الموضوع: رينو لوجان2010...تقرير كامل مصور!

رينو لوجان 2010
تقرير كامل مصور
www.nilemotors.net

الحمد لله...تم إستلام سيارة حمايا منذ إسبوع...
رينو لوجان موديل 2010...فول أوبشن (أعلي فئة)...لون فضي ميتاليك
سعرها 66900...و هو السعر الرسمي...تم الحجز والإستلام بفرع محمد زكي بالقطامية...و فترة التسليم كانت في خلال 15 يوم تقريباً

ما يلي هو سرد لتفاصيل السيارة...و كما تعرفون...الصور أبلغ طريقة لإيضاح الإشياء
www.nilemotors.net
1. السيارة من الخارج

تتميز السيارة -على غير عادة رينو- بخطوط بسيطة...واضحة المعالم بدون تعقيد أو محاولة لإثبات عبقرية التصميم ...السيارة تشعرك بعض الشئ بأنها شاهين موديل 2050...و هي بالفعل تعتبر في رأيي الوريث الشرعي للشاهين في شوارعنا المصرية

السيارة تصميمها كومباكت نوعاً ما...تشعرك بأنها صغيرة و طولها مدكوك في بعضه...لكنها تخبئ بداخلها مساحات مهولة سوف نتكلم عنها لاحقا...
www.nilemotors.net
من الأمام:

من الجانب:

www.nilemotors.net

من الخلف:

www.nilemotors.net
يمكن ملاحظة شريط الكروم أسفل الشنطة...و هو متوافر في الفول أوبشن فقط

www.nilemotors.net
المرايات الجانبية:

www.nilemotors.net
جنوط حديد بطاسات...و كاوتش ميشلان روماني الصنع مقاس 185 15
أحياناً تطرح السيارة بكاوتش أخر روماني أيضاً يدعي Kormoran

لمبة الستوب:


لا يوجد توربيدو (البلاستيك الأسود) خلف الكابوت تحت المساحات :

تانك البنزين...يجب فتحه عن طريق المفتاح:

2. السيارة من الداخل:

تتميز السيارة بالوسع الشديد سواء في المنطقة الامامية أو الخلفية أو الشنطة...
التابلوه و العدادات و الكونصوال الأوسط يتميزوا بالبساطة في التصميم...مع عدم إغفال إضافة بعض التكنولوجيا الحديثة
الخامات الداخلية مقبولة إلي حد كبير...و تتفوق علي الفيرنا و اللانوس بدرجة كبيرة...من حيث جودة الخامات و التشطيب..


نبدأ بأهم جزء بالسيارة...و هو الجزء الخاص بمالكها و سائقها....مقعد القيادة...
وضعية القيادة كانت غريبة بالنسبة لي...كنت حاسس اني مرتفع جداً...لكن أعتقد الكرسي كان مرفوع...لأن به خاصية تعديل إرتفاعه...وجدت عيب إخر تتفوق فيه سيارتي البيكانتو بشدة...وهو مساحة الزجاج الامامي...حيث انها كانت ضيقة و غير مريحة في بداية الامر...لكن مع التعود أصبح كل شئ جيداً

عجلة القيادة و تحتوي علي إيرباج للسائق:

www.nilemotors.net
العدادات:
الخلفية البيضاء و شاشة المعلومات في الفول أوبشن فقط
عدادت البنزين و الحرارة...ديجيتال في شاشة المعلومات


دعونا نلقي نظرة علي وظائف كومبيوتر المعلومات:
www.nilemotors.net
القائمة الاولي: إستهلاك البنزين باللتر كل 100 كيلومتر


www.nilemotors.net
القائمة الثانية: المسافة المتبقية حتي نفاذ البنزين بالتنك:

www.nilemotors.net
القائمة الثالثة: المسافة المقطوعة من بداية الرحلة:

www.nilemotors.net
القائمة الرابعة: متوسط السرعة:

