رهيبة على الدائرى

**أبوسيف** · 19-08-2009 02:31 AM

النهاردة وانا راجع من الشغل على الدائرى حوالى الساعة 6 فى الحتة ما بين نزلة القومية ونزلة الوراق وكان فى قدامى عربية نقل كان بينى وبينها حوالى 50 متر ، المهم لمحت راجل ومعاه طفلين حوالى 6-7 سنين بيعدوا الطريق ودخل فى وسط العربيات بطريقة غريبة وعدى اول 3 حارات والراجل سواق النقل ما شافوش وهو بيعدى وفوجئ بالراجل والولدين قدامه واللى حصل بعد كدة مش ممكن يتوصف.

العربية النقل فرمتهم كلهم و طفل من الطفلين نزل تحت العربية النقل ولقيته بيتدحرج قدامى وبينى بينه مسافة صغيرة ، ضربت فرامل بكل قوتى والحمد لله قدرت اقف قبل ما أعدى على الولد ، ما بقتش عارف أعمل ايه ، شكل الحادثة وقوة الخبطة بيقول ان ال 3 ماتو ، وافتكرت الناس اللى كانت بتحكى على مواقف مشابهة ونزلت علشان تساعد وكانت النتيجة انهم اصبحوا متهمين انهم هما اللى خبطوا. رجعت بضهرى شوية ,اخدت يمين ومشيت بعد الحادثة حوالى 200 متر ووقفت شوية علشان اقدر اتلم على أعصابى.

الله يرحم الراجل والطفلين ، ويستر طريقنا كلنا

ويارب أعرف أنام النهاردة :(

**Terrible_DaRsH** · 19-08-2009 03:49 AM

لا حول ولا قوة الا بالله .

شيء فظيع جدا , ربنا يستر طريق الكل .

**Amo0o0oRa** · 19-08-2009 03:54 AM

يا ساتر يا رب....

مع ان كان ممكن ينزل من السلم القريب ليه ويطلع من الناحيه التانيه
بس دا قضاء الله وقدره
ربنا يرحمهم

**beautiful0mind** · 19-08-2009 04:00 AM

لا حول ولا قوة الا بالله

انا واحد صديقى برضة من فترة توفى فى حادث على الطريق الدائرى والناس سبته متوفى ع الطريق ومشيت بعد مغطة بالجرايد

ربنا يصبرنا جميعا

**dr-mohamed** · 19-08-2009 04:13 AM

لا اله الا الله
ولا حول ولا قوة الا بالله
ربنا يرحمه ويرحم الطفلين ويصبر الام الزوجة اللى فقدت اهم تلاتة في حياتها في لحظة
مين عالم الراجل ده كان وراه ايه ولا مين وكان مسئول عن مين ولا مين وبيصرف على مين ولا مين
لا حول ولا قوة الا بالله

**amr.elsayed** · 19-08-2009 04:21 AM

لا حول ولا قوة الا بالله خلو بالكوا يا جماعة من السرعة الزايدة ربنا يستر طريقنا جميعا والله يرحم جميع موتى المسلمين

**WalidAdel** · 19-08-2009 02:07 PM

تلاقي الجرايد هاتقول و نتيجه للسرعه الزائده لسائق التريلا و انه كان شارب و الكلام اللي احنا عارفينه دا مع ان الغلط هنا علي المشاه اللي بيعدوا الطريق و خلاص
الغلط في معظم الحوادث دي بتبقي علي المشاه و دايما تلاقي كوبري المشاه موجود و الناس بتعدي من الشارع عادي زي ماموجود علي طريق القاهره الاسكندريه الزراعي و دا من اخطر الطرق اللي شفتها
ربنا يستر طريقنا جميعا