رأيي في كماليات و اكسسوارات العربيات ..

انا عارف اني هازعل ناس كتير بكلامي في الموضوع ده.....
و علشان كده قبل ما اتكلم احب اقول ان دي يا جماعة وجهة نظري الشخصية و لا تلزمك عزيزي سي الاستاذ اللي بيقرا ... ايوة حضرتك
و كل الهدف هو اني افكر مع اخواتي و حبايبي بصوت عالي
المهم .....

الفكرة ببساطة اني شايف ان كتير من الكماليات اللي في سيارات اليوم .. ما هي الا ضحك على الذقون.. الهدف الاساسي اقناع الزبون بانه محتاج الكماليات دي و ان كله كوم و ان العربية (مثلا) تدور من غير مفتاح كوم تاني.. و مرايات الضم ... و ال abs اللي اساسا جونا مش محتاجها ... و سنسور الركن ... و تفييم الفوانيس ... و الرينجات و العدسات ... و حتى مثبت السرعة ... طب و الكساحات ... و غيرهم

اناواحد من الناس باشوف جودة العربية في انها تكون وسيلة تنقل امنه و ذات جودة و منخفضة تكاليف التشغيل
و باشوف ان الكلام بتاع الترويش ده ... لا مناسب لا لظروفنا الاقتصادية (حتى لو ميسور الحال) و لا حالة بلدنا و شوارعنا .. و لا مستوى الفقر اللي بيحيط بينا ... و محتاج مننا مشاركة مش تجاهل

اغلب الناس بتدور على منظرة ... نسبة ضئيلة جدا من الاجانب هي اللي بتعمل كده ...
كتير من الشباب بيدور على عربيات حرق و شد ... ماهو البنزين اللي بندفع نص تمنه بس ده ببلاش ... و الدعم ده مش مهم كان يروح لحد محتاج....
مش بادروش عليكم و لا حابب اخنقكم و الله بس انا بحس انه حرام ادفع مثلا 3000 جنيه في طقم جنوط
و اروح انام و انا عارف
و متاكد
ان في حد محتاج المبلغ ده علشان تمن اوضة نوم يتجوز

و مش اشتراكي و لا حاجة برضه
انا بس حصل كام موقف في السنتين اللي فاتو و خصوصا مع تفشي الفقر في بلادنا خلاني افكر
هو اللي احنا بنعمله ده صح

على فكرة الموضوع مش في العربيات بس
ممكن 50 حاجة كمان فيها ظلم (حج كل سنة, عمرة كل سنة, موبايلات ) الا بالمناسبة هو ال3 من 5 ميجا هتفرق معانا ايه و احنا عمرنا ما هنطبع على لوحة متر مثلا و اخرنا نشوف الصورة full screen على الكمبيوتر
في هدر waste جامد جدا في حياتنا
ممكن جزء سببه الشركات اللي بتزغلل عيوننا
بس اكيد بنتحمل جزء من الذنب
و يمكن الجزء الاكبر

كلامك مضبوط
100 * 100

بس الواحد بيحب يروش نفسه لزوم الترويح عن النفس بس لازم العقل ثم العقل ثم العقل

الله لا يحب المسرفين !!!!

و في ايات متير عن المسرفين

يا ريس ده اسمه التطور إلي هدفه تسهيل الحياة و تحسينها
ممكن يبقى بيختلف مع فكرة الفقر و الغنى و ضرورة التكاتف للقضاء على الفقر
(بالمناسبة اعلان دبي للجمع التبرعات قائم على هذا المبدأ و ناجح جدا)

اقتباس:

---

يا ريس ده اسمه التطور إلي هدفه تسهيل الحياة و تحسينها

---

صح
بس في حاجة اسمها المسئولية الاجتماعية

لو الواحد قام بدوره التكافلى فى المجتمع على اتم وجه, ساعتها من حقه اقتناء ما يراه مناسبا له او يقوم بما يدخل عليه السرور او الراحة النفسية سواء من اشياء مادية زى العربيات و الاجهزة الحديثة و خلافه او السفر للحج او العمره ام للتنزه