القائمة الخامسة..كم لتر بنزين مستخدم منذ بدء الرحلة:

www.nilemotors.net
القائمة السادسة و الأخيرة: عداد الكيلومتر الاساسي
مع منظر عام للعدادات أثناء الليل:


www.nilemotors.net
زراع المساحات...و به زر التحكم بوظائف الكومبيوتر:


زراع الإشارات و التحكم في الفوج لايت الامامي و الخلفي...و لمفاجأتي...به زر الكلاكس (حيث لا يوجد كلاكس بالدركسيون)

www.nilemotors.net
مفتاح التحكم في إرتفاع النور الامامي....و الطريف انه لا يعتمد علي موتور في الفانوس مثل باقي السيارات...لكن يعتمد علي واير مثل فرامل الدراجات:)


ننتقل إلى الكنصول الأوسط:
www.nilemotors.net
فتحات التكييف:


سي دي بلاو بونكت..أوديو فقط بدون إم بي 3...لكن صوته محترم و نقي جداً...و بسيط للغاية في الإستخدام...أهم ما يميزه ان لون خلفيته و الزراير الخاصة به...نفس لون الثيم العام للسيارة و هو البرتقالي
يوجد بالسيارة عدد 4 سماعات..2 بالإبواب الأمامية...و إثنين في الرف الخلفي...قايمين بالواجب و زيادة


وحدة التحكم ببعض وظائف السيارة (من اليمين)
www.nilemotors.net
1- الزجاج الكهربائي الأيمن
2- مفتاح غلق و فتح السنتر
3- مفتاح الإنتظار
4- سخان الزجاج الخلفي
5- الزجاج الكهربائي الأيسر


www.nilemotors.net
لوحة التحكم بالتكييف:

www.nilemotors.net
منطقة حامل الأكواب و بها طفاية متحركة حسب الحاجة:

www.nilemotors.net

عصا الفتيس:

زر التحكم بالمرايات الكهرباء
و زر منع فتح الزجاج الكهربائي
+ مكان لتخزين الموبايل أو أي شئ

www.nilemotors.net

الزجاج الكهربائي الخلفي:

www.nilemotors.net

مكان تخزين ظريف بالتابلوه..(المفروض ده مكان الإيرباج في العربيات اللي بره مصر)..ممكن إستخدامه للمناديل...

www.nilemotors.net
درج التابلوه...مضاء و في أخره يوجد فيشة الكومبيوتر الخاص بالسيارة مغطاه بغطاء بلاستيكي:

www.nilemotors.net
ننتقل الأن لسقف السيارة...حيث يوجد جراب ظريف للنظارة:

www.nilemotors.net
الشماسة اليمنى..بها مراية...أما الخاصة بالسائق...فبدون:

www.nilemotors.net
تنجيد الكراسي و الخامة ممتازين...
نوع التنجيد ده في الفول أوبشن فقط:

شكل بطانة الباب...و هي في رأيي جميلة جداً:
اللون الفضي في جميع أجزاء المقصورة موجود فقط في الفول أوبشن

www.nilemotors.net

www.nilemotors.net

الأبواب الخلفية...و بها طفاية

عتب الأبواب "رينو" (في الفول أوبشن فقط)

www.nilemotors.net

مساحة الأرجل بالكنبة...ممتازة عن حق...لاحظوا ان كرسي السائق راجع علي أخره...رجعت قعدت خلف كرسي السائق كنت مرتاح جداً و الكرسي بالكاد يلمس ركبتي...الكنبة تشيل 3 مستريحين قوي و ممكن 4 بس مزنقين شوية..
مساحة الرؤوس بالخلف ممتازة...و ده يرجع لإرتفاع السقف

www.nilemotors.net

www.nilemotors.net
مساند الرأس الخلفية:

الشنطة: ممكن أفرش و انام فيها...510 لتر
بها لمبة للإضاءة

www.nilemotors.net
العدة: مثبتة علي جانب الشنطة:

www.nilemotors.net
الإستبن...نفس الماركة و المقاس ميشلان صناعة روماني

وهذه مفاتيح السيارة....واحد مزود بريموت كنترول لفتح و غلق السيارة عن بعد...و الأخر بدون..
مع العلم ان ان المفاتيح مشفرة..أي لا يمكن عمل نسخ منها إلا بالرجوع إلى التوكيل أو أحد المتخصصين...
و مع العلم أيضاً ان الريموت متوافر في الفول أوبشن فقط

3. غرفة المحرك
www.nilemotors.net
منظمة بعناية و تقفيلها جيد...


