مشكله في الفتيس اريد ان اعرف هل هي طبيعيه ام لا

السلام عليكم ورحمة الله وبركاته
كل سنه وانتم طيبين ياجماعه

رمضان كريم


طبعا انا عربيتي الجن 2 اوتوماتيك موديل 2008 كده عدى عليها معايا سنه كامله لأني جددت الرخصه النهارده
ومشيت معايا 52000 كلم بالخير
وربنا يكرمني بيها بالخير دايما

العربيه معايا زي الفل والحمد لله طبعا بعيدا عن الحاجات الاستهلاكيه اللي اتغيرت على مرور الكلم ولكن


في حاجه حصلت معايا منذ فتره كبيره في يوم ورجعت تاني حصلت امبارح

لما اكون واقف في اشاره بجيب الغيار على n
ولما باجي اتحرك واجيب ال d
الاقي العربيه خطفت مره واحده خطفه ناشفه لدرجة اني بحس بالترس بتاع الفتيس في العربيه

وتاني يوم لقيت العربيه تمام ومافيش حاجه

طبعا اتصلت بالتوكيل وحجزت قالولي ان مواعيد رمضان من 9 ونص صباحا حتى 2 ونص فقط

فحجزت يوم الاربعاء القادم ان شاء الله


لو حد حصل معاه الموضوع ده يقوولي بليز


تحياتي

اعتقد دي مش طبيعية روح التوكيل يشوفولك العربية فيها ايه

شكرا أبو مريم

وكان توقعي اني هلاقي اكتر من نصيحه من الاعضاء

ولكن اعتقد اني كنت على خطأ


تحياتي ورمضان كريم

كل عام و انتم بخير
رمضان بقى وتلاقي الاعضاء نايمين هههههههههههه
بص انا مش عايز اخوفك بس نفس المشكلة دي كانت عند واحد صاحبي في صني زيرو و غيرولو الفتيس عشان كان في نتشة

حتلاقى المشكله دى ماصادفتش حد من الأعضاء عشان كده محدش رد

بس ياريت تقولنا عملت أيه فى التوكيل بعد ما تخلص الصيانه عشان نعرف الحل و السبب إن وجد (طبعا مش حايقولوا لأنهم مش فاضيين و الدنيا صيام .......... ربنا معاك وياريت تمسك أعصابك و ماتفطرش عليهم)

و كل عام و أنت بخير

فعلا يا تويتي انا عمري ما شفت الحوار دا علشان كدا ان مش عايز افتي

ان شاء الله خير

وياريت حضرتك تطمنا على اخبار حضرتك

السلام عليكم ورحمة الله وبركاته

كالعاده بحب اني اعرف كل الاعضاء الجديد معايا في عربيتي

النهارده الاربعاء رحت التوكيل عشان اطمن على الحركه الغريبه اللي بتحصل معايا كل كام شهر كده لمدة كام ساعه وبتختفي تاني


وطبعا ذكرتها في اول الموضوع

المهم كشفوا على زيت الفتيس اللي المفروض انه كان متغير في صيانة ال 40000 كم
ولقوه تمام
وكشفوا على الفتيس بالجهاز ماسجلش اي غلطه وطبيعي جدا

وكان الرد انه ممكن يكون كمبيوتر العربيه يهيس تحت اي خطأ بيحصل في ميموري السياره

طبعا انا ماقتنعتش وقلقت لان العربيه دلوقتي عامله 52500 كلم وكل قلقي لو خلص الضمان مين هينفعني في التوكيل بعد ربنا طبعا
ودخلت للمهندس امر وقلتله كده عموما على الموضوع

قاللي انت معاك أمر الشغل اللي وارد فيه انك جيت واشتكيت من عطل بيظهر احيانا في الفتيس وقاللي انت من الناس اللي متابعه الصيانات من البدايه ولو حصل معاك حاجه بعد الضمان مش هنتأخر معاك وخلي معاك أمر الشغل ده

وكده انا تمام اخر حاجه لاني ده اللي كنت عاوز اثبته عندهم عشان لو حصل حاجه لاقدر الله بعد الضمان بكام كلم


تحياتي للجميع

يا باشا خير انشاء الله
انشاء الله مايحصلش حاجة بعد كدة

معلش يا باشا سامحني انا و الله كنت مشغول و ماكنتش بدخل علي المنتدي

انت منور يااستاذ خالد دايمااااااااا

تحياتي

طيب مفيش حد جرب مع حضرتك العربية عشان يشوف العيب ده؟

هوه الفتيس و الموتور مش عليهم ضمان خمس سنين أو 100,000 كم ؟ ولا أيه ؟؟؟؟؟؟ :U_thin1[1]:

الضمان على الفتيس والموتور زي ماقلت الف مره

60000 كلم زي العربيه بالكااااااااااااااامل
ولسه سائل المهندس أمر امبارح تاني

تحياتي للجميع

وكذا واحد جرب العربيه وقال مافيهاش حاجه

تحياتي

اقتباس:

---

المشاركة الأصلية كتبت بواسطة tweety26980

لما اكون واقف في اشاره بجيب الغيار على n
ولما باجي اتحرك واجيب ال d
الاقي العربيه خطفت مره واحده خطفه ناشفه لدرجة اني بحس بالترس بتاع الفتيس في العربيه

