الموضوع: الحر والبرد و المرور.... ورمضان !!!!!

السلام عليكم
اولا اسف علي العنوان الملخبط اللي شبه عبارة سمك لبن تمر هندي.. بس وعد هاتفهموا كل حاجه

كل سنة و انتم بكل خير و صحة وعافية، ورمضان كريم

فين الحكاية بقي
الحكاية ببساطة اني النهارده كنت هانتحر.. أو أولع في العربية
ببساطة... كتييير و حرام

من الاول
امبارح كان عيد ميلاد زئ زئ "ده اسم عربيتي"
زئ زئ دي قعدت 11 شهر بنمر مؤقتة. عادي .. و اتدفع ليها في السنة الاولي ما يقرب من 1500 تراخيص تسيير مؤقت.. و اللي مش مصدق ممكن احسبهالوا و اجيبلوا الفواتير.. من اول مرة رحت المرور من سنة ويوم بالظبط لحد النهارده

كنت باجدد مؤقت في الاول كل شهر.. وبعدين و بعدين 3 شهور في 3 شهور لحد ما تميت 11 شهر مؤقت.. خلص الترخيص ورحت اجدد... قالولي لا هاتغير نمر .. قلت كويس قووي وماله .. اخيرا هاترحم من غلاسة اللجان اللي عندهم مغنطيس للمؤقت... طيب هاجدد قد ايه ؟ سنة .. ماينفعش علشان انا لسه ماجيبتش جواب البنك. و ماينفعش يجددولي غير الشهر اللي فاضل بس. قلت مش مهم . علي ما اخلص التأمين و اجيب جواب البنك
المهم طلبوا مني -و خدوا بالكم من دي - شهادة مخالفات علشان اغير النمر، و اكتشفت المأساه ان شهادات المؤقت كلها في مرور الدراسه -بالمناسبة انا مرور حلوان- اللي في صلاح سالم.

المهم بكل طاعة .. طلعت جيبت شهادت المخالفات.. و رجعت .. قالولي هاتفحص.. باقولهم يا جماعة دي زيرو و ماكملتش سنة .. هاتفحص يعني هاتفحص.. حاضر.. وبصمة موتور و بصمة شاسية .. المهم بعد ما قضيت ما يفوق ال6 ساعات في المرور بين حلوان والدراسة .. طلعت بنمرة جديدة-طلعت ج ف ص - و تصريح شهر

و امبارح الشهر خلص

طلعت النهارده علي المرور و كلي أمل اني خلاص يا دوب هادفع الضريبة و املا شهادة بيانات -خبرة تجديد 6 مرات يا جماعة بقي- و اصور بطاقتي و اجيب دوسية تجديد ... و كله تمام التمام و كلها ساعة ساعتين بكتيره و اخلص

بعد وقفة لمدة ساعتين ونص علي الشبابيك و الخازينة وباقي الاجرائات -وانا سخن و عندي دور برد ربنا يستر و ما يطلعش AH1N1- فوجئت بالشخصية الجميلة بتاعة الشباك بيقولي... فين شهادة المخالفات .. قلتله يا فندم انا مقدمها من شهر بالظبط .. قالي ولو لازم شهادة مخالفات .. قلت حلو .. الحمد لله اني غيرت النمر علشان ما يقوليش روح شمال ويمين... منين يا حج مخالفات النمر الجديدة .. قالي في نيابة المرور... روحت للنيابة .. و طالع بقي علي الشباك زي الشملول .. من فضلك اديني شهادة مخالفات الرخصة دي... الست بصيتلي بصة غريبة كده قالتلي دي نمر جديده !!!! . استغربت قلتلها ايوه قالتلي لا انا عايزة الرخصة القديمة .. يا امي مافيش رخصة قديمة .. خلاص بح .. قالتلي لأ .. هاديلك جواب ترجع بيه المرور يدوني بيه رقم المؤقت بتاعك.. حاضر. رجعت .. جيبت الرقم . ورجعت ..قالتلي اطلع بقي علي الدراسة علشان تجيبلي شهادة مخالفات
افهمها يمين و شمال .. يا امي ما انا طلعت الشهادة لحد اخر يوم كان فيه معايا المؤقت .. والله ماكانوا هايدوني النمر لو كان عليها مخالفات .. قالتلي ماليش دعوة .. ده هناك في المرور مش هنا في النيابة ..

و طبعا مضطرا .. طلعت علي مرور الدراسة اجيب شهادة المخالفات .. مع نظرة من الموظف بيستغربني.. بيقولي يا بيه مش انت علقت النمر الجديدة ؟؟؟!!! عايزها ليه ... قلتله انا باحب شهادات المخالفات وانفع الحكومة يعني .
بصلي بصة غريبة تاني .. المهم بعد تقريبا ساعة طلعت شهادة المخالفات

و لأن النهارده الخميس- نص يوم في المرور يعني !!!!-.. ولان الجو نار .. و انا زي ما قلتلكم عندي خنزيرين صغيرين في حلقي غالبا ... طلعت من المرور مش شايف قدامي

وزي الشاطر توجهت لأقرب ملجأ مكيف اقضي فيه بقيت اليوم و لسه داخل البيت .. قلت افضفض معاكم

كل همي دلوقتي اني هاروح للظلمة دوول تاني يوم السبت .. أول يوم رمضان ... وربنا يسترها بقي ما اتوفاش علي شبابيك المرور بقي...

و بكده تكتمل حكاية البرد و الحر و المرور - و نيابة المرور - و مرور الدراسة ... ورمضان كريم


أسف جدا جدا للغلاسة و الاطالة
تحياتي للجميع