غطاء المحرك:
www.nilemotors.net

بطارية جافة ماركة تيودور...بترخيص من رينو:
www.nilemotors.net




4-تقييم مبدئي

ملحوظة: بالطبع هذا ليس الحكم النهائي على أداء السيارة...لعدم تعاملي معها بالشكل الكافي و نظراً لعدم وصولها لل3000 كيلو...و هي في رأي المسافة الكافية لتليين السيارة بشكل كامل...لذلك...ما يلي هو مبني علي قيادة داخل البلد و على طريق سريع لمسافة 50 كيلو متر...و بالطبع قد تتغير وجهة نظري في بعض الأشياء مع مرور الوقت

المحرك

نبدأ ندور العربية...نسمع صوت المحرك و هو عالي بشكل ملحوظ...يعني العربية دي مش من العربيات اللي تبقى قاعد فيها و مش عارف إذا كانت دايرة ولا لأ...بالعكس...صوته -وإن كان خافت- لكنه ملحوظ....

ندي الغيار الاول و نبتدي نتحرك...طبعاً لم أتجاوز ال3000 لفة نظراً ان السيارة لم تكن قد تخطت ال 250 كيلو بعد...و بالتالي لم أجد تسارع مبهر

الغياراين الأول و الثاني تشعر من خلالهم ان صوت الموتور عالي و خشن...لكن يتضائل هذا الشعور بمجرد تعدي سرعة ال 50 كيلو/ساعة...و مع الغيار الثالث و ما بعده

رغم ان المحرك هو نفسه الموجود في الميجان 1...لكن أشعر انه أكثر خشونة منه...نظراً لخبرتي بالميجان 1 لمدة حوالي 6 شهور ...

بالتأكيد سوف يتحسن أداء المحرك و يهدأ بشكل كبير مع مرور الوقت...لذلك لست قلقاً من هذا الشأن

إستهلاك البنزين ممتاز...إلى الأن...الإستهلاك 8.3 لتر لل100 كيلو داخل البلد...و ده رقم جميل بالنسبة لل 1600 في التليين لسه
الفرامل

فرامل السيارة كانت غريبة في بادئ الأمر...لازم تدوس عليها جامد عشان تديك القوة اللي انت عايزها...مش من لمسة واحدة زي ما انا متعود في البيكانتو...لأ لازم تدوس و تدوس...الكلام ده جوه البلد...لكن على الطريق أداءها سريع و إستجابتها كويسة...و أكيد بعد الصيانة الأداء هايتحسن

العفشة

من أجمل الأشياء في هذه السيارة هي عفشتها...فعلاً مش مصدقها لحد الآن...لكم ان تتخيلوا ان السيارة أنعم من السكودا أوكتافيا و الجولف 5 و الماتريكس و البيكانتو و الفيرنا و النوبيرا و اللانوس...(انا سايق العربيات دي لمدة طويلة عشان مبقاش بفتي)...و صدقوني السيارة في نفس مستوى نعومة التويوتا كورولا 2005 (العربية دي سافرت بيها عشان مبقاش بفتي برضو)

صوت العفشة متدني للغاية مهما كان عنف النقرة أو المطب...نفس الكلام بالنسبة لتعامل المساعدين و السوست مع المطبات...تشعر انك محمول علي وسادة من ريش النعام او وسادة هوائية...إنفصال تام عن الأرض سواء صوتياً أو إنفعالياً...

