الموضوع: لو معاك فى حدود 70 الف تشترى إيه ؟؟؟

اسمح لي حضرتك أشاركك رأيي بما إني هشتري بنفس المبلغ ده إن شاء الله


باختصار شديد اختياري هو "رينو لوجان فول أوبشن - 67 ألف جنيه"


العوامل اللى اخترت على أساسها وخلتني أستبعد الفيرنا واللانوس:


1- اتساع صالون السيارة الرائع اللى بيعادل 2 صالون فيرنا أو لانوس، وده كان العامل الأساسي لأني طويل ومليان شويتين ومش بارتاح في قعدة اللانوس أو الفيرنا وأنا في كرسي الراكب الأمامي أو في الكنبة الخلفية، ومبعرفش أقعد في كرسي السواق أصلاً لأن الدريكسيون بيبقى داخل في ركبي!


2- ارتفاع السيارة عن الأرض، نظراً لأني ساكن في حلوان العزيزة اللى مليانة مطبات سيئة وحفر وبلاوي لا يخلو منها أي شارع في مصر (لاحظ انخفاض اللانوس والفيرنا اللى شكمانها مدلدل لتحت ويكاد يلامس الشارع وهتقدر قد إيه النقطة دي مهمة)، بالإضافة إلى ذلك سمعة عفشة السيارات الفرنسية الممتازة


3- كماليات السيارة أعتقد مماثلة لكماليات اللانوس والفيرنا لكنها تزيد عنها في إيرباج السائق (أينعم هو ربع عامل أمان بس أفضل من لا شيء برضه)


4- توكيل رينو اللى أجمع الناس على الإشادة بيه، وشخصياً أنا مش مؤمن بالرأي اللي بيقول إنك متهتمش بالتوكيل وهات عربية أي ميكانيكي يصلحها وإلخ إلخ...أصلاً أنا باروح أعمل صيانة دورية في التوكيل لسيارتي اللادا (تخيل بقى!) وباستحمل قرف زحمته في سبيل إني ماقعش يوم تحت رحمة ميكانيكي


5- صحيح اللوجان مغربي على روماني على فرنساوي لكنها في النهاية مختومة ببادج رينو، وأنا شخصياً باحترم السيارات الأوروبية أكتر من الكورية وحتى اليابانية وأعتقد إنها بتبقى معمرة أكتر منهم بمراحل (عندنا في عيلتنا سيارة 131 موديل 1976 خدمت 3 أجيال في العائلة الكريمة وما زالت مستمرة بحالة جيدة، ماعتقدش ممكن تلاقي
حد لسه عنده سيارة كورية أو يابانية موديل السبعينات أو التمانينات حتى ولسه بحالة كويسة!)


6- سبب أخير نفسي يمكن الناس تسخر منه، بس أنا أول ما شفت اللوجان حسيت إنها امتداد للادا والشاهين وال131 والعربيات المحترمة الأصيلة اللى بتخدمك خدمة شاقة طول العمر لكنها في ثوب جديد وبكماليات السيارات الحديثة، وباختصار حبيتها وارتحتلها من أول نظرة


أتمنى إن رأيي يكون أفاد حضرتك وربنا يوفقك للاختيار السليم، وكل عام وحضراتكم بخير