انا معاك يا باشا بس برضة لازم شوية اسراف كدة على الماشى كل فترة :D بس برضة بعقل و لحدود

عندك حق

كلامك جميل جدا و انا مقتنع بيه فى حدود بس اسمحلى انا شايف فى معلوماتك ان عندك عربيتين...
مش ممكن كان فى حد محتاج يشترى شقة بتمن واحدة منهم ؟؟

السلام عليكم ورحمة الله وبركاته

يااااااااااااااااااه أخيرا كائن فضائى له نفس وجهة نظرى اللى مخبيها لحسن الناس عندها كده قائمة كاملة بالردود

طبعا متفق مع حضرتك شكلا ومضمونا
وشايف إن المسؤلية الاجتماعية ليس لها حد معين تقف عنده، يعنى مش معنى ن مثلا تصدقت وتبرعت بمليون جنيه يبقى صح إنى
أصرف باقى مالى على الترويح والتنزه

لا العقل ولا الأخلاق - ولن أقول الدين عشان ما أقدرش أفتى - يقبل إنى أنفق على متع الحياة ولى أخوة فى الإنسانية والوطن
واحيانا كمان فى الدم محتاجين نصف ما أنفقه

وبعدين أنا أتصور إن الإنسان هيحاسب كمان على النعيم اللى تمتع بيه فى الدنيا وبذلك كلما زاد النعيم والتنعم كلما طال عليه الحساب

ومن رأى إنه يجب على الإنسان إنه يفرمل نفسه شوية ويحاول ما ينخدعش بالمحاولات التسويقية اللى رسالتها هى:إنت إزاى طايق حياتك كده؟؟ إنزل فورا هات المنتج الفلانى عشان حياتك تبقى أجمل

طبعا فى وجهة نظر تانية إن لو كل الناس عدلت نمط إنفاقها بحيث اقتصر على الأساسيات فقط الاقتصاد هيختل نظرا لإن كل صناعة الكماليات هتتعرض للكساد وبالتالى يتشرد الآلاف اللى بيشتغلوا فيها وبكده يبقى ناس أكتر هتنضم لفئة المحتاجين

بصراحة الكلام ده أنا ما عنديش رد مقنع عليه دلوقتى :oops: هى بس وجهة نظر تانية جت فى ذهنى فقلت أعرضها برضه

وأؤكد ختاما أن كل ما ذكرته وجهة نظر شخصية وليست أحكاما على أحد غيرى
والسلام عليكم ورحمة الله وبركاته

اقتباس:

---

انا شايف فى معلوماتك ان عندك عربيتين...
مش ممكن كان فى حد محتاج يشترى شقة بتمن واحدة منهم ؟؟

---

واحدة بتاعتيوواحدة بتاعة والدي
و ان بعض الظن ....
هو بس انا حاططها علشان انا باستعملها كتير

طب سؤال كده للريس...طب حضرتك ليه مش جايب لادا ولا 128 ولا ظيات؟؟ مهو العربيات دي فعلا زي ما بتقول كده
و بعدين في حاجة أسمها حب الحيازة يعني أنا بحس أني مبسوط لما أشتري جنوط مثلا و أروش العربية مثلا و أكيد السعادة ليها تمن مش كده ولا أيه؟؟ و واحد تاني بيشوف سعادته في حاجات تانية خالص و برضه بيصرف فيها و واحد بيشوف سعادته في أنه يكوم الفلوس على بعضها و ميصرفش منها حاجة
القصد ان المواضيع دي نسبية و اللي مش مهم بالنسبة لك مهم لغيرك
لكن تقول

اقتباس:

