حكايتى مع اللادا 2107 المصرى

**nezamy** · 27-10-2007 01:43 PM

الحكاية تبتدى بانى عندى اتنين اصدقائى عندهم اللادا الروسى وانا جربتها وكانت كويسة وعملية ولكن لما جيت اشترى مالقيتش غير المصرى وانا كنت مستعجل فاضطريت انى اشتريها (غلطة عمرى للأسف) Crying or Very sad
المهم استلمت العربيه ولقيت الآتى:
1- الدركسيون تقيل مووووت ... اتقل من الروسى بمراحل
2- تارة الدركسيون مش مستقيمة مع العجل (رحت التوكيل وماعرفوش يعدلوة ..بالعكس خلوة اسوأ بمراحل)
3- الدركسيون فية بوش رهيب ... الميكانيكى قاللى غير علبة الدركسيون فورا لأنها بايظة
4- فية صوت وننة عالية فى الكرونه ..... لازم الكرونة تتغير هى كمان ..يادى النيلة
5- العربية ما بتعديش 120 كم / ساعة ودى كانت شكوى كل اللى قابلتهم فى التوكيل
6- المراية اليمين زجاجها عادى مش مقعر .... اخرك انك تشوف 20 سم جنب عربيتك ولا يمكن تشوف اى عربية جنبك
7- لما تنزل اى مطب مابتبقاش عارف انت هاتروح على فين ... ممكن يمين ... مكن شمال ممكن تفضل مكمل فى طريقك ..انت ونصيبك الله اعلم (بسبب بوش الدركسيون وسوء المساعدين) ولو قررت تعدى من وسط عربيتين على كوبرى 6 اكتوبر تبقى مجنون لأنك اكيد هاتلبس فى واحدة فيهم بسبب بوش الدركسيون برضة
8- العربية بتحك فى المطبات لو ركب 2 ورا
9- المساعدين بتاعه العربية خفيفه جدا ولازم تغيرها بمساعدين محترمة وتعللى العربية بعد تغيير السوست مش مجرد تركيب علايات ما بتعملش اى حاجة ... مصاريف ... مصاريف ... مصاريف
10- الكاسيت معقول ... الحمد لله فية حاجه عدلة
11- السماعات زبالة الزبالة
12- كرسى العربية دة قصة لوحدة... اولا ناشف جدا كأنك قاعد على خشبة (لا ينصح بشراء العربية لمرضى البواسير) ثانيا الكرسى عالى جدا جدا ... راسك هاتخبط فى السقف فى المطبات (انا طولى 177 يعنى مش طويل ولا نيلة)
13- العربية لما تمشى فى الحراره العالية والشمس تبتدى تقطع وعطلت بى مرة على كوبرى 15 مايو بعد اقل من شهر من شرائها (المضحك فى الموضوع ان كل العربيات اللى جنبى قاعد يقوللى رش ميه على طرمبة البنزين ... اتارى ده عيب معتاد فى اللادا) ... لازم تغير طرمبة البنزين كمان وانت وحظك يا تطلع سليمة يا تطلع زى اختها
16- التوكيل ... دة بقى عايز منتدى مسموح فية بالسب علشان عضويتى ماتتوقفش فى المنتدى المحترم اللى باحبه ده
17- التوكيل... اول حاجة المهندس القرفان من نفسة ومن شغلة واحتمال كمان من مراتة وكل حاجة تقوللة عليها يقولك هى كدة طبيعى حتى جرب باقى العربيات هاتلاقيها زى بتاعتك
18- التوكيل... كل ما تقول للمهندس على حاجة يقولك "ما تنساش انك راكب لادا .. هى كدة على اد تمنها"
مش بجد حاجة تقرف
وفيه حاجات تانية كتير مش فاكرها لأنى الحمد لله بعت العربية لأنى كنت كل ما اركباه احس انى هاعمل حادثة موت (خسرت فيها 6 الاف جنيه فى شهرين الحمد لله) واشتريت عربية اكسنت مستعملة موديل 99 1300 سىسى .... احسن من ام اللادا وابوها كمان
ربنا معاك ياللى هاتشترى اللادا ولو ليك اى استفسارات اخر قوللى

**ahmed1981** · 27-10-2007 07:42 PM

جزاك الله يا أستاذ نظامي
توضيحك للعيوب في عربيتك يدل على أمانتك وإخلاصك لكل من سيشتريها بناءاً على توضيحك
العربية دي كنت هشتريها موديل 2006 في يوم من الأيام ولكن ربنا رحمني منها
ورغم معرفتي الجيدة لعيوبها إلا أنه عندما أوضح عيوبها في المنتدى قد يتهمني البعض بأنني عدو اللادا وأنني متحامل على اللادا 2107 في جميع مشاركاتي وهذا إتهام باطل لي
ومن المواضيع التي قلت فيها عن مشكلة كرسي السواق في اللادا التي تجعلك تلزق في السقف:
http://www.nilemotors.net/Forum/viewtopic.php?t=6400
أما وأنه قد شهد شاهد من أهلها فالحمد لله

