الانتظار - مطار القاهره الدولي - استفسار

**AlmAhAtmA** · 27-10-2007 07:49 AM

نظرا لتعدد سفرياتي في الفتره اللي جايه :roll:
حكون مضطر اني اروح المطار بالعربيه
يا تري اركن جوه المطار
ولا اروح اركن في اي فندق جنب المطار
ولا اروح اركن فيييين
متوسط السفريه حوالي من 4 الي 5 ليالي
و دي فتره مش قليله
و حكون بعيد و ما فيش اتصال يعني محتاج مكان امان قوي و ناس كويسه
صحابي قالوا لي بلاش المطار و اركن في مساكن شيراتون او نوفوتيل المطار او موفينبيك
ايه رايكم

يا ريت لو تكرمتم و افدتوني في هذا الموضوع
و شكرا

**الصاوي** · 27-10-2007 08:13 AM

بص يا معلم
لو السفرية لغاية أسبوع يبقى أأمن مكان في العالم هو الباركينك بتاع المطار لأن أمن الدولة و المخبرين بيقعدوا يلفوا في المكان 24 ساعة و لو فيها إنذار و ضرب علشان واحد لمسها مثلا تلاقي أمة مصر كلها فوق دماغه و أنا شغال بالمناسبة في المطارالقديم لو عايز أي خدمة أو مساعدة في الموضوع ده و عنيا ليك

**AlmAhAtmA** · 27-10-2007 08:38 AM

ربنا يخليك يا استاذ صاوي
انا ان شاء الله حعمل بالنصيحه
و حركن في الباركنج بتاع المطار
انا اول سفريه من المطار القديم يوم 13 نوفمبر ان شاء الله و حرجع فجر السبت 16 نوفمبر
يا تري تكلفه اليوم كام في المطار
يا تري اقول للناس اللي واقفه اني حركن 4 ليالي ولا عادي ما فيش مشاكل للانتظار طويل المده

شكرا علي الرد السريع و اتمني اشوف حضرتك في المقابله الجايه

**الصاوي** · 27-10-2007 08:50 AM

أنا بعتلك على الخاص لو محتاج أي مساعدة

**AlmAhAtmA** · 27-10-2007 10:08 AM

المشاركة الأصلية كتبت بواسطة الصاوي

أنا بعتلك على الخاص لو محتاج أي مساعدة

يشرفني كل الشرف اني اتعرف بحضرتك
و الف شكر علي المبادره الجميله بالمساعده
جزاك الله كل الخير
حشوفك قريب ان شاء الله

**Karim_Monir** · 27-10-2007 04:40 PM

هاني حبيب قلبي
تروح وترجع بالسلامة
اعتقد البيات بيبقي غالي هناك
ممكن تركنها تحت شركتي ايه بي بي واحضنهالك على الرصيف
وابلغلك الامن انها بتاعت واحد زميلنا مسافر برة ياخدولك بالهم منها كويس
واحنا عندنا حراسة 24 ساعة من شركة امن محترمة
شوف وقولي واهو تاكسي ب 3 ولا 5 جنية يدخلك المطاراو انا اجي اوديك يا حبي
وكمان تبقي عيني عليها في الرايحة والجاية
شوف وقولي

**Hossam_Hassan** · 27-10-2007 05:41 PM

و انا رحت فين، الركنة عندنا (موفينبك سابقا) ببلاش و هتبقى فى عينيه و الأمن مستتب و لو تحب اقعدلك واحد أمن جنبها :D و تروح المطار باتوبيساتنا كمان :D :D :D ايه رأيك؟

**Tarek Fadl** · 27-10-2007 05:53 PM

السلام عليكم ورحمة الله وبركاته
والله يا جماعة انا سعيد جدا بالروح الموجودة في المنتدي من الجميع

**اسلام المصرى** · 27-10-2007 07:40 PM

يا هانى يا مختفى يا واحشنا :-) أذيك يا حبيبى؟ شكلك كده مطحون فى الشغل و مافيش وقت تنورنا كان الله فى عونك تروح و ترجعلنا بألف سلامة ان شاء الله و بالتوفيق يا رب :-)
أقتراح كريم ممتاز و مضمون و مفيش أحسن من كده :-) و أحسن من وقفة المطار و هناك تتبهدل و تتوسخ و ناس تقعد عليها و ممكن تتقلب فى الزحمة :D , أنا الصراحة ماعملاهاش! أنا سمعت أن العربيات اللى بتفضل أكتر من 24 ساعة الونش بيسحبها علشان بيكونوا قلقانين لحسن تكون مفخخة :P و الله أعلم. أنا كنت هعمل ذيك كده و انا مسافر الغردقة سمعت الكلام ده قلقت الصراحة و سبتها تحت البيت وخدت تاكسى مش معقولة يعنى "حبيبة" تتهان و أنا على وش الدنيا :D
طبعا أخونا الأستاذ الصاوى أدرى بصحة الكلام ده من عدمه - الونش......-
ربنا يوفقك الى الصواب. سلام يا صاحبى :-)

-

الموضوع: الانتظار - مطار القاهره الدولي - استفسار

LinkBack

أدوات الموضوع

عرض

الانتظار - مطار القاهره الدولي - استفسار - انشر الموضوع فى :

-

-

-

-

-

-

المواضيع المتشابهه

هو في مشكله في مطار القاهره؟

Lamborghini Gallardo من مطار دبي الدولي

مطار القاهرة الدولي من الهرم

حملة نايل موتورز لاستقبال المنتخب الوطني المصري في مطار القاهره الدولي....

الكلمات الدلالية لهذا الموضوع

المفضلات

المفضلات

ضوابط المشاركة