المعاكسة واجب قومي

**Ahmed A Rahman** · 21-08-2009 03:17 PM

[justify]المعاكسة واجب قومي وحق تجاه اي مزة نازلة الشارع وتاعبة نفسها ومتشيكه وحاطة ميكب ونازلة تقول للأرض اتهدي ما عليكي ادي ... عايزين ايه من الشباب يعني ... مش لازم يشجعوا المنتج المحلي ... وكمان لما البنت دي تتعاكس والشباب يقرفها في الشارع اكيد هاتتربى وهاتتعلم الادب وتنزل الشارع بعد كده محترمة .... ماهو لو محترمة والله ما كانش حد قرب ناحيتها .

بس في مشكلة ...

البنت اللي لبسها كويس ولابسة اسدال كمان او خمار بتتعاكس ليه .؟؟؟.... ايه اللي بتتعاكس ليه ... اكيد ماشية تتمايع وتضحك في الشارع وحاطة ميكب اد كده ....لازم نربيها بردو وتنزل الشارع محترمه ... ساكتة ولا تنطق من اساسه ... مش بقولكم واجب قومي ... بنربي بنات مصر ...

طب واللي ماشية لابسه محترم ولا حاطة ميكب ولا غيره وماشية في حالها لا بتضحك ولا بتتمايع ماشية في حالها ... ...لأه بقى ما هي نازلة الشارع وحدها وقاصدة تتعاكس ايه اللي منزلها الشارع وحدها وهي عارفة الشوارع بقت عاملة ازاي ... ماهي لو محترمة بجد كانت نزلت مع باباها ولا اخوها ولا خطيبها حتى ... دي عايزة تعمل محترمة وتضحك عالشباب وتجيب عريس ... وبردو لازم نبينها على حقيقتها وتتعاكس علشان محدش يفتكرها محترمة ...

طب واللي نازلة مع اخوها ولا خطيبها ولا حتى جوزها (مش نازلة وحدها اهو) ويطلع لها واحد من ورا خطيبها ولا اخوها بيبصبص ليها كده من ورا ضهر الراجل الغلبان وعمال يشاور ويعمل حركات ويقرفها ... ... يا سلاااااااااااام ومين قاللك ان ده خطيبها ولا اخوها .. تلاقيها الواد اللي ماشية معاه ماهو لو كان خطيبها كان قعد يشوفها في بيتهم .. وانا بعاكسها علشان اعرفهم قيمتهم هما الاتنين علشان يتربوا ويبطلوا صرمحة في الشوارع ... مش بقولك واجب قومي علشان البلد والله....

طب واللي واقفه في البلكونه الغلبانه بتنشر ولا بتجيب حاجة بالسبت بيطلع لها ميت واحد من الشارع راصدينها واللي يعاكس واللي يشاور.. الله ما هي قاصداها اهي وطالعة البلكونة علشان الناس تشوفها وتتعاكس .. هي اللي عاوزة تتعاكس من الاساس .. وانا لما بعاكسها بوريها قيمتها اصلا ... هي ايه اللي طلعها البلكونة من الاساس .. تنشر .. هههه دي تلاكيك يا عمنا ... دي عاوزة تتعاكس ... ماهو لو محترمة والله ما كنت هاقرب ناحيتها ...

طب واللي قاعدة في بيتها يا ناس .. ويطلعلها من الشباك اللي عمال يبص ويبحلق فيها ويعاكسها ... شوفت اديك قلت بنفسك ياعم ... هيا اللي فاتحة الشباك علشان الراجل ده يشوفها ويعاكسها ... وتلاقيها كانت بتتمخطر قدامه رايحة جاية ومتشيكه علشان يشوفها ويعاكسها .. هي لو محترمة تفضل في بيتها وتقفل الشبابيك والبلكونات والبيبان كلها وتقعد تحت السرير كمان علشان تبقى بنت محترمة بصحيح ومحدش يشوفها خااااااالص وتدفن نفسها بالمرة

على فكرة يا جماعة انا بهزر طبعا

المعاكسة متنفعشى بأى حال من الاحوال

عشان اللى انتا حتعمله حيتعمل فى اختك او بنتك مراتك أو حتى خطيبتك

و كمان الدين محرم الحوار دة

النظرة سهم من سهام ابليس و متكونش انت محسوب على الي بيعتدوا على المسلمين
بره بيعتدوا على حياتهم وانت بتعتدي على اعراضهم

وكل سنة وانتم طيبين

و على فكرة

للامانة الموضوع منقول
__________________[/justify]

**M.Osman** · 21-08-2009 04:08 PM

تخيل ان في مختلين عقلياً تفكيرهم كدا ؟؟؟
لأ و كمان طلبة جامعة.. (ما هو الجامعات بصراحة بقت نوادي)

حاجة تجيب الضغط!
عيال هايفة مش متربين جعلوا مظهر البلد غير حاضاري بالمرة ... طبعاً دي حاجة من ضمن الحاجات التانية الكتير...
هنقول اية بقى..؟
كل سنة و انت طيب

**Terrible_DaRsH** · 21-08-2009 04:37 PM

شباب فاضي و بنات سافلة و ربنا يحرقهم هما الاتنين .

مش كل الشباب بيعاكس و مش كل البنات سافلة .

و على فكرة الاتنين مشتركين فى الجريمة , لان لا يوجد مُثار بدون مُثير .

**WalidAdel** · 21-08-2009 04:39 PM

فافعل يابن ادم ماشئت فكما تدين تدان

جزاء الله خير

وانت طيب ياراجل ياطيب

**lancerevolution** · 21-08-2009 05:08 PM

عشان القرف دا انا ما بحبش أنزل الشارع و بفضل قعدة القهاوى أو أروح الجيم و كمان مش أى قهوة واحدة كدا بعيدة عن أى شارع حيوى هى فى أخر منطقة سكنية و سط زراعات أو بطلع على الطريق السريع بعيد عن الجو الواطى دا من سفالة و قلة أدب و المفروض إنى فىة مدينة مش كبيرة و المفروض الناس عارفين بعض تقريبا بس تعمل إيه

**Ignition-Kid** · 22-08-2009 04:29 AM

ماهو المصيبه ان فيه بنات كتير بتتضحك لما بتتعاكس, فا طبعا الللى واقف عمال يعاكس فى بنات الناس ده لو واحده بس ضحكت على اللى هو قاللوا ماافتكرش انوا هايسيب واحده معديه غير لما يعاكسها , وفى الاخر الموضوع كله موضوع تربيه مش اكتر