الموضوع ده كنت نشرته زمان وقلت الحق اجيبه انشره هنا باسمى قبل ما حد يسرقه:
امبارح كنت مع احد اطفال العائلة النجباء(11 سنة) بنلعب لعبة الحروف
وهنا خطرت له فكرة وسألنى: عمو هى مرات الصقر اسمها ايه، الصراحة انا
تنحت شوية وبعدين ربنا فتح هى عليا بإجابة رحت قايلهالو:قلته اسمها
صقرة،المهم طبعا كرامتى نقحت عليا اوى ازاى يسألنى سؤال عويص كدة
ومعرفش اجاوبه فقررت ارد له المقلب-أصل انا فى الحاجات دى مخى صغير أوى-
قلته طب قوللى يا فالح جوز الحداية اسمه ايه؟ العفريت وبدون تردد
قاللى: طبعا اسمه "حداى"،بينى وبينكم اللعبة عجبتنا وفضلنا ندور على
الحيوانات اللى العرب عملوا اسم لجنس واحد منها ونسيو يسمو الجنس الأخر
ونعمل قاموس لإسم شريك حياه الحيوانات دى، وبصراحة النتيجة كانت مبهرة:
دى عينة من نتيجة المجهودات المثمرة اللى قمت بيها انا وقربيى النجيب:
أنثى الصقر : صقرة
انثى النسر: نسرة
انثى الخرتيت: خرتيتة
انثى سيد قشطة: سيدة انما زى القشطة
انثى سبع البحر: سبعة البحر
ذكر الزرافة: ظريف
ذكر البجعة: بجع(بتسكين الجيم)
ذكر الأفعى: أفع
ذكر البومة:بوم
أنثى الدبور: دبورة
أنثى ابو فصادة: ام فصادة
ذكر البلهارسيا: بلهارسى
أنثى البورص: بورصة
ذكر السحلية: سحلى
أنثى الوعل: وعلة
ذكر الحداية: حداى
أنثى الغراب: غرابة
انثى الكانجارو: كانجاروهاية
ذكر الباندا: باند
ذكر السلعوة: سلعو(بفتع العين وتسكين الواو)
انثى سمك القرش: قرشة
ذكر الباركودا: باراكود
ذكر الرنجة: رنج
ذكر الغوريللا: غوريل (بتشديد اللام)
ذكر ام الخلول: ابو الخلول
أنثى القندس: قندسة
أنثى أبو قردان: ام قردان
كنا انا وقريبى الصغير ناويين نكمل القاموس لولا ان امه شدته من ايدى
قبل ما اقضى على سلامه قواه العقلية وهى بتدعيلى ان ربنا يهدينى ويكملنى
بعقلى