---

الفكرة ببساطة اني شايف ان كتير من الكماليات اللي في سيارات اليوم .. ما هي الا ضحك على الذقون.. الهدف الاساسي اقناع الزبون بانه محتاج الكماليات دي و ان كله كوم و ان العربية (مثلا) تدور من غير مفتاح كوم تاني.. و مرايات الضم ... و ال abs اللي اساسا جونا مش محتاجها ... و سنسور الركن ... و تفييم الفوانيس ... و الرينجات و العدسات ... و حتى مثبت السرعة ... طب و الكساحات ... و غيرهم

---

ده أكيد كلام منافي للعقل خاصة الabs و مثبت السرعة و ناقص كمان تقول الكاوتش و المساعدين و العفشة و التكيف و الموتور
و الناس اللي بتصنع الحاجات دي علشان الأمان و الراحة مش علشان دقنك اللي عايزة تضحك عليها

اقتباس:

---

مش علشان دقنك اللي عايزة تضحك عليها

---

ماشي يا ذوق
انا بس يا جماعة باقول

اقتباس:

---

ان دي يا جماعة وجهة نظري الشخصية و لا تلزمك عزيزي سي الاستاذ اللي بيقرا ... ايوة حضرتك
و كل الهدف هو اني افكر مع اخواتي و حبايبي بصوت عالي

---

و بعدين الامان محدش اتكلم عليه انا مقلتش حاجة على الاير باجز او قضبان الحماية ... و لا كمان التكييف
و مثبت السرعة مش مهم و ده رايي

اقتباس:

---

طب سؤال كده للريس...طب حضرتك ليه مش جايب لادا ولا 128 ولا ظيات؟؟ مهو العربيات دي فعلا زي ما بتقول كده

---

لا مش زي مابقول كده ... لا جوده و لا امان و لكن تكلفة تشغيل منخفضة فقط....
انا بتكلم على جنوط الاسبور و ما شابه
بلاش الجنوط .. فتحة السقف اللي عند معظم الناس و محدش بيفتحها
و ياريت يا شباب تاخدوا بالكم اني مش بهاجم حد اكتر ما بفكر احنا كده صح
و لا في اصح

ولا انا بهاجمك يا ريس ده انت اخ لينا في العروبة "من العربيات :D " و أدينا بنفكر سوا يا جميل :lol:

زمان كنا مقتنعين ان الريموت كونترول بتاع التليفزيون ده نوع من انواع الدلع الماسخ

تخيل حالك الآن لو ان الريموت ضاع وهتضيع الليلية تقوم تقلب بين القنوات

زمان كان اللى عنده تكييف ى سيارته يعتبر كائن ينتمى الى كوكب آخر ،تخيل حضرتك نفسك رجل يرتبط عملك بمقابلة زبائن او موردين وذهبت بسيارتك لاحدهم فى نصف يوليو الساعة 12 الضهر وقضيت ساعة فى سيارتك غير المكيفة لكى تصل له عرقان ومبهدل ومترب وياقة قميصك البيضاء قد تحولت الى لوحة سريالية لدرجات اللون البنى، يياترى هيكون انطباعه عنك إيه؟

زمان كان السنتر لوك دى كلمة ابيحة تمثل قمة الفساد والإسراف، طب هٍال سؤال لاخواننا اللى معندهمش سنتر فى العربية، كام مرة نسيت تؤمن كل ابواب العربية بعد مشوار كان راكب معاك فيه ناس تانية، وكام مرة عانيت لفتح قفل الباب لراكب خلفى هيكب معاك من وسط االطريق


قياسا على هذة الأمثلة فأن الكثير من الكماليات سهلت الحياه ولم يكن وجودها مجرد نوع من انواع الإستفزاز لمخاليق ربنا ، صحيح ان منها الكثير مما يمثل منظرة اكثر منها اضافات جادة لكن برضه معظمها شكلت اضافات سهلت الحياة

اقتباس:

---

قياسا على هذة الأمثلة فأن الكثير من الكماليات سهلت الحياه ولم يكن وجودها مجرد نوع من انواع الإستفزاز