في نفس الوقت...العفشة مصممة لأسوء أنواع الطرق...لأن اللي مايعرفش رومانيا (البلد الأم)...تعتبر من أسوء الطرق في العالم و العربية دي متصممة ليهم و لدول العالم الثالث المعروف عن طرقهم انها غير أدمية...عشان كده كان لازم يصمموا العربية للتوافق مع طبيعة هذه الطرق

فقط تأكد انك قمت بتقليل الضغط داخل الإطارات بعد إستلام السيارة...لأن أول مرة سوقتها كرهت نفسي و جالي إرتجاج في العمود الفقري...

الثبات

معقول جداً و أكثر مما أحتاج في عربية بالحجم و السعر ده....هي مش ممتازة في الغرز و المناورات السريعة...نظراً لعفشتها الخلفية و المبنية على Single beam + إرتفاع مركز الثقل مما يضعف من ثباتها أثناء المناورات على سرعات عالية...يعني جربت أخطف الدركسيون شمال على سرعة 90...شعرت بالمنطقة الخلفية تتأرجح بعض الشئ بعد ان أنهيت الخطفة...لكنها بالأساس سيارة عائلية مش للغرز و التنطيط... و لو نظرنا لمنافساتها لن يكونوا أفضل حالاً بدرجة كبيرة

لكن...السيارة في الطرق الطوالي و القيادة المعتدلة علي سرعة....راسية جداً بدون أي توتر أو إنفعال...مهما كانت حالة الطريق غير مستقرة...عفشتها الناعمة تعطيك الثقة و الأمان..

من الأخر...ثباتها مرضي جداً بالنسبة لي...مش منتظر أكثر من كده

العزل داخل المقصورة

عزل السيارة فعلاً رائع...و ده راجع لحاجتين:
1- نوع الكاوتش ممتاز بجد...صوته غير مسموع على أي سرعة لحد 120..أفضل من البريدجستون اللي عندي بمراحل
2- الزجاج له مجاري غويطة بيخش فيها لما بيقفل

و صوت الموتور مش مسموع بمجرد وصولها إلى الغيار الثالث و ما بعده

أدوات القيادة

الدركسيون و الباور...هو ممكن نقول عليه هاف باور (رغم ان مافيش حاجة إسمها هاف باور) لكن فعلاً الدركسيون تقيل ...مش ناعم و سهل زي معظم العربيات اللي ركبتها...أكيد بعد كده هايخف...لكن على الطريق السريع مخلي العربية ثابته و مش بتلعب

دواسة البنزين...فيها حاجة غريبة جداً و دي لاحظتها في عربيتين لوجان عندنا...زنة الموتور محسوسة فيها و كأن الدواسة مربوطة في الموتور و بتنقل كل الزنة بتاعت لرجليك...و ده شئ مزعج و غير مريح

دواسة الفرامل...كما تحدثنا عنها من قبل

دواسة الدبرياج...من أنعم دواسات الدبرياج اللي ضغط عليها في حياتي...مافيش أي مجهود مبذول من ناحيتي عشان أدوس عليها...لكن يعيبها ان لازم تضغط لأخر الدواسة عشان تعرف تنقل...غير كده هاتسمع زعيق التروس...عكس معظم السيارات...نقطة الفصل بتبقى عند نص الدواسة كده

عصا الفتيس...مسكته جميلة و سلس جداً في نقلاته...لم أشعر بأي خشونة أو صعوبة في النقل...يعيبه فقط الإهتزاز مثل السيارات القديمة على السلانسيه و أثناء السير على جميع السرعات

ملاحظات أخرى

أماكن زراير الزجاج الكهربائي غريبة و غير مريحة في بادئ الامر...كل ما كنت أركب أقعد أدور على الزراير في الباب و بعدين أفتكر انها مش هنا...لكن بعد 4 مرات بالظبط إيدي إتحركت اوتوماتيك ناحية الكونصول الأوسط...و 6 مرة بدل ما كنت بانزل كل زجاج لوحدة...بقيت أدوس بالإبهام و السبابة على الزرارين مع بعض...و خلاص الدنيا بقت عادية جداً من غير مضايقة...هي ينقصها وحدة رفع عشان ترفع الزجاج لما تقفل العربية بدل وجع القلب بتاع الزراير

الكلاكس صوته مزعج جداً جداً...و عامل زي بتاع الأجرة...لازم أغيره في أقرب وقت...من كتر ما هو مزعج بحس بيه في الدواسات :)...موضوع الزرار اللي في دراع الإشارة ده مش وحش بس...هايدايق لو كنت بتحود و عايز تزمر في نفس الوقت...