طبعاً هذا لا يعني إن اللادا 2107 غير مناسبة تماماً
فقد تكون مناسبة لإنسان رغم عيوبها وكل ما علينا هو توضيح تلك العيوب والقرار في النهاية له يتخذه على علم بمشاكلها

**Karim_Monir** · 27-10-2007 07:52 PM

نفس الكلام قولتة بالحرف الواحد نقلا عن تجربة زميل في الشركة
قعدت معاة اقل من سنة شاف فيها الويل هو ومراتة وابنة بسبب عمايلها فيه
وبعد سنة قعدت في التوكي لاكتر ما قعدت معاه باعها واشتري اكسنت 99 زيك بالظبط
ولما نحب ننكد عليك نقولة هانجبيلك اللادا
وهو كان بيلعب بدي بيلدنج يعني علة الدركسيون التقيلة ما تفرقش معاه خالص عشان ما شاء الله جسمة قد 3 مننا بس اللي سمعتة منه فعلا عاز منتدي غي رمحترم لاني هاوقف عضوية نفسي لو قلت اللي هو قال عليها

**AANIS** · 20-11-2007 01:30 PM

نسيت اقولك انها لادا 2107 مصري بدون تكيف

**ahmed1981** · 20-11-2007 08:10 PM

ألف شكر يا أستاذ AANIS
جزاك الله خيراً على تقييمك
وربنا يباركلك في عربيتك

**ibrahimsaad** · 23-11-2007 02:41 PM

طيب ياجماعه بعد كل ماقيل عن اللادا المصرى برأيكم

اللادا المصرى ولا الفيات 128 افضل

حيث ان سعر ال 128 40 الف واللادا حوالى 43 الف ونصف

يبقى ايهما افضل واحسن لو حبيت اشترى زيرو

**MoToRiZeR** · 23-11-2007 02:50 PM

بصراحة رأيي بلاش لادا لأن عربية ناشفة جدا و سواقتها مش مريجة

و في نفس الوقت حرام تدفع 40 الف في 128 .. عربية متطورش فيها اي حاجة من ساعة ما نزلت .. حرام اصلا تجيبها زيرو !
ممكن في السعر ده لو عايز تجيب زيرو فيه السوزوكي التو .. او مستعمل

**ahmed1981** · 23-11-2007 04:45 PM

المشاركة الأصلية كتبت بواسطة ibrahimsaad

اللادا المصرى ولا الفيات 128 افضل
حيث ان سعر ال 128 40 الف واللادا حوالى 43 الف ونصف
يبقى ايهما افضل واحسن لو حبيت اشترى زيرو

طبعا ً اللادا تغلب مراعاةً لظروف شوارعنا التي لا تتحملها ال 128

ويا سلام لو زودنا كمان 3000 جنيه وجبت اللادا 2107 الروسي يبقى تمام التمام

**ibrahimsaad** · 23-11-2007 05:43 PM

المشاركة الأصلية كتبت بواسطة dehumanizer

بصراحة رأيي بلاش لادا لأن عربية ناشفة جدا و سواقتها مش مريجة

و في نفس الوقت حرام تدفع 40 الف في 128 .. عربية متطورش فيها اي حاجة من ساعة ما نزلت .. حرام اصلا تجيبها زيرو !
ممكن في السعر ده لو عايز تجيب زيرو فيه السوزوكي التو .. او مستعمل

اشكرك اخى العزيز

بالفعل حرام ادفع 40 الف فى ال 128

لكن ايضا للاسف الالتو ماتنفعش معى اولا لصغر حجم الشنطه ودى مهمه جدا لى
ثانيا ثمنها فى البنك 58 الف يعنى عدت المسموح بيه للعربيه

الموضوع: حكايتى مع اللادا 2107 المصرى

LinkBack

أدوات الموضوع

عرض

-

-

-

-

-

-

المواضيع المتشابهه

ما هى عيوب اللادا 2107 ؟

مبتدئين اللادا 2107

دعوة لاعاد ة احياء ا لسيارة اللادا 2107 وأيضا منتدى اللادا

صوت غريب في اللادا 2107

سعر اللادا 2107

الكلمات الدلالية لهذا الموضوع

المفضلات

المفضلات

ضوابط المشاركة