---

معاك يا فندم ... و كتير برضو مش مهم اوي

اقتباس:

---

صحيح ان منها الكثير مما يمثل منظرة اكثر منها اضافات جادة

---

اهو ده اللي بتكلم عليه
خدعة بنقع فيها علشان نستهلك و نستهلك اكتر و هكذا

كلامك فية جانب كبير من الصواب ولكن الترويش م صفات الشباب وغريزة صعبة أيقافها - أنا من رأى ممكن الترويش ولكن فى حدود وبدون أسراف ويساعد على ذلك الرخص النسبى لبعض مستلزمات الترويش

انا معالك بس الفكرة ان الواحد لازم يستمتع طالما ربنا مديله و طبعا يستمتع بالعقل
و فى نفس الوقت يهتم بالمجتمع و اللى حواليه برده طالما ربنا مديله
هى الفكرة بس انه يبقى فى توازن بين ده و ده

اتفق معاك فى بعض النقاط

اقتباس:

---

اناواحد من الناس باشوف جودة العربية في انها تكون وسيلة تنقل امنه و ذات جودة و منخفضة تكاليف التشغيل

---

اقتباس:

---

كتير من الشباب بيدور على عربيات حرق و شد ... ماهو البنزين اللي بندفع نص تمنه بس ده ببلاش ... و الدعم ده مش مهم كان يروح لحد محتاج....

---

اتفق معاك فى رايك

انا شايف ان أكسسوارات العربية زى ديكورات البيت
ممكن تكلف بيتك نص مليون و ممكن 10 20 الف برضه ماهو كده عايش وكده عايش

بس الموضوع موضوع عربيتك يعنى زوقك و راحتك

من ناحية الأوبشنز انا شايف اللى ذكرته ليهم أهمية
مريات الضم جرب كده وإركن فى شارع ضيف وانسى تقفل المرايا هتلاقيها مكسورة جنب العربية
ABS شوارعنا كلها تراب و عادى جدا تتزحلق فيها دى غير ان برضه عادى جدا تلاقى أتوبيس والا نقل بيسرب زيت و مبهدل الشارع
وعن نفسى ليا صديق إتقلبت بيه العربية بسبب زين على اكتوبر

كل الأوبشنز دى مش رفاهية أمال تقول ايه على تعديل اوضاع الكرسى من الذاكرة
دى ممكن أتفق معاك فيها

كل حاجة حسب وجهة نظر اللى شاريها

اقتباس:

---

زمان كنا مقتنعين ان الريموت كونترول بتاع التليفزيون ده نوع من انواع الدلع الماسخ

---

انا دلوقتي زعلان فعلآ إن عربيتي الريموت بتاعها مبيفتحش الشنطة :mrgreen: :mrgreen:

بس حاجة مثلا زي الباركنج سينسور مالهاش أي لازمة فعلآ بيزمر قبلها باتنين متر و دي رفاهية بالسبة لينا إحنا عايزينه يزمر علي بعد تلاتة سنتيمتر عقبال مادوس علي الفرامل بس :mrgreen: :mrgreen:

بس الكماليات المتعلقة بالشكل زي الرينجات و فتحة السقف و التفييم و الكساحات كلها هجص الصراحة

انا شايف إن قدام مش نازلة في العربية بيبقي شكلها وحش و شكل العربية الأساسي أحلي زي اللي عملوها ما اختاروا

بغض النظر عن الفلوس

كلام الريس عشره على عشره
الواحد مفروض قبل ما يشترى حاجه يفكر ديه لازمتها ايه وهل ضروريه ولا لأ
بس الabs والتكيف والزجاج بالكهرباوالباور مهم. بس مش لازم اشترى عربيه فيها سنسور مطر مثلا او سنسور اضاء او فتحه سقف ده تقاليع ملهاش لازمه وكمان صيانتها بتبقى مكلفه