كرسي السائق يتم تعديل إرتفاعه بطريقة غريبة جداً...زي كراسي المكتب...دراع ترفعه من تحت و بثقلك تنزله لتحت أو ترفع نفسك عشان يترفع معاك...المشكلة ان انا رفيع ...فا وزني مكانش سامح إني أنزله لتحت...

قفلة الباب محترمة جداً و مكتومة...مافيش صوت باب تلاجه أو باب الحمام...الأكرة الخارجية كانت محتاجة تبقى أقيم من كده شوية

مستوى الرؤية في الخلف صعب أثناء الركن...و ده نظراً لإرتفاع الشنطة...لازم يتم تركيب باركينج سنسور...هايحل الأزمة دي...لكن في أثناء القيادة الرؤية جيدة

الكاسيت كما ذكرت من قبل...صوته ممتاز و إستقبال الراديو رائع بدون الحاجة إلى تركيب الإريال

التكييف تبريده جيد جداً و إن كان توزيع الهواءليس بهذه الكفاءة و هذا راجع لفتحات التكيف الغير عملية...لكن إجمالاً التكييف ممتاز و كفاءة في أحر الاجواء

الفرق بين الثلاث فئات للسيارة


التقييم المبدئي (النهائي)

انا مقتنع بهذه السيارة بنسبة 100%...هي سيارة تجمع بين الكماليات و العملية و الإسم و القوة و النعومة و السعر في باقة واحدة متكاملة...

بالسعر و الإمكانيات دي و خصوصاً مع الحملية الإعلانية المروجة لها...المنافسين هايجدوا صعوبة كبيرة في التصدي لها و الوقوف أمامها

أشتري منين؟

أفضل مكان للشراء في رأيي هو محمد زكي...ليه؟
لأن فترة التسليم غير طويلة بالمرة...عكس التوكيل تماماً...
بس أهم حاجة تحجز بمبلغ كبير...30000 مثلاً...و هتلاقيه مكلمك بعدها بإسبوع أو إتنين بالكتير علشان تستلم...و لو حظك حلو ممكن تستلم بعدها بيومين تلاته لو عنده في المخزون..
ده غير ان محمد زكي موزع معتمد من التوكيل...يعني كأنك بتشتري من التوكيل نفسه...مش معرض يعني...و ليهم مصدقية كبيرة جداً...ده غير انه مش بيتعامل بالأوفر برايس غير لو عايز تستلم و انت واقف...بيزود 2000 جنيه فقط

لو هاتشتري من التوكيل يبقى تستحمل الإنتظار...اللي ممكن يوصل ل 5 و 6 شهور ...و ده راجع انه بيعطي الحصة الأكبر من الشحنات للموزعين...علشان بيبعهم مرة واحدة بدل ما يقعد يبيع حتة حتة

_________________________________________________
هذه كل الصور و المعلومات التي إستطعت ان أسردها بالنسبة للوجان...أرجو ان تنال إعجابكم و ان تكون أعطيتكم فكرة عن ماذا تبدو تلك السيارة و التي تعتبر في وجه نظري الحصان الرابح في تلك الفئة السعرية خلال الفترة القادمة...
www.nilemotors.net

إذا كان لديكم أي سؤال عن السيارة انا تحت أمركم...

تحياتي لجميعكم....
www.nilemotors.net

هذا الموضوع حصري لنايل موتورز...برجاء ذكر المصدر في حالة نقله.
نادر نبيل

Copyright www.nilemotors.net 2009© All rights reserved