وتاني يوم لقيت العربيه تمام ومافيش حاجه

---

السلام عليكم
الاستاذ تويتى
لسه المشكله دى حاصله معايا امبارح بعد الفطار
انا معايا برتون برسونا 2009 وعامله 6600كيلو
لما اجيب الفتيس على Rكنت بالقى العربيه بتتهز هزه عنيفه جدا وبسمع برضه صوت تعشيق التروس
ولما كنت باجى على dلاقيت العزم قل خالص والاقى اللمبه بتاعت ال Dاللى فى التابلو بتنور وتطفى على طول
فرحت لواحد ميكانيكى سيادته نام تحت العربيه وطلع وبكل قوة وتمكن قالى الكراسى بتاعت الماتور ضعيفه قوى يا باشا
قولتله حتى لو كلامك صح فالمشكله دى هاتبقى من اول ما استلمت العربيه مش هاتظهر فجأه
طبعا ماحطش منطق بعد كده وعرفت انه ميكانيكى شماليحى
ونويت اروح التوكيل بس كنت خايف من المشوار من دمياط لحد اسكندريه
هل اروح بالعربيه ولا دا هايبقى غلط واسحبها احسن
فاتصلت بايمن ربنا يجازيه عنى كل خير
فاشار عليا انى اكلم المهندس هانى الغندور اسأله
بصراحه راجل محترم جدا جدا جدا جدا ......
الراجل سلالنى عن اخر مره غسلت فيها العربيه وقالى ان دى مشكله فى فيشة الفتسي الكهربا او الفيوز بتاع الفتيس جه عليهم مياه وقالى ان الفتيس واخد الغيار التالت وثابت عليه
ونصحن انى اشوف كهربائى كويس واخليه يكشف على الفيوز وعلى فيشة الفتيس اللى تحت البطاريه
انا ماكدبتش خبر ورحت لواحد كهربائى جامد
كشف الفيش كلها ورشها WD40وبجرب لاقيت الحمد لله كل حاجه تمام
معلش انا حاسس انى طولت عليكم بحس حبيت انقل التجربيه للجميع للاستفاده

اقتباس:

---

المشاركة الأصلية كتبت بواسطة tweety26980

الضمان على الفتيس والموتور زي ماقلت الف مره

60000 كلم زي العربيه بالكااااااااااااااامل
ولسه سائل المهندس أمر امبارح تاني

تحياتي للجميع

وكذا واحد جرب العربيه وقال مافيهاش حاجه

تحياتي

---

ده يبقى نصب من التوكيل لأن البروشور بيقول غير كده

طبعا بشكر الاستاذ وليد فيصل لنقله التجربه دي
وانا والله توقعت انه ممكن يكون شوية تراب او مياه او حاجه زي كده
ولكن انا رحت من باب الاطمئنان

وربنا يباركلك


اما بالنسبه لمستر مرموش

انا من فتره قلتلكم الكلام ده على الضمان وانتوا قعدتوا تقولوا لألألأ

لكن انا من فتره عارف ده وكان كلامي كل مره بالتأكيد ان الضمان 60000 كلم على السياره بالكامل بما فيهم الفتيس والموتور


تحياااتي

على فكرة يا جماعة الضمان 60 ألف كم على السيارة بالكامل أو ثلاثة سنوات .
أو 5 سنوات و 100 ألف كم على المحرك و صندوق التروس .

الكلام ده من عدة مصادر داخل التوكيل ( مصادر لها ثقلها ) ........ و من بروشور الشركة .
http://i26.tinypic.com/oh4uio.jpg


و الحمد لله يا تويتي باشا أن مفيش حاجة و ربنا يباركلك في عربيتك ...... و يحفظهالك .

انا برضه سالت المهندس امر و قالى نفس الكلام ان الضمان 60000 كلم على العربية بالكامل و مافيش موضوع الـ 100000 كلم ده خالص للاسف

مع انه موجود فى البرشور زيى ما اخى توت موضحه

اقتباس:

---

المشاركة الأصلية كتبت بواسطة ahmedsiyam

انا برضه سالت المهندس امر و قالى نفس الكلام ان الضمان 60000 كلم على العربية بالكامل و مافيش موضوع الـ 100000 كلم ده خالص للاسف

مع انه موجود فى البرشور زيى ما اخى توت موضحه

---

لحد هنا و الكلام بقي عجيب و غريب

الموضوع ده ميتسكتش عليه ده ممكن بعد كده يقولك الضمان 30000 او ست شهور

أنا شخصيا لو حصلت معايا مشكله بعد ال 60,000 فى الموتور أو الفتيس و مارضيوش يعملوها فى الضمان حطلع أعملهم مشكله فى جهاز حماية المستهلك

اعتقد اللي مكتوب في البروشور دا الضمان بتاع بروتون العالمية بس عمو عز بيتملص و عايز يخلي العربية كلها بما فيها الموتور و الفتيس 60 الف كيلو بس

لا يابو مريم
اللي عامل البروشور ده
عمو عز العرب
وكل وكيل في بلده هو اللي بيحدد الضمان بمزاجه وده قانوني

يعني مثلا عندك ماليزيا عامله الضمان هناك

150000 كم او خمس سنوات
ايهما اقرب

تخيل

تحياتي ليك