الموضوع: الدائري و ايامه و سنينه

تقريبا - بصوره يوميه يكون فيه خبر فى الجرايد او فى الفضائيات او هنا فى المنتدي عن حادث مروع على الطريق الدائرى - ده غير اللى بيحصل من غير ما ينشر عنه حاجه .

اولا - انا لله وانا اليه راجعون - اسأل الله العلى العقدير ان يرحم ضحايا الدائري ويسكنهم فسيح جناته

ثانيا - بهدوء كده انا حاسس ان الغلط مش من الناس اللى بتعبر الطريق على اقدامها - ولا حتي من السائقين سواء نقل او ملاكي او اتوبيس ....

ببساطة لان

1 - المفروض مفيش مخلوق المفروض يعبر الدائري على قدميه
2 - سائق النقل او اي سائق على الطريق الدائري المفروض يلتزم بسرعه محدده - لا يكون سريع فوق السرعه المسموحه - وكذلك لا يقل عن سرعه محدده - لانو لو مشي بسرعه بطيئة - اكيد هيتسبب فى شلل للحركه على الدائري

3 - اذا حاول السائق تفادي المشاه على الدائري - يبقى اكيد هيدمر 5 - 6 عربيات حواليه بالقليل

4 - المساكين اللى حظهم الاسود خلاهم يسكنوا فى المناطق - اللى اتزرع فيها الطريق الدائري ده - عليهم بدون ما يكون لهم اي ذنب - و مفيش وسيله لعبور الدائري ده من جانب الى اخر ( لا انفاق ولا كباري ) برضو مش غلطانين - ووضعهم ملهوش حل.

يعني لما واحد يحب يعبر الطريق يقوم يمشي 7 - 8 كيلو عشان يوصل لكوبري او نفق للعبور
تبقي دي مش عيشه بصراحه - و كذلك لا يمكن ان يمكن اجباره على انهاء علاقته بالجانب الاخر من الدائري

شوفتوا - وضعهم ملهوش حل

يبقي الغلط اكيد مش منهم ولا من اللى سايقين على الدائري

الغلط على الظالم الى عمل مشروع هو مش قده - ومشروع فاشل كله غلط فى غلط
ومشروع فاشل كله غلط فى غلط
ومشروع فاشل كله غلط فى غلط
ومشروع فاشل كله غلط فى غلط
ومشروع فاشل كله غلط فى غلط
ويطلع يتمنظر فى كل حته ويقول انا عماتلكو طريق دائري

يعني الظالم ده يحط طريق دائري سريع - وينزع ملكية اراضى بالعبيط - من ناس غلابه و اغنياء على حد سواء - من غير ما يكون في وسيله لعبور الناس من الجانبين - و خصوصا فى المناطق المزدحمة بالسكان ( وبالتحديد على جانبى القرص الشمالى )


اشكال الحوادث على الطريق ده دايما مكرره - فى نفس المناطق

يعنى القوس الشمالي دائما الحوادث بتكون ناس بتتفرم

القوس الجنوبي و بالتحديد عند كارفور - بيبقي تصادم 25 سياره مع بعض فما فوق

وكل ده والساده المسؤلين مش واخدين بالهم من تشابه شكل الحوادث

او واخدين بالهم و مبسوطين و ناوين يطبقوا نفس التجربة على الطريق الدائري الجديد

يبقي اكيد احنا اللى لازم نتحمل افعال المسؤولين العباقرة دول و عبئ المحافظه على ارواحنا بنفسنا

ازاي - مش عارف -

بس ربنا يوعدنا بواحد مخه نضيف و قلبه نضيف زى الراجل الكريم الشهم اللى خصص عربيه ميكروباص صغيره لنقل المشاه من جانبي كورنيش المعادي بعد تكرار حوادث طحن الناس فى المنطقه دى
يعن الراجل مش مسؤل ولا حاجه ولا له يد فى البلاوى اللي كانت بتحصل دي - بس ربنا يجاويه خير - انتبه للمشكله و حلها - بامكانياته البسيطه - واعتقد ان لو فيه امكانيه انو كان يبني كوبري على حسابه ويهديه للمسؤولين ويقولهم اتفضلوا - اديني عملتلكم كوبري عشان نرحم الناس الغلابه دول - لكان عملها و انتو طبعا عارفين الباقي

وحسبنا الله ونعم الوكيل

المشاركة الأصلية كتبت بواسطة hema_lancer

تصدق بالله
انا الموضوع ده كان شاغل بالي قووووووووووي
وانا الكليه بتاعتي اللي هي مودرن اكاديمي اللي علي الدائري
وبشوف حاجات من دي كتير
وكمان وانا رايح كذا مره مكنت هخبط ناس بالرغم اني اصلا مش بعدي سرعه 80 نهائي علي الدائري الزفت ده
المهم احنا اصلا عندنا باصات بتنزل الطلبه المعادي ببلاش يعني الاكاديميه عملاها مجانا
لكن كانت المشكله في العبور الجه الاخري
وحصل ممقابله بيني وبين احدي الاعضاء الهامه في الكليه عندنا وصدقني اول حاجه كلمته فيها كانت هي موضوع عبور الدائري ده وان في طلبه كتير لازم تعدي علشان تركب
والراجل بصراحه اقتنع بالكلام وعلشان هو انسان مقدر ظروف الطلبه والله مافيش شهر بالظبط وكانو شغالين في انشاء نفق عبور المشاه ولحد دلوقتي بيعملوه هو كده بقالو حوالي 6 شهور وشغالين نهار وليل وعلي فكره انا سمعت كمان انه علي حساب الاكاديميه مش حساب هيئه الطرق
يعني لو الحكومه تعبت نفسها وعملت مثلا كل 5 كيلو نفق ولا حتي كوبري مشاه صدقني هتنتهي الظاهره دي لكن للأسف الانسان عندهم لا يسوي شيء

ربنا يجعله في ميزان حسناتك وحسناته وربنا يرفع عنا ظلم الظالمين

احسن دعوه ان ربنا يهلك الظالمين ببعض و ينجينا من شرهم وظلمهم