الموضوع: مشكلة 50-60 هرتز

المشاركة الأصلية كتبت بواسطة for_ever

السلام عليكم و رحمة الله

كل سنة و انتو طيبن و رمضان كريم :)

بس عندي مشكلة كهربائية و انا للاسف معلوماتي الكهربائية ميح

انا اشتريت جهاز تعقيم لحاجات ابني اللي بيرضع و بياكل فيها من السعودية

المهم كان حرصي و انا بشتري الجهاز انه يكون بيشتغل علي 220 فولت

كنا بنفكر ناخدو معانا و احنا نازلين مصر اجازة عشان التعقيم بيه اسهل كتير -- يعني بيوفر علينا نقعد نغلي حاجات البيبي.

المهم اكتشفت بالصدفة انه مكتوب عليه 50 هرتز بس و لما سألت ولاد الحلال قالولي انه مش هيشتغل في مصر
عشان مصر فيها نظام 50 - 60 هرتز بس

دلوقتي مش عارف اعمل ايه ؟ هل في حل للموضوع ده ؟ في محول مثلا اشتريه عشان يظبط داخل الكهرباء لجهاز التعقيم ؟

و ايه حكاية 50 و 60 هرتز دي ؟

يا ريت يا جماعة اللي يعرف حل للموضوع ده يفيدنا و يبقي كسب ثواب في رمضان :)

رمضان كريم

سيبك منهم دي فتية معتبرة :)

شغل الجهاز و توكل على الله

الاختلاف البسيط في الهرتز لا يؤذي الاجهزة الكهربائية بس الحاجة الوحيدة اللي ممكن يعملها لو الجهاز فيه ساعة (منبه, تايمر .....الخ) ممكن الوقت ما يبقاش مظبوط ...... غير كده و لا يهمك

يا باشا مش هيبوظ و لا حاجة بس ممكن التايمر بدل ما يفصل بعد ربع ساعة يفصل بدري او متأخر دقيقة

بص يا سيدي

فاكر من ايام ثانوي موضوع التيار المتردد و التيار المستمر

التيار اللي في الفيشة ده متردد

يعني ايه

يعني بيتغير من الموجب للسالب كذا مرة في الثانية

و ده شكل الموجة بتاعته



يعني ايه بقى 220 فولت؟ يعني فرق الجهد بين طرفي مصدر الكهرباء

طيب و الهرتز؟ الهرتز ده هو وحدة قياس الترددات ..... زي كده ما نجوم إف إم 100.6 ميجاهرتز .... و زي ما الموبايل الجيل التاني في مصر 900 ميجاهرتز و الجيل التالتة 2100 ميجاهرتز و هكذا

طيب في الكهرباء؟ 50 هرتز يعني معدل تكرار الموجة اللي في الصورة دي كل ثانية

يعني 50 ذبذبة لكل ثانية

ما تقلقش ..... الفرق بين 50 و 60 هرتز لا يذكر و انا عندي اجهزة كتير من الخليج و من امريكا و مكتوب عليها 50 هرتز و بعضها 60 و كله شغال معايا فل

المشكلة البسيطة زي ما قلتلك ان بعض المكونات الالكترونية المستخدمة لقياس الوقت بتعتمد على الهرتز

يعني ايه؟ يعني لو 50 هرتز يبقى معناها عشان تايمر الجهاز يفصل بعد ربع ساعة لازم يكون عدة 50 * 15 * 60 = 45000 ذبذبة

طيب لو الكهرباء 60 هرتز؟ هيحصل ايه؟ هو مش هيفهم ...... و اول ما ال 45000 ذبذبة يمروا هيفهم ان الربع ساعة عدت ..... في حين ان اللي عدى = 45000 / 60 / 60 = 12.5 دقيقة بس و اعتقد دي مش مشكلة بالنسبة لك

و ده مش اكيد انه يحصل و ما تقلقش